लूका 1
1
ओजरानी उतुपाङ पै तहकैसिउ
1प़ाइँए गेखार्लाव ताव भरी कुधुए कागतत चरैःन्या उदिम दाद नैर। 2नोराए यासरो भरी ङ़ादाकिन ज़ येसुस लिद ओय़ेन रँःवर ओपाँ सथैज़्यावराए ल्योनी ज़ सर्द नैर। 3गेङ़ैताव थियोफिलस, ङा ब ङ़ादाकिन ज़ बनै चावस तहकैद प़ाइँ पाँ भरी खिम्द ङानै, स़ोनो नजूँनी तोबो ओमेलास ताव पाँ सर्न्या युँ ङादोके। 4हो ताकिन नँलाई है दासिउ पाँर साचो ज़ ओल्यो लिन्या सैंन्या नले।
जकरिया स़ोनो एलीसिबानी
5यहूदियालाव राजा हेरोदए ओपालाक अबिया थरलाव तोबो पुजारी जकरिया यादोज़्याव उलिज़्याव। नोए ओज्या ब हारून पुजारीए ओखलकलाव ज़, उमिन एलीसिबा ओल्यो।#१ इति २४:१० 6नोनी ज्या-री ज़ परमेस्वरए ओङ़ाक धर्मलाव य़ेन दाद निजुनी निझाःज़्याव, परमेस्वरए ओकानुन ब माबिरैद ज़ निदोज़्याव। 7खाली एलीसिबा जर्मननी ज़ थारी ओल्योए नोनी निज़ार तोबो ब यामालिज़्याव। नोनी ऩेब्लो ज़ निबेला बाद सेर्द जूचास्द निलिज़्याव।
परमेस्वरए ओचाकर्या यूहन्नाए उजूँनी ओपाँव
8तछा जकरिया परमेस्वरए ओङ़ाक पुजारी य़ेन ओदोज़्याव। हो साता भरिल ध्यान झ़िमलाव सेवा दान्या नोए ओखलकराए यापाला ओल्यो। 9पुजारीराए याचलन मिताव परमेस्वरए ओध्यान झ़िमल धुप झाःन्याए जूँनी गोला याझाःक जकरिया परिके। 10नो उजींल पसिद धुप ओझाःज़्याक उपुर्काव मिँ भरिए लाँःक पोंखारिउ ज़ यानैज़्याव। 11नल उलिज़्याक परमेस्वरए ओचाकर्यालाई धुप ओझाःज़्याव पोए ओवोर्दा च्याँःसिद उलिज़्याव रँःक्यो। 12नोलाई रँःद जकरियाए उयुँ स्यासे सतेद बनै छे·के। 13नाःत ज़ परमेस्वरए ओचाकर्याए, “नँ ताछे·नी जकरिया, नपोंखारिज़्याव परमेस्वरए थैक्यो। है जैद नज्या एलीसिबाए ज़ा तोबो दैरिज़्याव। नँ नोए उमिन यूहन्ना नैदियो। 14नो उजर्मिक नयुँ बनै होलाँ ताद रेंन्या नले। छुतर ब रेंन्या लेर, 15काराव ल्यो ताकिन नो परमेस्वरए ओङ़ाक घेप्पा मिँ थ॰रिन्या ले। नोए ज़िम्ज़ाकिन ज़ मद छोकोरा जात्त ज़ ओन्या माले। नो ओआमाए उफूल ज़ छैंव पुरूस दैरिज़्याव।#गन्ती ६:३ 16नोए इस्राएलीरालाई याप्रभु परमेस्वरए ल्योदा कुधुलाई ज़ यायुँ फर्कैद याएरिज़्याव। 17नोए एलियाए ओसक्ती ओगेर रैद हुरिज़्याव ख्रीसए ओङ़ादा बाद होए उजूँनी मिँरालाई तयार याजैरिज़्याव। बाबुरालाई याज़ारास यासखैरिज़्याव, पापीरालाई ब धर्मलाव येमल याझाःरिज़्याव,”#मला ४:५-६ है दोक्यो।
