Luke 1
1
1Yivunde Tofile, mbili batu bayelige wutende mambu mavyoge ve ganegaretu. 2Banyigule mo nave yulu yawu ne bimwenyi bibile ve dibandu di mambu mene, babamakalugu milonzi mi mambu ma Nzambi. 3Ve yulu wuditige mambu mene motsu bande ve dibandu, ne me gandi matsetase re bwedi mutendile yu musamu wene mu mangike mangike Tofile. 4Mure yikeyabe yimwanze gyotsu gi mambu mene.
Diburu di Sa Batise
5Gubile muvegitsi malagu mu dikyesi dikumenge Irode gu tsengi yi Sudé, dine dyandi Sakari, abile gu dikabu di Abya. Mugatsyandi dine dyandi Disabeti, abile ndandi yi Aron. 6Sakari ne mugatsi babile basungeme ve wusu Nzambi, bakyelenge migyele myotsu ne birumu bi Fumu gu ga sumune. 7Te basebile ne mwane, mumbare Disabeti abile yigumbe. Yawu botsu babile keke binunu. 8Wisi wumoosi, Sakari adyanzenge yisalu gyandi gi muvegitsi malagu ve wusu Nzambi, mumbare bile re dikyesi di dikabu dyandi mudyanze, ne vane guvyoge dyambu. 9Bavage yikanugu, navevaga yawu ne kale ne yikanugu gyene gisoole re Sakari mu nyingene guyoke muyombu gu ndagu Nzambi. 10Ve yoka Sakari muyombu batu botsu babile gu kane nu sambile. 11Ne vane, kime yi Nzambi asupugile Sakari, nuteleme gu tselu yi mabagele, ve yitsige gi yokungu miyombu. 12Sakari nulabe yandi, aparemugu, ne agangu ne wome. 13Te kime yi Nzambi ayambile yandi re: «Sakari yiyalabe wome, mumbare Nzambi atseyulu disambulu dyagu.» Mugatsyagu Disabeti aguburile yu mwane dibagele, ne yiguluge yandi re: «Sa.» 14Yikelabe wunyi wu mbili mu yandi ne batu bambili bagusangile diburu dyandi. 15Ne yandi agubile mutu wu ngyenze ve wusu Fumu. Asakenu malamu, nisi ma kâle ne agubile wubasu ne Dinyunyi di Sungeme bande gu difumu di ngwandi. 16Agugabuse mbili baane ba Israel gu Nzambyawu. 17Agwitse ga kime yi Nzambi ne Dinyunyi ne ngudi yi mubigitsi Eli, munongise batayi ne baane bawu ne mukaluse mirime mi bange manzange, mu yululu batu basungeme, akegukigile Nzambi dikabu di batu babakarondi mambu mandi. 18Sakari ayambile kime Nzambi re: «Maguyabe dyambu dyene nde tsenyi? Mane mugatsi dimanune.» 19Kime Nzambi ayagule yandi re: «Mare Gabryel, makatelimi ve wusu Nzambi, mamasindugu muyambile, nulonze yu tsangu yiyinyi. 20Kagu yigubile yibubu, yisakebeyambile kwanga ne mu wisi wukesupugu mambu mene. Mumbare yisane gitu mu mambu mami makelabene mu dikyesi dyene.»
21Batu babile ne kyere mumbare Sakari avure tsinge gu yirini gi yokungu muyombu. 22Te ve vate yandi, aseberungule wuyambile nawu. Yawu bayulusu re atselabe yimage. Akalugu yibubu, ayambilenge nawu keke ne bilimbe. 23Ve mane Zakari wudyanze, agabuge gu ndagwandi. 24Ve yulu vane mugatsyandi Disabeti abege dimi, migweli miranu asepulenge gu kane abilenge ke gutsi ndagu. Atasenge gu murime wandi re:
25«Labe di Nzambi atsevagile me, mabetsya ne tsonyi ve misu ma batu bami mumbare maseburenge, te Nzambi atselabe me ngyebe mu buruleme yo.»
Tsangu yi diburu di Sesu
26Mu mugweli wu musamunu, Nzambi asindige kimandi Gabryel gu divule di Galilé gu Nasarete. 27Gu numbe mugyetu yiganeyabe babagale yibande Susefu muyonge. Yandi abile ndandi yi maate David, dine dyandi Mari. 28Kimene yinyingene gu mbuge Mari muyambile re: «Bile ne yinyunge! Fumu Nzambi ameritsige yu dironde dyandi didinene, yandi ayi nagu.» 29Mu munongu nyivwene, Mari ayulu page ne abene wunyigugulu. 30Kime ayambile yandi re: «Mari yiyalabe wome, mumbare yitsedile myule ve wusu Nzambi. 31Ne mapape yigubege dimi, yigubure mwane dibagele ne yiguluge yandi re Sesu. 32Agutsitsungu re Mwane Nzambi Pungu. Fumu Nzambi agubyatse yandi nave byatsu kagaandi David. 33Te agukume mubu ne mubu mu mbubi Israel ne dinyange dyandi disakevu.»
34Mari ayambile kime Nzambi re: «Ake dyo diguvyogile nde tsenyi mumbare masameyabe babagele?» 35Kime ayagule yandi re: «Dinyunyi di Sungeme digusundigile yu ne ngudi yi Nzambi Pungu yigufuge yu ne yilunze gyandi, re dibandu mwane wukeburu agubile wu yelimine agutsitsungu re: Mwane Nzambi. 36Labe, Disabeti kindagu ne yandi agonevinge mwane, ake ne migweli misamunu. 37Mumbare gusandi dyambu dikelembugunu ne Nzambi.» 38Vane Mari ayagule re: «Mande musalitsi wu Fumu, dyo divyogi natse yambile yu.» Ne kime Nzambi yigabuge.
