Mt 2
2
Li Jesus kulloq'oniiq xb'aaneb' laj q'e
1Li Jesus kiyo'laak aran Belén sa' xteepal Judea, naq laj Herodes wan chaq chi awab'ejil. Sa'eb' li kutan a'an wankeb' aj q'e#2,1 Aniheb' a'an? Jarub'eb'? Aniheb' xk'ab'a'? Li Santil Hu maak'a' naxye chirix a'in. Ka'ajwi' naxk'ut chiqu naq li Jesus kiloq'oniik ru xb'aaneb' xninqal ru winq li ke'chalk toj najt. A'aneb' reetalil chixjunileb' li tenamit b'oqb'ileb' chi xloq'oninkil ru li Qaawa' Jesus. ke'chalk chaq sa' releb'l saq'e, kole'okaq Jerusalén 2ut ke'xpatz':
—B'ar wank li x'awab'ejeb' laj Judiiy xyo'laak? Xb'aan naq xqil chaq li xchahimal toj sa' releb'l saq'e ut xoochalk chi xloq'oninkil.
3Naq kirab'i a'in li awab'ej Herodes, ki'ok xk'a'uxl; jo'kaneb' ajwi' chixjunileb' laj Jerusalén. 4Toja' naq laj Herodes kixch'utub' chixjunileb' li xb'eenil aj tij ut eb' laj tz'iib' re li tenamit, ut kixpatz'i reheb' b'ar taayo'laaq li Kriist. 5Ut eb' a'an ke'xye re:
—Aran Belén, sa' xteepal Judea, xb'aan naq jo'kan tz'iib'anb'il chaq xb'aan li propeet:
6«Ut laa'at Belén, xch'och'el laj Judá,
moko jwal kach'inat ta
sa' xyanqeb' li xninqal xteepaleb' laj Judá,
xb'aan naq aawik'in taa'elq jun aj k'amol b'e
li taab'eresinq re lintenamit Israel».#2,6 Mi 5,2.
7Toja' naq laj Herodes kixb'oqeb' laj q'e chi muqmu ut kirab'i rik'ineb' jo'q'e tz'aqal xk'utunk li chahim. 8Kixtaqlaheb' Belén ut kixye:
—Ayuqex, tz'ilomaq chaq rix chi us li k'uula'al ut, naq teetaw, tuleeye resil we re naq tinxik ajwi' laa'in ut tinloq'on chaq ru.
9Naq eb' a'an ke'rab'i li kixye li awab'ej, koheb'. Toja' naq li chahim li ke'ril chaq sa' releb'l saq'e yo chi xik k'amol b'e chiruheb', toj reetal koxxaqliiq sa' xb'een li na'ajej wan wi' li k'uula'al. 10Naq ke'ril li chahim, k'ajo' naq ke'saho'k sa' xch'ool! 11Koxe'okaq sa' li kab'l ut ke'ril li k'uula'al wank rik'in lix María li na'b'ej; ke'xwiq'ib' rib' ut ke'xloq'oni ru; ke'xte li xk'uuleb'aaleb' ut ke'xyeechi'i xmaatan: oor, pom ut miir. 12Chirix a'an kik'utb'esiik chiruheb' sa' xmatk'eb' naq ink'a' te'sutq'iiq rik'in laj Herodes; jo'kan naq ke'q'ajk sa' xtenamiteb' ut jalan chik b'e ke'xk'am.
Koheb' aran Ejiipt. Li xkamsinkileb' li k'uula'al
13Tojo'aq relikeb' laj q'e naq li x'angel li Qaawa' kixk'ut rib' chiru laj José sa' xmatk' ut kixye re: “Waklin, k'am li k'uula'al rochb'een li xna', elelin ut ayu Ejiipt. Aran wanqat chaq toj laa'in toxinyehoq chaq aawe, xb'aan naq laj Herodes ok re xsik'b'al li k'uula'al re xkamsinkil”.
14Naq kiwakliik laj José, kixk'am li k'uula'al rochb'een li xna' ut sa' ajwi' li q'oqyink a'an koho Ejiipt; 15ut aran kiwank chaq toj reetal kikamk laj Herodes. Chi jo'kan kitz'aqlok ru li xyehom li Qaawa' chi xtz'uumal re li propeet: “Ejiipt kinb'oq chaq li walal”.#2,15 Os 11,1.
16Naq laj Herodes kixk'e reetal naq kib'alaq'iik xb'aaneb' laj q'e, k'ajo' naq kichalk xjosq'il, ut kixtaqla xkamsinkil chixjunileb' li k'uula'al li toj maji'eb' aj wiib' chihab', eb' li wankatqeb' Belén ut sa' li xsutam, jo' chanru kixtz'il rix rik'ineb' laj q'e. 17Toja' naq kitz'aqlok ru li xyehom li propeet Jeremías:
18“Ki'ab'iik jun xyaab' kuxej aran Ramá,
yaab'ak ut tz'uyink chi numtajenaq:
a' lix Rakel li yo chi yaab'ak chirixeb' li xkok'al,
ut ink'a' naraj q'unb'esiik
xb'aan naq maak'a'eb' chik”.#2,18 Jr 31,15.
Xsutq'ijikeb' aran Nazaret
19Naq kikamk laj Herodes, li x'ánjel li Qaawa' kixk'ut rib' chiru laj José sa' xmatk' aran Ejiipt 20ut kixye re: “Waklin, k'am li k'uula'al rochb'een li xna' ut ayu Israel, xb'aan naq kamenaqeb' chik li xe'raj raj xkamsinkil li k'uula'al”.
21Kiwakliik laj José, kixk'am li k'uula'al rochb'een li xna' ut kox'okaq sa' xch'och'eb' laj Israel. 22Ab'an naq kirab'i naq laj Arkelao wank chi awab'ejil Judea cho'q reeqaj laj Herodes li xyuwa', kixiwak chi xik aran. Ut naq kik'utb'esiik chiru sa' xmatk', koho sa' xteepal Galilea. 23Ut koxkanaaq sa' jun li tenamit Nazaret xk'ab'a', re naq chitz'aqloq ru li xyehomeb' li propeet naq aj Nazaret tixk'ab'a'in.
Currently Selected:
Mt 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.