18हाःत ज़ जकरियाए परमेस्वरए ओचाकर्यालाई, “आव भरी ङा कै जैद पतिन्या? ङा ङासेरधुके, ङाज्या ब जूचास्धुके,” है ओदोक ते, 19परमेस्वरए ओचाकर्याए, “ङा एकतार परमेस्वरए ओङ़ाकाव च्याँःसिज़्याव गब्रिएल ज़। नल्योदा आव चाव था सथैना परींद नैनाव।#दान ८:१६; ९:२१ 20ङालाई नमापतिनाव प़ाइँना आव है ङादींव य़ाका भरी ओमातावा पै नँ लाता ताद मापाँधुन्या तान्या नले। ङा है ङादींव पाँ थिक हो बेलाक ज़ यो·न्या ले,” है दोक्यो।
21हाः बेलाक नो लाँःकाव लिज़्यावराए ‘काता ओदोव?’ लिद जकरियालाई कींद यानैज़्याव। 22बल्ल बल्लङ नोराए ल्योङ पुलुस्द नोरास काता ज़ मापाँधुद उकुइए सान दाद ओरायोए नोराए, “आवए ते ध्यान झ़िमल परमेस्वरए ओदर्सन ओदैव ची ओल्यो,” है लिकेर।
23जकरिया ध्यान झ़िमलाव सेवा दान्या ओपाला ओयो·वत उझ़िमदा बाके। 24नाःकिन ज़ ओज्या एलीसिबा ज़ा दैन्या ताद पाँच मैना भरी आदा होदा माबाद उझ़िमल ज़ लिद, 25“मिँराए ङालाई अइज़ फ्या·के है यादाँदी ब परमेस्वरए ङालाई उयुँ नाद ज़ा दैन्या जैनाक्यो,” है उलिज़्याव।
परमेस्वरए ओचाकर्या येसुए उजूँनी ओपाँव
26एलीसिबा छ मैना ओतावत परमेस्वरए फरी ओचाकर्या गब्रिएललाई ज़ गालील खन्दलाव नासरत सहरल 27तोबो कन्या ल़ुज़ाए ल्योक परींक्यो। नो ल़ुज़ालाई भर्ज़ा दाऊदए ओथोलाव योसेफ यादोज़्यावत ऩिद यानैज़्याव। नोए उमिन मरियम ओल्यो।
28परमेस्वरए ओचाकर्या ओल्योक बाद, “जेरो प़ाइँरानी असिक दैव मेंमा, परमेस्वर नँस ज़ लिज़्या,” है ओदोक ते, 29‘आव काता ओपाँव ओताव?’ लिद उयुँ काता माँःती जैक्यो। 30नो चाकर्याए फरी, “ताछे·नी मरियम, परमेस्वरए उयुँ नल्योदा गराँद ले। 31नँ गर्बवती ताद खेपा ज़ा तोबो नदैरिज़्या। नोए उमिन येसु नैदियो। 32नो बनै घ्योःव मिँ ताद माहान परमेस्वरए ओज़ा ज़ लिद थ·रैरिज़्यार। नोलाई परमेस्वरए, ओल उपुर्खा दाऊदए ओराज्या चलैन्या जैरिज़्याव। 33है जैद याकूबए ओथोलावराए याङ़ैताव ज़ ताद नोए ओराज्या खर्क ज़ खेम्न्या माले,”#२ समू ७:१२-१३,१६; यसै ९:७ है दोक्यो।
34हाःत ज़ मरियमए, “आव भरी कै जैद तान्या? ङा आःपै कन्या ज़ ङालिज़्या,” है ओदोक ते, 35नो चाकर्याए, “नँ नक्याँत परमेस्वरए छैंव उपुरूस हुद माहान परमेस्वरए ओसक्तीनी ज़ा नदैरिज़्या। है जैद नो छैंव पुरूसनिकाव भाउज़ालाई परमेस्वरए ओज़ा ज़ है दान्या लेर। 36अछादी नँ नक्याँदाङाव एलीसिबाए पाला जूचास्द ब ज़ा दैन्या ताद ले। नो खर्क ज़ ज़ा मादैव है यादोज़्याव एलीसिबाए उफूलाव ओज़ा छ मैना ताधुके। 37परमेस्वरए ओमादोधुव काता ज़ माले,”#उत १८:१४ है ओदोक ते, 38मरियमए, “ङा परमेस्वरए ओबाँदानी ज़। है नलिज़्याव मिताव ज़ ओताक,” है ओदोव प़ाइँना ज़ परमेस्वरए ओचाकर्या पुलुस्द बाके।
मरियम एलीसिबाए उझ़िमदा दैसिना ओबाव
39तछा छींनी मरियम झाःसिद लाला लुलु यहूदियालाव गोंल जकरियाए ओनाखारल बाके। 40जकरियाए उझ़िमल पसिद मरियमए एलीसिबालाई जेरो है ओदोज़्याव 41ओथैव प़ाइँना एलीसिबाए उफूलाव ओज़ा ज़ो·के। हाःत ज़ एलीसिबा छैंव पुरूसए ब्याल्द, 42बनै रेंद, “मेंमा भरिरानी नँ असिक दैव ज़ नलिज़्या। नफूलाव नज़ा ब असिक दैव ज़ तारिज़्या। 43काता ङालाई आः परमेस्वर दाइनो ओताव, ङाप्रभुए ओआमा ङाल्योक नहुव। 44नँ नयाःनी जेरो है नल्यो प़ाइँना ज़ ङाफूलाव ङाज़ा रेंद ज़ो·के। 45नँ परमेस्वरए है उलिज़्याव भरी सयो·द्यान्या ज़ ले लिद नयुँ हुबो मेंमा धन्याकाव नलिज़्या,” है लिद पाँके।
मरियमए ओपाँ
46मरियम नो भरी थैद है लिके,
“ङा ङाप्रभु परमेस्वरए उमिन बनै सघ्योःद ङाएज़्या।
47ङालाई बाँचैज़्याव परमेस्वरस बनै रेंद ज़ ङापाँज़्या।
48नोए ङा इताव ज़िम्ज़ा ओबाँदानीलाई मामेंःद ङाल्योदा उयुँ य़ाल्के।#१ समू १:११
ननी ज़ मिँराए ङालाई प़िरी प़िरी पै असिक दैव थ·रैनारिज़्यार।
49ङाजूँनी आःल्दिउ य़ेन दाद्याज़्याव माहान परमेस्वरए उमिन बनै छैंव लिज़्या।
50परमेस्वरलाई रँःद छे·ज़्यावरालाई ओल प़िरी प़िरी पै उयुँ नाज़्या।
51नोराए जूँनी उकुइए बनै सक्तीलाव य़ेन दाद्याव ज़ नैज़्याव।
यायुँल सघ्योःसिज़्यावरालाई ते चितराँ पुतराँ जैद यामिन सम़ैद याएज़्याव।
52घेप्पारालाई यासिंहासनतिन स़ेल्द नल ज़िम्ज़ारालाई याझाःज़्याव।#अयू ५:११; १२:१९
53करेज़्यावरालाई चाव चाव याद याकरे सैःद याएज़्याव।
साहुरालाई ते रितो ज़ याजैज़्याव।
54ओय़ाकार मामेंःद ओसेवा दोज़्याव इस्राएली उमींरालाई सघैव ज़ यानैज़्याव।
55है जैद अब्राहाम स़ोनो ओथोरालाई है ओरादोव मिताव#उत १७:७ याल्योदा एकम्न्या उयुँ गराँव ज़ लिज़्या।”#१ समू २:१-१०
56मरियम एलीसिबाए उझ़िमक ओल्यो स़ोंमैना ओतावत उझ़िमदा ओल्द बाके।
ऱील सछैंज़्याव यूहन्ना उजर्मिउ
57एलीसिबाए ज़ा दैन्या ओमास ओयो·वत खेपा ज़ा दैक्यो। 58‘परमेस्वरए उयुँ य़ाल्द अचम्बलाव य़ेन दोदिक्यो दी’ लिन्या थैद ओलापजीकावर स़ोनो ओक्याँदाङावर बनै रेंकेर। 59नो भाउज़ा उजर्मिउ आथ दिनत याचलन मिताव क्याल्न्या सरेस जैन्याए जूँनी प़ाइँ दुप्सिद उमिन ब ओबाबुए उमिन स्यासो ‘जकरिया’ नैद्याव पैंकेर।#लेबी १२:३ 60खाली ओआमाए भैंःद मायाद, “माःक, आवए उमिन यूहन्ना तारिज़्या,” है ओरादोक ते, 61नोराए, “नथोल इताव मिन ते माले सानी,” है दोकेर। 62फरी नोराए ओबाबु जकरियालाई सान दाद्याद, “नो नज़ाए उमिन काता नैद्याव नपैंज़्याव?” है यादोक ते, 63जकरियाए फल्या तोबो रैव परींद नत, ‘आवए उमिन यूहन्ना’ लिद सर्द याएक्यो। नोराए निताव रँःद प़ाइँ ज़ अचम्ब ताकेर। 64हो प़ाइँना ज़ जकरियाए ओसेर पलास्सिद पाँधुन्या ताद परमेस्वरलाई धन्या धन्या है ल्यो ज़ लिके। 65नो हुद लिज़्यावर नो भरी रँःद अचम्ब ताद छे·द नो पाँ भरी यहूदिया गों जीदा प़ाइँदा ज़ थास्के। 66‘नो भाउज़ा ओघ्योःक किताव तान्या ओताव?’ लिद थैज़्याव भरिए यायुँल है लिकेर। नोए ओक्याँत परमेस्वरए बास दाद ओनैज़्याव ओल्यो लिन्या थ·रैकेर।
जकरियाए ओपाँ
67ओबाबु जकरिया छैंव पुरूसए ब्याल्द अइ लिद पाँके,
68“इस्राएलीराए याप्रभु परमेस्वरए उमिन बनै ओघ्योःक।
गे उमींराए गेल्योक हुद बाँचैसिक्यो।
69ओनोकोर दाऊद राजाए ओथोल गेलाई जोगोइद बाँचैन्या तोबो झेंःस्या उथैद नैद्यासिउ।
70नोए उजूँनी परमेस्वरए भाःकिन ज़ छैंव उमीं अगमबक्ताराए यायाःनी पाँव ज़ उलिज़्याव।
71नोराए यापाँ आव ब लिज़्या — ‘गेसुतुरराए ल्योनी जोगोइद,
गेलाई सोज़्यावराए याकुइनी ब पाथस पले·न्या ले।’
72है जैद गेसाखा पुर्खाराए ल्योदा उयुँ गराँद,
नोरालाई ओरायो छैंव बाचालाई सयो·द्याव ज़ नैज़्याव।
73नो बाचा गेपुर्खा अब्राहामलाई तोबो किर्या झाःद —
74-75‘गेलाई गेसुतुरराए ल्योनी पले·न्या,
स़ोनो गेजिउ भरी ओलस लिद उयुँलाव मिताव छैंव य़ेन सुलाई रँःद ब माछे·द ज़ दान्या जैद नैद्यासिउ।’
76अब ते नँ ङाज़ा यूहन्ना, नँलाई माहान परमेस्वरए अगमबक्ता थ·रैनिरिज़्यार।#मला ३:१
नँ हुरिज़्याव प्रभुए ओङ़ा ओङ़ा बाद ओयेम बनैद्यान्या नले।
77स़ोनो परमेस्वरए उमीं इस्राएलीरालाई ‘जेपाप क्याल्द याचिरिज़्याव’ लिद अजम्बरी जुनील बान्या येम सतैंद्यान्या नले।
78गेल्योदा परमेस्वरए उयुँ ओगराँवनी स्वर्गताव झ़ार झ़ारो ज़गै ब गेल्योक ज़ हुरिज़्या।
79नो उहुवत सिन्या सजालाव चुम चुमोल लिज़्यावराए याक्याँत पलाँव जैद्याद#यसै ९:२ गेलाई मनी परमेस्वरए ल्योदा खैन्या येम सरैंःद्यासिरिज़्याव।”
80नो भाउज़ा यूहन्ना ओघ्योःनावत ओसक्ती ल्यो तानाके। इस्राएलीराए याङ़ाक ओमासतैंसिवा पै बनङ ज़ लिके।
Currently Selected:
लूका 1: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.