Mari anyyalise Disabeti
39Ve vyoge batsufu, Mari ayende nyyavu guyelabe Disabeti gu divule di mukongu wu musengi wu Sudé. 40Anyingene gu ndagu Sakari ne ayubule Disabeti. 41Ve simbule Mari myogu gu Disabeti, mwane wupupe gu difumu dyandi. Disabeti abasu ne Dinyunyi di Sungeme. 42Ne ayame mundunge wu munene re: «Nzambi atselunze yu.» Nuvyogilile bagyetu botsu ne myule myandi miyi ve yulu mwane wukebure yu! 43Mande nyi mure nguyi Fumwami ayitsi gu mbugami? 44Mumbare yimelabe ve yitse yubule me, mwane wutse basu ne yinyunge gugare difumu dyami. 45Yine yinyunge mumbare yibile ne gitu re Fumu agudugise mayambile yandi.
Dyimbu di Mari
46Kerevane Mari ayambile re:
«Magitse wunene wu Fumwami.
47Malabe wunyi wu mbili mumbare Nzambi atseyobule me.
48Ne atselabe me dingyebe, me musalitsi wandi wugane tsongu,
labe, bande nemunyi wuwu batu botsu bagutsitsenge me re wuvegu myule.
49Mumbare Nzambi wuvyogilile bungudu atsevagile me mambu mamanene.
Dine dyandi Wurele. 50Dingyebe dyandi diyi mubu ne mubu
gu botsu babakagobisi yandi.
51Akavagi mambu mamanene kene googu wandi wune bungudu.
Avavise bababile ne matase mamabi mu mirime.
52Asekule ba fumu mu bakwange bawu,
atelige batu babasigeme.
53Avege mbili manyi gu bababile ne nzale,
ne agabuse bikiti makake mwasi.
54Aruge muyamune Israel, musalitsi wandi:
Aselibene wuritsige dironde dyandi.
55Gu Abaram ne bandandi bandi mu yivigu gitabule yandi
ne batayi betu.»
56Mari amane migweli mireru gu mbuge Disabeti, kerevane agabugu gu dimbu dyandi.
Diburu di Sa Mubatisi
57Dikyesi di Disabeti mu dile mwanandi, dipule. Abure mwane dibagele. 58Bambatsi ne bakinde bandi bayulu tsangu yi Fumu aritsige dironde dyandi mu yandi, ne yawu balabe yinyunge nandi mu tsangwene. 59Ve vyose mwane tsufu tsambu, mu wu pombu, bayende nandi mugyerise, baronde wuluge yandi nduge yi tayandi Sakari. 60Te ngwandi ayambile re: «Gusandi, agutsitsungu re Sa.» 61Bayubule yandi re: «Nga gugare yitsuku gyagu gusandi mutu wune dine dyene?» 62Ne yawu bayubule nyivu gu Sakari ne bilimbe muyabe dine di mwane. 63Sakari avonde yitendulu, atende re: «Ndugandi nde Sa.» Batu botsu bagibeme. 64Mbangu mbangu Nzambi asingise Sakari mu beyambile, abwamugu nuyimbile Nzambi. 65Vane ne vane batu botsu babatsagelenge ve mbare Disabeti bagangu ne wome, ne gu musengi wu Sudé batu banyigulenenge yawu ne yawu mambu mamanene mamalabene. Ne yawu babayulungu mo, batasenge, nuyambile re: «Ne mwane wene wu mukyeki, wugubile nde tsenyi?»
Dyimbu di Sakari
66Botsu babayulungu mambu mene bakyela mo mu mirime myawu, nuyambile re: «A wuwu mwane wugubile nde tsenyi?» Dikake di Fumu dibile mu yandi. 67Kere Sakari tayandi abile wubasu ne Dinyunyi di Sungeme ne abige mambu re:
68«Digitsi Fumu Nzambi yi baane ba Israel,
mumbare atselabe dingyebe, nuyobule yitsuku gyandi.
69Asindigile yetu muyobulitsi wune bungudu
gu dibure di David musalitsi wandi.
70Nane re na yambile yandi dyo kale
mu mine mi babigitsi bandi basungeme re:
71Maguyobule yenu mu bakolitsi benu,
ne mu bungudu bu babakalabi yenu ngusu.
72Re nane, Nzambi aritsige dironde dyandi gu batayi betu
73Ne abangule yivigu gyandi gitabule yandi ne tayetu Abraam.
74Muvage re ve dikemane yobulu mu dikake di bakolitsi betu,
dikesalile yandi guga kyere.
75Nuyende ve wuswandi gugare wuyelimine, ne wusungeme
bawisi botsu ba monyu wetu.
76Ne yu mwane wumukyeki, yigutsitsungu re
mubigitsi wu Nzambi Pungu mumbare yiguyendennge ve wusu Fumu mu balile yandi nzile.
77Muvege batu bandi buyedi muyabe re bamadile monyu,
ne musingulu kokolu mu mabi mawu.
78Nyinge ke mu dingyebe di Nzambyetu.
Anaritsige yivele gyandi gigu yulu.
79Mutsombuse botsu babamatsagele gutsi diviseme, ne gutsi posi yi difu,
ne wuyendise matage metu gu nzile yi polu.»
Bubangugulu bu Sa
80Te mwane abangugunge ne dinyunyi dyandi dibonga bungudu, ne atsagelenge ke gu bitsige bi yigangi kwanga ne mu wisi wu supugu yandi mulonze batu ba Israel.
Currently Selected:
Luke 1: SNQ
Označeno
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES