Johane 5
5
Jesu mbwaakaponya muntu ku-Betesda
1Nokwakamana aya kwakali pobwe lyaba-Juda, awalo Jesu wakainka ku-Jerusalemu.
2Eno mu-Jerusalemu afwaafwi amulyango wembelele kwakali kaziba akali kutegwa Betesda muci-Hebrayo, akakayakidwe ŋanda iili amakota osanwe, 3Omu mwakali kulala bantu banjibanji abali kuciswa, boofu, abazilema, abamwi abapuutide mibili, abakali kulindila maanzi kuti aselauke. 4Nkaambo angelo wakali kuseluka akunjila mukaziba kuziindi zimwi, akuselausya maanzi, nkabela woonse uwakasaanguna kunjila maanzi naaciselauka wakapona kucilwazi cakwe necili buti. 5Eno muntu umwi uwakaliwo, wakaciswa myaaka iili makumi otatwe amusanu mwiitatu. 6Elyo Jesu naakamubona ulilede, alimwi mbwaakaziba kuti wakali kukede ciindi cilamfu mbubonya buya, wakamwaambila kuti, Sena uyanda kuponyegwa? 7Mulwazi oyo wakamuvuwa kuti, O mwami, nsijisi muntu wakundibika mukaziba, maanzi kaaciselauka, pele nenciya, kwainda kale umbi kumbele lyangu. 8#Mt 9:6Jesu wakamwaambila kuti, Nyamuka, bweza bulo bwako, uende. 9#Joh 9:14Mpoonya mpoonya oyo muntu wakaponyegwa, wakabweza bulo bwakwe, wakeenda.
Eno bwakali buzuba bwa-Sabata obo. 10#Neh 13:19; Jer 17:21; Lk 6:2Nkaambo kaako ba-Juda bakamwaambila oyo uwakaponyegwa bakati, Mbuzuba bwa-Sabata, taceelede kuti ubweze bulo bwako. 11Pele walo wakabavuwa kuti, Oyo uwandiponya ngowandyaambila kuti, Bweza bulo bwako, uende. 12#Lk 5:21Bakamubuzya kuti, Nguni oyo muntu uwakwaambila kuti, Bweza bulo bwako, uende? 13Pele oyo uwakaponyegwa takali kumuzi na nguni, nkaambo Jesu wakafwenunuka buyo nkaambo kamakamu aabantu abakali mpawo. 14#Joh 8:11Musule Jesu waakumujana muntempele, wakamwaambila kuti, Bona, waponyegwa. Utaciti cibi alimwi, antela ulajana bubi ubwiindilila. 15Nkabela muntu oyo wakainka, wakabaambila ba-Juda kuti, Ngu-Jesu uwakandiponya. 16#Mt 12:14Nkakaambo ako ba-Juda ncobakamupenzya Jesu, nkaambo wakacita zintu ezi abuzuba bwa-Sabata, 17#Joh 9:4Pele Jesu wakabavuwa kuti, Mbubonya Taata mbwacibeleka ambuli sunu, amebo ncembeleka. 18#Joh 7:30; 10:33Ba-Juda ncebakali kusoleka kapati kuti bamujaye, nkaambo takuli kusotoka mulao wa-Sabata kwala pe, pele akwalo kwaamba kuti Leza ngo-Wisi mwini, nkokuti wali kulipa ka-Lezaleza.
