Luke 24
24
Jesus‑em Unguvaghteslegha Tuqulleghmeng
1Sivulighmi aghneghani santillghem, unaangupiglluku, taakut aghnat lliveghtekat kelqelluki yataaghqegkateng neqnighsaasit. 2Lliveghmun kaasalghiimeng uyghagllak paaynganeng ullghitaghngaftuq. 3Iteghaasalghiimeng aviiteftuq yugusii Atanghem Jesus‑em. 4Kukriqutkumaluku samatanga, yugek aliighaghtekak saaghwitgun, aatkiik nighugllagek. 5Aghnat alingruughutkat repall gginateng seketestekiit nunamun, yugek aaptekiit, “Sangan ivaghitsi unguvalghiimeng akulngitni tuqukat? 6Whaanneghituq; unguvaghsimaaq tuqulleghmeng. Amenqun salin Galilee‑melluni ungipaatkaqegkangisi, 7‘Ighnegha Yugem tuunepestaaghyaghqaqaat seghleghqestenun qaquuriisqelluku, taagken pingayaani aghneghem unguvaghllequq tuqulleghmeng.’”
8Taagken aghnat neqanguqiit Jesus‑em akuzitangi. 9Lliveghmeng uteghnighluteng tamaana qamaglluku aapqaat qula ataasiq siipneqluku apostle‑enun, ilangitnunllu maligsaaghtengitnun. 10Taakut lliveghtekat Mary Magdala‑ghmiinkut, Joanna‑nkut, Mary‑llu naanga James‑em, ilangillu aghnat. Ungipaatkiit apostle‑et tamaaken pilleghneng, 11iwernga apostle‑et sumeghmeggni temngi piniluki pikiit enkaam ugpequmangilkangit. 12Naqamenraq Peter nekevluni lliveghmun ketanqukaq. Kaasami lliveghmun qineghtekaq, esghaqii qiipagharaaghinaat linen‑et lliluteng. Taagken aglaqaq sumeghtaghaatkumaan Jesus samatanga.
Tumet Emmaus‑mun Ayuqelghiit
13Tawani ataasimi aghneghmi, maalghuk maligsaaghtekek aghulaqegkak nengiighhaghmun aatgha Emmaus, Jerusalem‑emeng entaqun maaghraghvinlek miles‑ngulghii. 14Akuzitkegkaak qamaglluku tamaana tawaten pilleq. 15Akuzitkumaluku tamaana pilleq, Jesus‑em kaallukek igleghalghusiqakek. 16Iwernga nallukegkaak kinangutanga qayughllak Kiyaghneghem liisuqesneghilkanga. 17Jesus‑em aaptekakek, “Igleghutkelluku sangwaa akuzitkaqestegnegu?” Aghuliiqak, esghaqaalutek qivghungaghllagek. 18Taagken aallghan, Cleopas‑meng atelgem aaptekaa, “Ellnginaaziin laalightaq Jerusalem‑emun nallukilghii tamaaken apeghiiqaneng akugwaaq?”
19Aaptekakek, “Sangwaa saa?” Kiimsiqaak. “Jesus Nazareth‑eghmii akuzimghhutkaqaghpung. Uuknaliqistenguyaghtuq, qepghallghillu apeghtughillghillu aghtughyaghqaanghisaghtut Kiyaghneghmillu yugnillu. 20Chief priest‑emtallu igleghutistemtallu tuunegkaqaat Rome‑em governor‑nganun tuqutesqelluku, enkaam qaquuraghtestekaqaa. 21Sighimaknguyaghaghput ellnganun itemunnaqniluku Israel. Taam saaghwakun, una aghneq pingayiitkaa taagken tawaten pilleghmeng. 22Ilangita aghnamta saghiighayugsimiinkut. Aghtaghaghaqaallu lliveghlluteng 23aviilngaamakangat Jesus‑em yugusii. Tagiluteng aapghaat yaqulgegneng esghaghwaalleghteng, yaqulgek ungipaasimakangik aghnat unguvaamaniluku. 24Taagken ilaput lliveghlluteng aapghaat tawatengngwaaq aghnat apellghistun, iwernga esghallghitaat Jesus.”
25Taagken Jesus‑em pikakek, “Nallughhaghmeng yugegni! Piyaqnaghhaghmeng ugpeqinaqelleghtek uuknaliqistet akuzitkegkiitneng. 26Pikaagut Christ‑a ikfiqepestaaghluni tuqulleqniluku iteghvagilgami nighughqelleghminun.” 27Enkaam Jesus‑em piinliisiqluki igaquqiit Moses‑enkut, qamagllutengllu uuknaliqistet, liigikestekakek Akuzitneng Igaqegkaneng ellmineng ayuqelghiineng.
28Kaasaghtuqat Emmaus‑mun, Jesus nagneghsugnighqegkaq. 29Iwernga ighlekluku pikaak, “Whangkutegniten, whanikunaqaa mamleggnaqegkanga.” Enkaam elkegnitkaq. 30Tipelegni aqumelgusighlukek, neqekrangllaq tuguluku iqamsiqayugvikluku Kiyaghneq, ikutaqlukek tuunegkakek. 31Taagken Kiyaghneghem liisuqestekaak Jesus‑ngutanga, esghaamanghegkenengllu aviitqaghtekaq. 32Ellmetegneng pikak, “Qaamggunqun quyaghllagtukung aleghqughaqngamikung tumemi, liigikestaqngamikung Akuzitneng Igaqegkaneng!”
33Tawaninginaq yugek nekevlutek uteghniqak Jerusalem‑emun. Tawani qerngughutngaftut qula ataasiq siipneqluku maligsaaghtet, tamaakutlu ellngitnilnguut. 34Kaasayek taakut ungipaatkagket maligsaaghtek, “Ataneq unguvapestaaghumaaq tuqulleghmeng! Aliighvikumaallu Simon!”
35Taagken yugek aapqaak tumemellutek sangwaa sakaatanga, natenllu liisuqelleghtek Ataneq neqekrangllaq aavgughaqngagu.
Jesus‑em Aliighvikegkangi Maligsaaghteni
36Yugek ungipamsukumaluku tawaten pilleq, Jesus ellnga katam nekevghaftuq akulngitni, pikii, “Nekeggmelleq elpesinilli!”
37Upughluteng alingruuqat, sumeghmeggni esghaanniluteng taghneghameng pikat. 38Iwernga Jesus‑em aaptekii, “Sangafsi alingruughetsi? Sangan aygughitiqetsi? 39Esghaqaghtekiqun iigenkallu itegankallu, whanganguunga. Saaflunga liisimakelleqaghpesinga, qayughllak taghneghak kemekragituklu neghqwaaghituklu, esghaghaghpesinga whanga pilguunga.”
40Tawaten piluki Jesus‑em kelguvikegkii iigminengllu itegaminengllu. 41Iwernga ugpeqngwaaghumangilkangat qayughllak quyaghllagulghiitlu saghiighayugllagulghiitlu. Enkaam aaptekii, “Whani sameng neghyaghqiitsii?” 42Tuunegkaat gaaqameng iqallugmeng, 43tuguluku neghegkaa esghaamanghitni.
44Taagken Jesus‑em pikii, “Elpesinitngulunga whaten ungipaatkaqamsi: Sangwaat qamaglluteng whangamneng ayuqelghiit igaqegkat apeghiighyaghqaagut, Moses‑em Liilightuusaanilnguut, uuknaliqistet igaqegkiitngilnguut, psalms‑enilnguutlu.”
45Taagken umyugiit liigikestekii Akuzitneng Igaqegkaneng. 46Pikii, “Whaten igaqegkaaguq: ‘Christ‑a ikfiqepestaaghyaghqaaguq, taagken pingayaani aghneghem unguvapestaaghyaghqaaguq tuqulleghmeng.’ 47Whatenllu igaqegkaalghii: ‘Maligsaaghtengi ungipaqillequt Aatghakun, piinlighluteng Jerusalem‑emeng taagken tamaghhaanun ramkenun. Ungipaasaghqaqiit avuteghqelluki seghleghqennaniisqelluki Kiyaghneghmun seghevutesqelluki.’ 48Elpesi liisimakistenguusi ikfiqellemnun, tuqullemnun, unguvaghtestellemnun. 49Enkaam taawa kayaglleqagka Atama akequsakek elpesinun. Iwernga utaqiilghaasi maani Jerusalem‑emi, kenlanga aatesfikelleghpesinun aghtughyaghqaanghilleghmeng qilagmeng pamaken.”
Jesus‑em Qilagmun Mayullgha
50Taagken aghulaqutkii uyavantulangatun Bethany‑m, tawani iiggeni nengugulluki quyastekii. 51Quyasimaluki unitkii, Kiyaghneghem qilagmun mayuutestekaa. 52Tawani manigughluku uteghniqat Jerusalem‑emun quyallelighllagluteng, 53enkaam iiwleng Temple‑metaqelghiit Kiyaghneq usuqaqegkangat.
Currently Selected:
Luke 24: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.