Jɔn 2
2
Kɛna tiŋ’ puuni amiliya lɔbu
1Dimbɔŋɔ nyaaŋa daba ata dali ka so daa ti niŋdi amiliya Galili tiŋgbɔŋ ni tiŋkpan’ shɛli din yuli booni Kɛna la. Yisa ma daa be amiliya maa ni. 2Ka bɛ daa boli Yisa min’ o nyaandoliba gba ni bɛ ka amiliya maa ni na. 3Ka amiliya yilinim’ maa wain daa ti pooi ba, ka Yisa ma yɛl’ o, “Bɛ lan ka wain din nyura.”
4Ka Yisa yɛl’ o, “M ma, ka wula ka a yɛl’ ni n niŋ? N saha na bi paai.” 5Ka o ma daa ŋmaligi yɛli yili maa ni bihi, “O yi ti yɛli ya ni yi niŋm’ shɛlikam, yin’ niŋmiya li”.
6Yɛhudianima adiini kali soli dolibu puuni kɔsins’ ayɔbu daa ʒe nimaani bɛ ni paɣibu zuɣu, ka di zaa zaɣ’ yiniyini daa naan tooi deei ko’ guŋgɔna ayɔbuyɔbu bee ayopɔinpɔin. 7Ka Yisa daa ti yɛli yili maa ni bihi maa, “Niŋmiya kom pali sinsi ŋɔ.” Ka bɛ daa niŋ kom pali di zaa ha nti paai di naŋgbanyɛra tarisi. 8Di saha ka o daa yɛli ba, “Pumpɔŋɔ toomiya li ti ti aŋgo zo.” Ka bɛ tooi li ti ti o. 9Ka aŋgo zo maa vooi ko’ shɛli din leei wain maa ka bi baŋ di ni yi shɛli na, amaa yili maa ni bihi bɛn daa tooi kom maa bɛn’ daa mi. Ka o daa boli aŋgo na 10ti yɛl’ o, “Amiliya lɔbu ni sokam daŋdila wain viɛlli tibu pɔi, ka niriba yi ti nyu n-tiɣi, di saha ka bɛ naanyi zaŋdi wain piti na, amaa nyin’ zaŋla wain nyaɣisili sɔɣi hal ni pɔŋɔ!” 11Dimbɔŋɔ n-nyɛ Yisa ni daa tuui wuhi shihir’ shɛli ka di wuhi o yiko ni nyɛ shɛm, ka o nyaandoliba daa niŋ o yɛda. Galili tiŋgbɔŋ ni tiŋkpan’ shɛli din yuli booni Kɛna la ka o daa wuhi shihirili maa. 12#Mat 4.13 Dimbɔŋɔ nyaaŋa ka o min’ o mabihi ni o ma ni o nyaandoliba daa chaŋ Kapɛrinium n-daa ti niŋ daba ayi nimaani.
Yisa Naawuni jɛmbu duu kpɛbu
(Matiu 21.12-13; Maak 11.15-17; Luk 19.45-46)
13 #
Yibu 12.1-27
Yɛhudianim’ Yaɣigari Chuɣu puhibu daa ti miri, ka Yisa daa chaŋ Jɛrusalɛm 14ti kpe Naawuni jɛmbu duu n-nya ka naɣikɔhiriba mini piɛkɔhiriba ni ŋmaŋkɔhiriba be di puuni m-pahi laɣitaɣiriba bɛn ʒi bɛ teebuya gbini. 15Ka o daa zaŋ gabiga m-pɔripɔri li n-zaŋ kari bɛ mini bɛ biŋkɔbiri maa zaa yihi Naawuni jɛmbu duu maa ni, ka daai laɣitaɣiriba la teebuya maa luhi n-kpahi bɛ liɣiri bahi. 16Ka daa yɛli ŋmaŋkɔhiriba la mi, “Zaŋmiya yi binyara yi! Di zaŋya m Ba duu leei daa!” 17#Yila 69.9 Ka o nyaandoliba daa teei di ni daa sab’ yɛli shɛm la yɛla. Di ni daa sab’ shɛm maa m-bɔŋɔ: “Yaa n Duuma Naawuni, n suhu zaa kul yɛla a jɛmbu duu zuɣu, ka di yɛla kul nyamdi n ni.”
18Di saha ka Yɛhudianim’ daa bɔh’ o, “Shihir’ bɔ ka a lee yɛn zaŋ wuhi ti ka di wuhi ni a mal’ soli ni a niŋ a ni niŋdi shɛm ŋɔ?” 19#Mat 26.61; 27.40; Maak 14.58; 15.29 Ka Yisa garigi yɛli ba, “Wurimmiya Naawuni jɛmbu duu ŋɔ, ka n lan labi me li zali daba ata sunsuuni.”
20Ka Yɛhudianim’ maa yɛl’ o, “Yuun’ pihinahinaayɔbu ka bɛ daa zaŋ me duu ŋɔ, ka nyin’ ti yɛli ni a ni labi me li zali daba ata sunsuuni?” 21Amaa o niŋgbuŋ din nyɛ Naawuni jɛmbu duu ŋmahinli la yɛla ka o daa yɛri maa.
22O ni daa ti neei kum ni la nyaaŋa ka o nyaandoliba teei ni o daa pun yɛli yɛlli ŋɔ zali; ka daa niŋ Naawuni Kundi mini Yisa ni daa yɛli yɛtɔɣ’ shɛŋa zaa yɛda.
Yisa mi ninsalinim’ zaa biɛhigu ni nyɛ shɛm
23Yisa ni daa be Jɛrusalɛm Yaɣigari Chuɣu puhibu saha maa, niriba pam daa niŋ o yɛda bɛ nini ni daa nya shihir’ shɛŋa o ni wuhi la zuɣu. 24Amaa Yisa daa bi saɣi bahi omaŋ’ ti ba, dama o daa mi din be ninsal’ kam suhu ni. 25Di daa bi lan kpa ni so wuh’ o ninsal’ biɛhigu ni nyɛ shɛm, dama omaŋmaŋ’ pun mi din be ninsalinim’ suhuri ni.
Currently Selected:
Jɔn 2: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011