မာကု 1
1
ဗတ္တိဇံယောဟန်ရဲ့ ဟောပြောဇာ
(မဿဲ ၃.၁–၁၂; လုကာ ၃.၁–၁၈; ယောဟန် ၁.၁၉–၂၈)
1ဘုရားသခင်ရဲ့သားတော်#၁.၁ တချို့ လတ်ရေးမူလေမာ ဘုရားသခင်ရဲ့သားတော်၊ ဆိုဇာဟှာ မှေ့ဟှ။ ယေရှုခရစ်တော်ကြောန်း ဒန်းကောန်းဟှာ အယ်မျိုးဖြစ်ဟှယ်။ 2ပရောဖက်ဟေရှာယ ရေးဟှားဟှူဇာဟှ
“ဘုရားသခင်ဟှ ပြောဟှားဟှယ်
‘ငါဟှာ နန့်ရဲ့လမ်းဟှို ပြင်ဆင်ဟှို့တွပ် ငါ့ရဲ့တမန်ဟှို နန့်ရှေ့ဟှ စေလွှတ်မယ်။’
3တောကန္တာရထဲမာ တယော့‑က်ယော့‑က်ဟှ အော်ပြောနေဇာဟှ
‘ဘုရားသခင်ရဲ့လမ်းဟှို ပြင်ဆင်ဟှားဂေ့။
အယ်သခင်တွပ် ဖြောန့်တန်းဟှူလမ်းဟှို လောက်ဟှားဂေ့!’ ”
4ယောဟန်ဟှာ ပေါ်လာဘီး ကန္တာရမာ ဟောပြောဘီးန ဗတ္တိဇံပေးနေလေဟှယ်။#၁.၄ ယောဟန်ဟှာ ပေါ်လာဘီး ကန္တာရမာ ဟောပြောဘီးန ဗတ္တိဇံပေးနေလေဟှယ်၊ တချို့ လတ်ရေးမူလေမာ ဗတ္တိဇံယောဟန်ဟှာ ပေါ်လာဘီး ကန္တာရထဲမာ ဟောပြောနေဟှယ်၊ ဆိုဘီး ပါရှိဟှယ်။ “နောန်ဒရဘီး ဗတ္တိဇံခံဂေ့။ အယ်ဆိုဟှာ ဘုရားသခင်ဟှ နန်းနို့ရဲ့ အပြစ်လေဟှို ခွမ့်လွှတ်လေ့မယ်” ဆိုဘီး ကြော်ငြာဟှယ်။ 5ယုဒပြည်တပြည်လောင်းန ယေရုရှလင်ဗြို့ရဲ့ လူလေအားလောင်းဟှာ ယောဟန်နားဟှို ရော့‑က်လာဂေ့ဘီး သူးနို့ရဲ့ အပြစ်လေဟှို ဝန်ခံဂေ့ဟှိကြောန့် ယော်ဒန်မြစ်မာ ယောဟန်အားဖြင့် ဗတ္တိဇံခံဂေ့ဟှယ်။
6ယောဟန်ဟှာ ကုလားအုတ်ရဲ့မွီးန လောက်ဟှားဟှူဝတ်န သားရေခါးဗတ်ဟှို ခါးမာပတ်ဟှားဘီး ကျိုင်းကောန်န တောပျားရယ်ဟှို စားလေဟှယ်။ 7သူဟှာ လူလေဟှို ကြော်ငြာဇာဟှ “ငါ့ထတ်ပိုဘီး ကီးမြတ်ဟှူလူဟှာ ငါ့နော့‑က်ဟှ ကြွလာလေ့မယ်။ ငါဟှာ ငေါက်ဘီးဟှာ သူ့ရဲ့ ခေနပ်ကြိုးဟှို ဖြေဟှို့တောင်မှထိုက်ဟှ။ 8ငါဟှ နန်းနို့လေဟှို ရေန ဗတ္တိဇံပေးဟှယ်။ အယ်ဘေမဲ့ သူဟှ နန်းနို့ဟှို သန့်ရှင်းဟှူဝိညာဉ်တော်န ဗတ္တိဇံပေးလေ့မယ်။”
