Mberaand 1
1
NO MBERAAND NAA
(1—11)
Roog a saka adna fee
1No mberaand naa Roog a saka asamaan fo lanq.
2Lanq ke o ƥor a yoq’u, too saxit’eeyo nen tig. Ke widuuna fop a fi nen poofi mayu, a niɓaan tit, Yiif le Roog#1:2 Yiif le Roog Yaaga Roog sakafulee dara, Yiif le ten kaa reeƭu. a yaaraa, a yooroox poofi ke. 3Maaga, Roog a laya yee: «Fat a qoolaand#1:3 a qoolaand Roog a saka fop na pexey fa Lay um. Kaa layoogu rek ee, fat kene jeg, soo ke ta bugna a jeg. Yegil mbaax ne a lala in ee, fa Lay fee Roog a xawooxa, a refat o kiin, ɗeeti Saŋ 1:14. a jeg!» A qoolaand alaa yee dañ.#2Kor 4:6 4Roog a ga’a yee a qoolaand ale a faaxa, soo ta dalfoox o xaajin fo o niɓaan ole. 5A qoolaand ale, Roog a ne’aan ñaal, o niɓaan ole, ta ne’in o yeng. Naaga a yenga, a feed, ta ref ñaal eetaand ne.
6Roog a layahina yee: «Fat a qul a jeg, a xaaj poofi ke ƭik.»#2Piy 3:5 7Roog a fi’a a qul ale soo a xaaj poofi ke ƭik, a qaaj alene a far took, alene a lanq. Kaaga a jegta naaga. 8A qul ale, Roog a ne’aan asamaan. A yenga, a feed, ta ref ñaal ƭikandeer ne.
9Roog a laya yee: «Fat poofi ke ndefna ɗuga asamaan fee a mbokatoor o mbiñ o leng soo beeru ke a feeñ.» Kaaga a jegta naaga. 10Beeru ke Roog a ne’aan lanq, poofi pokatooru ke ta ne a den xa maag. A ga’a itam ee tig paax oo. 11Roog a laya yee: «Fat lanq ke saq a nap fo daaƭ laa saqna ax fo xa qos taxar tiirim kaa na njegkaa ax.» Kaaga a jegta naaga. 12Lanq ke a saxa a nap fo o xos daaƭ oluu refna fo ax um fo o xos ndaxar oluu refna fo ax um. Roog a ga’a yee paax oo. 13A dakooxa o yeng, a feed, ta ref ñaal ndadkandeer ne.
14Roog a layahina yee: «Fat kaa na nqoolandaa a ndef na asamaan, ndax da nqaaj ñaal ne fo o yeng ole, a ndefik itam ke na limteel camaane ke fo ñaal ke fo xa kiid axe. 15Fat a mbod na asamaan, a nqoolandaa lanq ke.» Kaaga a refta naaga. 16Roog a fi’a qoolandir ƭik maak ke, ne moƴ’ina o magin a saq ñaal ne, ne moƴ’ina o neew a saq o yeng ole. A fi’a itam xa qoor axe. 17Roog a doona a den na asamaan, ndax da nqoolandaa lanq ke, 18a saq ñaal ne fo yeng ole, a nqaaj itam a qoolaand ale fo o niɓaan ole. Roog a ga’a yee keene tig paax oo. 19A dakooxa o yeng, a feed, ta ref ñaal nahkandeer ne.
20Roog a layahina yee: «Fat tikoorik a mbeeñ no poofi ke, tiiƭ a ƭisit a lanq, a yetaa ɗuga asamaan fee.» 21Roog a saka xa qos niŋki-naŋka maak ke fo ke na ñoowaa fop too a mbeƴaa no maag ole, a sak itam o xos ndiiƭ oluu refna. Roog a ga’a yee keene tig paax oo. 22Roog a barke’a a den ee: «Ndimikyo, siw too mayƭandik poofi ke na xa maag axe. Fat tiiƭ ke itam a siw took lanq ke.» 23A yenga, a feed, ta ref ñaal ƥetkandeer ne.
24Cinj kaaga, Roog a laya yee: «Fat xa qos tikoorik fop a sutoor no lanq ke, muumeeniin, ƥoodiin, ƥaaɓaaniin.» Kaaga a dalfooxa jeg. 25Roog a saka muumeen ke fo xa qos den, ƥood ke no lanq ke fop fo xa qos den fo ƥaaɓaan ke no lanq ke fo xa qos den. Roog a ga’a yee keene tig paax oo. 26Maaga, Roog a laya yee: «Fat i sak o kiin, ta ref nitaal in, a nand fa in. Liƥ ke no maag ole, tiiƭ ke na asamaan, muumeen ke, lanq ke fop fo ƥood ke no lanq ke, fop no ɓay um a ndefkaa.»#1Kor 11:7
27Roog a saka o kiin ta ref nitaal um,
a nand fo ten.
Roog a saka o koor, a sak o tew.#1:27 Kam o saar o eetaand ole i nga’a a sakooƭ ale no lanq ke fo ke refna teen fop. Kam o saar o ɗikandeer ole i nga’a ne Roog a sakitna o kiin, soo maaga layee dara kaa farna na sakooƭ ale na adna fee. #5:1-2; Mace 19:4; Mark 10:6
28Roog a barke’a a den soo a lay a den ee: «Ndimikyo, mayƭand lanq ke, ke ta saqna fop a ref no ɓay nuun: Liƥ ke no maag ole, tiiƭ ke na asamaan fo muumeen ke na ñoowaa took lanq ke, fop no ɓay nuun a ndefkaa.» 29Roog a layahina a den ee: «Daaƭ le fo taxar ke na ndimaa fop, cooxaanum a nuun, da ndefik ñoowir nuun. 30Daaƭ luu andoona koy ee kaa xuƥaa, cooxaanum tiiƭ ke na asamaan fo muumeen ke na ñoowaa took lanq ke fop. Daaƭ leene na refkaa ñoowir den.» Kaaga a jegta naaga. 31Maaga, Roog a ga’a yee ke ta fi’na fop paax oo. A yenga, a feed, ta ref ñaal ɓetuu fa lengandeer ne.
Currently Selected:
Mberaand 1: SRR23
Označeno
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal