Luke 23
23
Jesus Sivungani Pilate‑em
1Taagken qamaglluteng taakut agghistet nekevuulluteng Jesus aglaatkaat Pilate‑m sivunganun. 2Pilate pikaat, “Liitaghput uum yugem seghletun igleghutaqeftii yuput. Tax‑meng llivikisnanighaqeftii Caesar‑mun, ellminengllu piiquq Christ‑anguniluni, umiilek.”
3Pilate‑em aaptekaa, “Umiilkataan Jews‑et?”
Jesus‑em kiimsiqaa, “Elpek taananguniighpenga.”
4Taagken Pilate‑em pikii chief priest‑etlu yulghuteghllagetlu, “Una yuuk anaggutellghituq.”
5Iwernga wata sagiqutkaat, “Tamaghhaani Judea‑mi apeghtughilleghmikun seghleliighutesteghllagaqii yuget. Piinlighluni Galilee‑mi, whaa maavek kaatuq.”
Jesus Sivungani Herod‑em
6Pilate‑em nagalluki aaptekii, “Una yuuk Galilee‑ghmiingwaa?” 7Liisamigu Jesus, Herod‑em igleghutkaaneng pingutanga, aglaatestekaa Herod‑mun. Ellngallu Jerusalem‑ememelnguq tamaani pilleghni. 8Herod‑em esghaghyamigu Jesus, quyaghllakaq. Esghaghyupigtaqegkanga qayughllak nagaqughaqegkanga, sighimakegkaallu allaaghlluwhaghtisqelluku. 9Enkaam aapqughaaghtaakaa, iwernga Jesus‑em kiimsiimangilkanga. 10Chief priest‑etlu, apeghtughikayugetlu Liilightuusaneng esnevaghluteng ugumiyupiglluteng Jesus anagguteghllagumaniluku pikaat. 11Herod‑enkut pilluwaghtekullghiit asistaaqaat legasiighwaatkumaan. Taagken aateslukek akitupiglleghhiik atkuyaaghek, uutghutestekaat Pilate‑mun. 12Tawani aghneghmi Herod‑enkuk Pilate‑enkuk ilaliighutkak; sivunghani anguyakusalghiik.
Pilate‑em Tuqusaghqaaghtestekanga Jesus
13Taagken Pilate‑em qerngughtestekii chief priest‑et, igleghutistet, yugetlu. 14Pikii, “Whangamnun tagitaghsi una yuuk qayughllak seghletun igleghutingunikesi yugnun. Sivugpesini aapqughaaghyaqegka anaggunnilleghpesineng, taawa liigikaqa anaggutellghiteftuq. 15Talwa Herod‑em anaggunnillghitaa enkaam uutghutestaa whangkunnun. Taawa una yuuk avangituq tuqusaghqaaluni. 16Enkaangam aghyuughmigtaasluku itemutesleqaqa.”
17 Ayumiqulleq tamaghhaan Passover‑mi, piiqelleghmegestun Pilate‑em itemutesaghqaqegkanga ataasiq anusimingllaghaq yugnun. 18Iwernga qamaglluteng yulghuteghllaget akilghuutkat, “Tuqutestigu! Barabbas itemutestigu whangkunnun!” 19(Barabbas anusimingllaqaqegkangat qayughllak ilatngakaalghii seghleliighqiighllak piiqngan Jerusalem‑emi, yugtalleghmunllu.)
20Allameng Pilate‑em pikii itemutesugniluku Jesus. 21Iwernga yuget akilghuukat, “Qaquuraghtestigu, qaquuraghtestigu!”
22Pingayiitkun Pilate‑em pikii, “Sangan, sameng anaggutkaawa? Aapqughaaghluku liigiksaqegka anaggutellghiteftuq tuqusaghqaaluni. Enkaangam aghyuughmigtaasluku itemutesnaqaqa.”
23Iwernga araghaatallghat iglagtughtengnginaqaq Jesus qaquuriisqelluku. Qenwat araghaatallghat aaghtikaq. 24Enkaam Pilate‑em itagnaqegkaa yuget piyukellghat. 25Taagken Pilate‑m aanestekaa Barabbas yuget piyukellghistun. (Anusimingllaqaqegkangat seghleliighqiilleghmunllu yugtalleghmunllu.) Enkaam Jesus pegtekaa yugnun piyukellghistun pisqelluku.
Jesus Qaquuraqangat
26Taagken Rome‑em pilluwaghtengita Jesus aanutkaat. Igleghsimaluteng nallaqaat yuuk, aatgha Simon, Cyrene‑eghmii, tagingulghii Jerusalem‑emun taagegken nunameng. Pilluwaghtet akuqaghluku, Jesus‑em qaquuraa iisqaghmigtesluku maligtestekaat kingunganeng.
27Yulghuteghllaget maligtekaat Jesus, ilangita aghnat uupteghllagumaghmeng qiyakegkaat. 28Iwernga Jesus‑em qiivluki pikii, “Aghniitni Jerusalem‑em! Qiyakegpenanga, iwernga qiyakitek elpesineng, avaqutaghpesinunllu. 29Qayughllak aghneghet uka taginguut yuget pillequt, ‘Quyastekaagut aghnat qumingigalnguut, taghnughhangigalnguut, mamaghtingigalnguut!’ 30Taagken naayghat pilleqiit,
‘Ulleghvikikut!’ qemitlu pilleqiit, ‘Saapikut!’
31Yuget tawaten pikumeng uqfik sungaghyuguluku, sangwaa salleqa kiinqan?”
32Tamaanteftuk maalghuk yugek liilightuusameng naafqiikak. Ilangita pilluwaghtet aanutkagket tuqunnalukek maligullukek Jesus‑mun. 33Kaasameng tawavek atilqelghiimun, “Yugem Naasqwa,” tawani qaquuraqaat. Taakuklu yugek liilightuusameng naafqiikak qaquuraqagket, ataasiq aghenqigneghakun, ilanga saghumigneghakun. 34Jesus pikaq, “Ataay, seghevutiki, qayughllak naallukut saaqutseng.”
Pilluwaghtet ateghtiiraaghutkelluki aatkii nengiitkiit. 35Nekevgaghmeng yuget esghapakat. Tawani igleghutistet legasiighwaatkegkaat Jesus whaten, “Yuguliiqii ilangi; yeqay ellmineng yugulili Christ‑angukumi, Kiyaghneghem Nakmikegkaa!”
36Pilluwaghtetlu legasiighwaatkegkaat. Tagitkaat quwaalghiimeng wine‑meng, 37pikaat, “Umiilkengngukangaten Jews‑et, elpeneng katam yuguli!” 38Naasqwan quulngakun nekegtekaat whaten igaqngalghii, “Una Umiilkaat Jews‑et.”
39Liilightuusameng naafqiistem aallghan qaquuralgutangan legasiighwaatkegkaa, pikaa, “Christ‑anguziin? Elpeneng yuguli, whangkutungllu!”
40Iwernga ilangan aghyuughmikaa, “Alikenghisiguu Kiyaghneq? Qerngaamta pingayuni taagken ataasimeng aghyuullengukut. 41Naqamenraq whangkutung elqughullutung aghyuullengukung, iwernga una yuuk sameng anaggusimangituq.” 42Taagken Jesus pikaa, “Jesus, neqamiknakevnga Umiilguluten tagikuvek!”
43Jesus‑em pikaa, “Ipa ungipaatamken, aghneghmi whani whangamnillequten Paradise‑mi.”
Jesus‑em Tuqullgha
44-45Aghneghem qukaghaqaallu siqineq kuukgunaniqaq enkaam nuna qamaglluni mamleghqwaaghllakaq kenlanga three‑kellaagmun. Safkaaghunllu Temple‑melnguq piikaq malghughqelluni. 46Taagken Jesus iglagtupiglluni pikaq, “Ataay, taghneghagka aflengakelleghqaghpenun pegtagka!” Tawaten piluni tuqukaq.
47Pilluwaghtet umiilwaaghita esghapagluku tawaten pilleq, Kiyaghneq usuqegkaa, “Ipapestaaq una yuuk pinilghiinguuq!”
48Yulghuteghllaget qerngughutkat esghapagnaluteng, esghapagluki tawaten pillghet nemeggnun aglaghtuutkat sakimateng tenglugmigumiita. 49Qamaglluteng liisimakistengita Jesus‑em, aghnatlu ellnganun maligutkat Galilee‑meng, uyavaqaanlluteng nekevghaghmeng esghapakiit tawaten pillghet.
Jesus Lliifqangat
50-51Tamaanteftuq yuuk aatgha Joseph, Arimathea‑meng pinguftuq Judea‑melngughmeng. Yuuk pinilghii, malighqutaqngalghii Liilightuusanun, utaqiingulghiillu Ataneghpagullghanun Kiyaghneghem. Qaywa ilatngaghngaaghmi Agghistenun, itagnaqumangilkangi agghillghit, apeghiiqiitlu Jesus‑mun. 52Taam yugem Pilate‑mun tungsighyaghtuqaa Jesus‑em yugusii. 53Taagken yugusii qaquurameng iikluku ukigtekaa. Iimgulluku qiipaghaghqun linen‑kun, lliifqaa laawaaqakun uyghaghrughllagkun. Taana lliveq atuqumangilnguq. 54-56Aghnat Jesus‑mun maligutkat Galilee‑meng, lliveghmun maligtekaat Joseph. Tawani esghapakaat naten yugusii llikaatanga. Taagken uteghnighluteng yataaghqegkiit neqnighsaasitlu tepengllaasitlu angighhunnaluki Jesus‑em yugusiinun. Aghneqegkanga yataaghqutilleghqam Sabbath‑mun, whaa Sabbath piinlighnaqelghii. Enkaam aghnat meghnaalikat Liilightuusat qelellghistun.
Currently Selected:
Luke 23: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.