ယေရှုရဲ့ ဗတ္တိဇံမင်္ဂလာန စောန်ဇမ်းသွီးဆောန် ခံဟှူကြောန်း
(မဿဲ ၃.၁၃—၄.၁၁; လုကာ ၃.၂၁–၂၂; ၄.၁–၁၃)
9အယ်ခီမာ ယေရှုဟှ ဂါလိလဲပြည် နာဇရက်ဗြို့ဟှ လာဘီးဟှာ ယော်ဒန်မြစ်မာ ယောဟန်အားဖြင့် ဗတ္တိဇံခံလေဟှယ်။ 10ယေရှုဟှာ ရေထဲဟှထလိုက်ဟှူန ကောန်းဂန်ပွမ့်ဟှားဘီး ဝိညာဉ်တော်ဟှ ချိုးငှတ်မျိုး ကိုယ်တော်ထတ်ဟှို ဆင်းလာနေဇာဟှို ဗြင်လေဟှယ်။ 11#မ ၃.၁၇; ၁၂.၁၈; မာ ၉.၇; လု ၃.၂၂“နန်ဟှာ ငါနှစ်သက်မြတ်နိုးဟှူ ငါ့ရဲ့ရှစ်ရဟှူသားဖြစ်ဟှယ်” ဆိုဘီး ကောန်းဂန်ဟှနေ သံတော်ထွပ်ပေါ်လာဟှယ်။
12ဝိညာဉ်တော်ဟှ ကိုယ်တော်ဟှို ကန္တာရထဲဟှို ရှစ်ရှင်းပို့ဆောန်ဘီး၊ 13ကိုယ်တော်ဟှာ ကန္တာရထဲမာ ရစ်လေးဆယ်လောင်းလောင်းနေဘီး စာတန်ရဲ့ စောင်ဇမ်းသွီးဆောန်ရှင်းဟှို ခံတော်မူဟှယ်။ ကိုယ်တော်ဟှာ လိဆန်ရိုင်းလေနတူးဒူ ရှိတော်မူဘီး ကောန်းဂန်တမန်လေဟှာ ကိုယ်တော်ဟှို ပြုစုဂေ့ဟှယ်။
ယေရှုဟှာ ငါးဖမ်းမားလေးယော့‑က်ဟှို ခေါ်ဟှူကြောန်း
(မဿဲ ၄.၁၂–၂၂; လုကာ ၄.၁၄,၁၅; ၅.၁–၁၁)
14ယောဟန် ထောန်ခ္လခံရဘီးန ယေရှုဟှာ ဂါလိလဲပြည်ဟှို သွားဘီး ဘုရားသခင်ရဲ့ ဒန်းကောန်းဟှို ကြော်ငြာလေဟှယ်။ 15#မ ၃.၂“အခီပ္လဲ့ဇောင်ဟှားဘီ ဘုရားသခင်ရဲ့ နိုင်ငံတော်ဟှာ ကြွလာခါနီးနေဘီ! နောန်ဒရဘီးဟှာ ဒန်းကောန်းဟှို ယောင်ကြည်ဂေ့ပါ!” ဆိုဘီး မိန့်တော်မူလေဟှယ်။
16ယေရှုဟှ ဂါလိလဲအိုင်ဘေးမာ ရှော့‑က်သွားနေဒူးမာ ငါးဖမ်းမားလေဖြစ်ဟှူ ရှိမုန်န သူ့ညီအန္ဒြေလေဟှာ အိုင်ထဲမာ ပိုက်ကွန်ပစ်နေဇာဟှို ဗြင်လေဟှယ်။ 17ယေရှုဟှ “ငါ့နော့‑က်လိုက်ဂေ့။ နန်းနို့လေဟှို လူလေဟှိုဖမ်းဟှူ ငါးဖမ်းမားမယ်” ဆိုဘီး မိန့်တော်မူလေဟှယ်။ 18သူးနို့လေဟှ ရှစ်ရှင်းဘဲ ပိုက်လေဟှို ထားရစ်ဘီးန နော့‑က်တော်ဟှိုလိုက်ဂေ့ဟှယ်။
19ကိုယ်တော်ဟှာ နဲနဲဆစ်ဘီးသွားဟှူခီမာ ဇေဗေဒဲရဲ့သား ယာကုပ်န သူ့ညီယောဟန်ဟှို ဗြင်ဟှားဟှယ်။ သူးနို့ဟှာ လှေထဲမာ ပိုက်ကွန်လေ ဖာနေဂေ့ဟှယ်။ 20ယေရှုဟှ သူ့နို့လေဟှို ရှစ်ရှင်းခေါ်လိုက်ဟှယ်၊ သူးနို့လေဟှာ သူးနို့ဖဇေဗေဒဲဟှို လူငှားလေနတူးဒူ လှေထတ်မာ ထားရစ်ဘီးဟှာ ယေရှုနော့‑က်ဟှို လိုက်ဟှားဂေ့ဟှယ်။
ညစ်ညူးဟှူနတ် ဝမ်ပူးနေဟှူ လူတယော့‑က်ကြောန်း
(လုကာ ၄.၃၁–၃၇)
21ယေရှုန တဗဲ့တော်လေဟှာ ကပေရနောင်ဗြို့ဟှို ဝမ်ဂေ့ဘီး ဒန်းနေ့ရော့‑က်ဟှူခီမာ ယေရှုဟှာ ဝါလယ်ဇရပ်ထဲဟှို ဝမ်ဟှားဘီးဟှာ စဘီးသွန်သန်လေဟှယ်။ 22#မ ၇.၂၈,၂၉လူလေဟှာ ကိုယ်တော်ရဲ့သွန်သန်ဇာဟှို အံ့ဩဂေ့ဟှယ်။ ဖြားဖြစ်ကြောန့်ဆိုဟှာ ကိုယ်တော်ဟှာ သူးနို့ဟှို ကျမ်းတတ်ဆရာလေမျိုးမှုဘဲ့န ခွမ့်အာဏာရှိဟှူသူမျိုး သွန်သန်ဟှူကြောန့် ဖြစ်ဟှယ်။ 23အယ်ခီမာဘဲ့ ညစ်ညူးဟှူနတ်ဝမ်ပူးနေဟှူ လူတယော့‑က်ဟှာ ဝါလယ်ဇရပ်ထဲဟှို ဝမ်လာဘီးဟှာ အော်နေဇာဟှ၊ 24“နာဇရက်ဗြို့သား ယေရှု၊ ကိုယ်တော်ဟှ ကျွန်တော့်လေန ဖြားဆိုင်ဟှယ်နူး? ကျွန်တော့်လေဟှို ဖျစ်ဆီးဟှို့တွပ် ရော့‑က်လာဇာလော? ကိုယ်တော်ဟှာ ဖယ်သူဖြစ်ဟှယ်ဆိုဇာ ကျွန်တော်သိဟှယ် — ကိုယ်တော်ဟှာ ဘုရားသခင်ရဲ့ သန့်ရှင်းဟှူသူဖြစ်ဟှယ်!”
25ယေရှုဟှာ အယ်နတ်ဟှို “တိတိဟှားနေဘီး၊ အယ်လူထဲဟှ ထွပ်ဟှားဂေ့!” ဆိုဘီး ဆောင်းမလေဟှယ်။
26ညစ်ညူးဟှူနတ်ဟှ အယ်လူဟှို ရရာတိုင်းတတ်စေဘီး အသံက္လယ်ဂီးအော်ဘီးဟှာ ထွပ်ဟှားလေဟှယ်။ 27လူလေအားလောင်းဟှ ရရာတိုင်းအံ့ဩဟှားဂေ့ဘီး “အယ်မူဇာဟှ ဖယ်မျိုးနူး? အယ်ဇာဟှ သွန်သန်မှု အသစ်တမျိုးလော? အယ်လူဟှာ ညစ်ညူးဟှူနတ်လေဟှို အခွမ့်အာဏာန မိန့်ပေးလိုက်ဇာ၊ သူးနို့ဟှာ နာခံဂေ့ဟှယ်!” ဆိုဘီး ရှင်းရှင်းမေးနေဂေ့ဟှယ်။
28အယ်ကြောန့် ယေရှုရဲ့ဒန်းဟှာ ဂါလိလဲပြည် တခုလောင်းဟှို ရှစ်ရှင်းပ္လံ့နှံ့ဟှားလေဟှယ်။
ယေရှုဟှာ လူလေဘောင်ဂီးဟှို ကျန်းမာစေဟှူကြောန်း
(မဿဲ ၈.၁၄–၁၇; လုကာ ၄.၃၈–၄၁)
29ယေရှုန တဗဲ့တော်လေဟှာ ဝါလယ်ဇရပ်ဟှနေ ထွပ်ဟှားဘီး ရှစ်ရှင်းဘဲ့၊ ယာကုပ်၊ ယောဟန်နတူးဒူး ရှိမုန်န အန္ဒြေရဲ့အီဟှို သွားဂေ့ဟှယ်။ 30ရှိမုန်ရဲ့ ယောက္ခမဟှာ ဖျားနာဘီး အိယာထတ်မာလှဲနေကြောန်းဟှို ယေရှုဟှို ရှစ်ရှင်း တောန်းလျှော့က်လေဟှယ်။ 31အယ်ကြောန့် ကိုယ်တော်ဟှာ အယ်မီးမနားဟှို သွားဘီးဟှာ သူ့ရဲ့လတ်ဟှို ကိုင်ဘီး ဆွဲဒန်လိုက်ဟှယ်။ သူဟှာ ဖျားနာပျော့‑က်ဟှားကြောန့် သူးနို့ဟှို ဧည့်ဝတ်ပြုလေဟှယ်။
32နေဝမ်ဟှားဘီး ညဉ့်ခန်းဇာရော့‑က်ဟှားခီမာ လူလေဟှာ ဖျားနာသူလေန နတ်ဆိုးဝမ်ပူးသူလေ အားလောင်းဟှို ယေရှုနားဟှို ခေါ်လာဂေ့ဟှယ်။ 33တဗြို့လောင်းဟှာ ခွဗော့‑က်ဝမာ စုဝီးလာဂေ့ဟှယ်။ 34ယေရှုဟှာ ရောဂါဘောန်းစောင်ရှိဟှူ လူလေဘောင်ဂီးဟှို ကျန်းမာစေဘီး နတ်ဆိုးဘောင်ဂီးဟှို နှန်ထုဟှယ်။ နတ်ဆိုးလေဟှ ကိုယ်တော်ဟှို သိဂေ့ကြောန့် သူးနို့ဟှို စကားပြောခွမ့်ပေးဟှ။
ယေရှုဟှာ ဂါလိလဲပြည်မာ ဟောပြောဟှူကြောန်း
(လုကာ ၄.၄၂–၄၄)
35မိုးလန်းခန်စောစောဂီးမာ၊ ယေရှုဟှ အိယာဟှထဘီးဟှာ အီဟှထွပ်ဟှားဟှယ်။ ကိုယ်တော်ဟှာ ဗြို့ထဲဟှနေ လူမှေ့သူမှေ့ဘဲဟှူနေရာဟှို ထွပ်ဟှားဘီးဟှာ ဆုတောန်းလေဟှယ်။ 36ရှိမုန်န သူ့ရဲ့ပေါန်းဖော်လေဟှာ ကိုယ်တော်ဟှို လိုက်ရှာဂေ့ဘီး၊ 37ကိုယ်တော်ဟှို တွိဂေ့ဟှူခီမာ “လူတိုင်းဟှာ ကိုယ်တော်ဟှို လိုက်ရှာနေဂေ့ဟှယ်” ဆိုဘီး လျှော့‑က်ဂေ့ဟှယ်။
38ယေရှုဟှ “နို့လေဟှာ အနီးနားမာရှိဟှူ တခြားဝါလေဟှို သွားရမယ်။ ငါဟှ သူးနို့ဟှိုလည်း ဟောပြောရအူးမယ်၊ ဖြားဖြစ်ကြောန့်ဆိုဟှာ ငါဟှာ အယ်တွပ်ဘဲ့ကြွလာဟှယ်” ဆိုဘီး မိန့်တော်မူလေဟှယ်။
39 #
မ ၄.၂၃; ၉.၃၅ အယ်ကြောန့် ကိုယ်တော်ဟှာ ဂါလိလဲပြည်အနှံ့ပြားဟှို ကြွတော်မူဘီး၊ ဝါလယ်ဇရပ်လေမာ ဟောပြောဘီးဟှာ နတ်ဆိုးလေဟှို နှန်ထုလေဟှယ်။
ယေရှုဟှာ လူတယော့‑က်ဟှို ကျန်းမာစေဟှူကြောန်း
(မဿဲ ၈.၁–၄; လုကာ ၅.၁၂–၁၆)
40နူနာသယ် တယော့‑က်ဟှာ ယေရှုနားဟှို ရော့‑က်လာဟှူခီမာ ဒူးထော့‑က်ဘီးဟှာ “ကိုယ်တော်အလိုရှိဟှယ် ဆိုဟှာ ကျွန်တော့်ဟှို သန့်ရှင်းပေးပါ”#၁.၄၀ ကျွန်တော့်ဟှို သန့်ရှင်းပေးပါ၊ အယ်ရောဂါဟှာ လူတယော့‑က်ဟှို သန့်ရှင်းဘဲအောန် လောက်ဟှားဟှယ်။ ဆိုဘီး တောန်းဗန်လေဟှယ်။
41ယေရှုဟှာ သနား#၁.၄၁ သနား၊ တချို့ လတ်ရေးမူလေမာ အမျစ်ဒေါသ၊ ဆိုဘီး ပါရှိဟှယ်။တော်မူဟှားဘီး လတ်တော်ဟှို ဆန့်ဘီးဟှာ အယ်လူဟှို ထိလိုက်ဟှယ်။ “ငါလိုရှိဟှယ်၊ သန့်ရှင်းစေ!” ဆိုဘီး မိန့်တော်မူလေဟှယ်။ 42ရှစ်ရှင်းဘဲ့ နူနာရောဂါဟှာ ပျော့‑က်ဟှားဘီး သူဟှာ သန့်ရှင်းဟှားလေဟှယ်။ 43ယေရှုဟှာ သူ့ဟှို ရှစ်ရှင်းလွှတ်လိုက်ဘီး 44“နန်ဟှာ အယ်မာဇာဟှို ဖယ်သူ့ဟှိုလည်း ပြောန။ အယ်ဘေမဲ့ ယဇ်ပုရောဟိတ်နားဟှို သွားဘီး ကိုယ်ဟှိုပြလိုက်ပါ။ လူလေရှေ့မာ သတ်သေဖြစ်ဟှို့တွပ် မောရှေပညတ်ဟှားဟှူတိုင်း ပူဇော်သကာဟှို ဆစ်သပါ” ဆိုဘီး မိန့်တော်မူလေဟှယ်။
45အယ်ဘေမဲ့ အယ်လူဟှ ထွပ်ဟှားဘီး အယ်ဒန်းဟှို အားရပါးရ ဟောပြောဘီး ပ္လံ့နှံ့စေလေဟှယ်။ အယ်ကြောန့် ယေရှုဟှ ဗြို့ထဲဟှို ထန်းထန်ရှားရှားဟှား ဝမ်နိုင်ဘဲန လူမှေ့သူမှေ့ဘဲဟှူ ဗြို့ပ္လန်နေရာမာဘဲ့ နေရဟှယ်။ အယ်ဘေမဲ့ နေရာတိုင်းဟှနေ လူလေဟှ ကိုယ်တော်နားဟှို ရော့‑က်လာဂေ့ဟှယ်။
Currently Selected:
မာကု 1: DWBT
Označeno
Share
Copy
Want to have your highlights saved across all your devices? Sign up or sign in
The Word for the World International and The Dawei Bible Translation Reviewer Committee.