Jesu mbwaakalyaamba kuti ngo-Mwana a-Leza
19 #
Joh 3:11,32 Jesu wakabavuwa wakati, Ncobeni ndamwaambila kasimpe, Mwana takonzya kucita cintu mwini, pele ncabona icicita Wisi nkaambo zintu izili buti nzyacita, awalo Mwana ulazicita mbubonya. 20#Joh 3:35Nkaambo Wisi ulamuyanda Mwana, wamutondezya zintu zyoonse nzyacita mwini, alimwi uyoomutondezya milimo mipati kwiinda eyi, kuti mukagambwe. 21Nkaambo mbubonya Wisi mbwabusya bafwide akubapa buumi, mbubonya awalo Mwana ulapa buumi abo mbayanda. 22#Dan 7:13,14; Inc 17:31Nkaambo Wisi tabeteki muntu, pele wakapa lubeteko loonse ku-Mwana, 23#Flp 2:10,11; 1 Joh 2:23; Lk 10:16kuti boonse balemye Mwana, mbuli mbobalemya Wisi. Oyo uutalemyi Mwana, talemyi Wisi uwakamutuma. 24#Joh 3:16,18; 8:51; 1 Joh 3:14Ncobeni ndamwaambila kasimpe, Oyo uumvwa ijwi lyangu, akumusyoma uwakandituma, uli abuumi ubutamani, alimwi takooyoosika kulubeteko, pele wakazwa kukufwa, waya kubuumi. 25#Mt 8:22; Ef 2:5,6Ncobeni ndamwaambila kasimpe, Ciindi cilasika, ncencico cino, abafwide nobayoomvwa ijwi lya-Mwana a-Leza, abalo abalimvwa bayoopona. 26#Joh 1:1-4Nkaambo mbubonya Taata mbwajisi buumi mulinguwe mwini, awalo Mwana wakamupa mbubonya, kuti abe abuumi mulinguwe mwini. 27#Dan 7:10,14; Joh 5:22Alimwi wakamupa bwami bwakubeteka, nkaambo ngonguwe Mwana a-Muntu. 28Mutagambwi aliyeeyi nkani, nkaambo ciindi ciyoosika ncobati kamvwe ijwi lyakwe boonse abali muzyuumbwe, 29#Dan 12:2; Joh 6:40; Mt 16:27bayoozwa mpoonya, abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.
30 #
Joh 5:19; 6:38 Nsikonzya kucita cintu ndemwini, mbuli mbwemvwa kuli-Leza, ndabeteka mbubonya, alimwi kubeteka kwangu nkwakululamika, Nkaambo nsiyandauli luyando lwangu, pele luyando lwayooyo uwakandituma. 31#Joh 8:14Kuti ndalilungulula ndemwini, bukamboni bwangu tabuli bwakasimpe. 32#Joh 5:36,37; 1 Joh 5:9Ngumbi uundidumaizya, eno ndilizi kuti kudumaizya nkwandidumaizya ako nkwakasimpe. 33#Joh 1:19-27; 3:27-30Mwakatuma kuli-Johane, awalo wakaba kamboni wabwini. 34Pele bukamboni mbwendatambula tabuli bwabantu, nokubaboobo ndaamba ezi zintu kuti mukafutulwe. 35#Lk 1:17Walo cali cimunisyo icali kuyaka akumweka, anywebo mwali kuyanda kubotelwa mumumuni wakwe kaindi kaniini. 36#1 Joh 5:9; Joh 1:33; 3:2Pele bukamboni mbwenjisi mbupati kwiinda bwa-Johane, nkaambo milimo njaakandipa Taata kwiizyulizya, njenjiyo njencita, niiindilungulula kuti Taata ngowakandituma. 37#Mt 3:17; Mk 1:11; Lk 3:22; Dt 4:12Awalo Taata uwakandituma wandilungulula. Nywebo tamumvwide ijwi lyakwe neciba ciindi comwe, nokuba kubona ciimo cakwe. 38Alimwi tamujisi ijwi lyakwe ilikede mulindinywe, nkaambo tamumusyomi oyo ngwaakatuma. 39#Lk 24:27,44; 2 Tim 3:15-17; 1 Pet 1:11Mulalangisya Magwalo nkaambo mweezeezya kuti mulijisi buumi ubutamani mulingao, ngangao aandilungulula. 40Pele mwakaka kuza kulindime kuti mube abuumi. 41Nsitambuli bulemu ubuzwa kubantu. 42Pele ndilimuzi, kuti tamujisi luyando lwa-Leza mulindinywe. 43#Mt 24:5Ndaboola muzina lya-Taata, pele tamunditambuli; kuti umbi wasika muzina lyakwe mwini, ngomuti tambule walo. 44#Joh 12:43; Mt 23:5-7Ino inga nywebo mulasyoma buti, nomutambulana bulemu umwi kuluumwi, pele bulemu ubuzwa kuli-Leza alike tamubuyandauli? 45#Dt 31:26Muteezeezyi kuti ndiyoomupa kaambo kuli-Taata, mpali uumupa kaambo, ngu-Musa, nguwenya ngomusyoma. 46#Matl 3:15; 49:10; Dt 18:15Nkaambo nemwalizumide Musa, nemwandizumina amebo, nkaambo wakalemba ndime. 47#Joh 7:19; Lk 16:31Pele mwatazumina makani ayo ngaakalemba, mulazumina buti majwi aangu?
Currently Selected:
Johane 5: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.