Matfei 1
1
IISUSAN RODIENDU DA LAPSUSAIGU 1-2
Iisusan tuatat da tuattoloin tuatat
(Luk. 3:23-38)
1Tämä on Iisusan Hristosan, Davidan poijan da Avraaman poijan rodulangu. 2Avraamale rodiihes Isakku, Isakale Juakoi, Juakoile Juudu da hänen vellet; 3Juudale Peres da Serah, kudamien muamo oli Tamar, Peresale Hesron, Hesronale Ram, 4Ramale Aminadab, Aminadabale Nahson, Nahsonale Salma, 5Salmale Boas, kudaman muamo oli Ruavu, Boasale Ovid, kudaman muamo oli Ruf՚, Ovidale Iisai; 6Iisaile rodiihes David, suari.
Davidale rodiihes Solomon, kudaman muamo oli Uurien akku; 7Solomonale rodiihes Rehabeam, Rehabeamale Avia, Aviale Asaf, 8Asafale Josafat, Josafatale Joram, Joramale Ussia, 9Ussiale Jotam, Jotamale Ahas, Ahasale Hiskia, 10Hiskiale Manasse, Manassele Amos, Amosale Josia; 11Josiale rodiihes Jekonii da sen vellet Vavilonah siirron aigua.
12Sen siirron jälgeh Jekoniele rodiihes Sealtielu, Sealtielale Serubbabel, 13Serubbabelale Abihud, Abihudale Eliakim, Eliakimale Asur, 14Asurale Sadok, Sadokale Jakim, Jakimale Elihud, 15Elihudale Eleasar, Eleasarale Mattan, Mattanale Juakoi, 16Juakoile Josif, Marijan ukko, Marija sai Iisusan, kudamua sanotah Messiekse.
17Nenga rahvahanpolvii Avraamas Davidah suate on kaikkiedah n՚ellitostu, Davidas Vavilonah siirdymizeh suate sežo n՚ellitostu polvie, i Vavilonah siirdymizes Messieh suate vie n՚ellitostu polvie.
Iisusan rodiendu
(Luk. 2:1-7)
18Iisusan Hristosan rodiendu oli nengoine. Marija, Hänen muamah, oli uskaldettu Josifale mučoikse. Enne heijän yhtehmenendiä nähtih, Marija on kohtuine. Tämä kohtu oli Pyhäs Henges tulluh. 19Josif oli hyvä ristikanzu i ei tahtonuh huijata hänele uskaldettuu Marijua rahvahan ies, a tahtoi hil՚l՚azeh jättiä händy. 20Konzu Josif duumaičči sidä, yöl unis tuli hänen luo Taivahallizen Ižändän anheli da sanoi: «Josif, Davidan poigu, älä varua ottua Marijua mučoikse. Se, mi on hänen kohtus, on Pyhäs Henges tulluh. 21Häi suau poijan, i sinul pidäy andua Hänele nimi Iisus#1:21 Iisus, jevrein kielel Jošua, merkiččöy «Taivahalline Ižändy piästäy»., ku Häi piästäy oman rahvahan riähkis.» 22Tämä kai rodih sendäh, ku tuldas tovekse nämä sanat, kudamat Taivahalline Ižändy oli sanonuh oman iänenkandajan suul:
23– Kačo, n՚eičoi rodieu
kohtuzekse i suau poijan,
i sille annetah nimi Emmanuil –
se on: Jumal on meijänke.
24Havaččuhuu Josif ruadoi muga, kui Ižändän anheli oli käskenyh, i otti Marijan mučoikse. 25Vai häi ei koskenuh Marijua, kuni tämä ei suannuh poigua. Josif andoi poijale nimen Iisus.
Currently Selected:
Matfei 1: LIVVI
Označeno
Share
Copy
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003