JUAN 4
4
Te Jesus sok te samaria-antse
1Te fariseoetike la yaꞌiybeyik sluwar te bayalix machꞌa tsꞌaklibil yuꞌun te Jesuse y mas yipalix ta yakꞌel ichꞌjaꞌ ke te Juane. 2Pero ma jaꞌuk a yakꞌ ichꞌjaꞌ te Jesuse, jaꞌ a yakꞌ ichꞌjaꞌ te jnopojeletik yuꞌune. 3Kꞌalal la yaꞌi te Jesuse, lokꞌ bael ta estado yuꞌun Judea, y chaꞌ sujt bael ta estado yuꞌun Galilea.
4Te been bale, puersa kꞌax ta estado yuꞌun Samaria. 5Jicha kꞌot ta jun jtejklum Sicar sbiil te ay ta estado Samariae, te serka ay sok slum Jacob te yakꞌojbe jilel te Josee te xnichꞌane. 6Teꞌey a te posoe te spasoj Jacob. Te Jesuse ben lubenix yuꞌun beel a, y kꞌo snajkan sba te ba posoe. Nopolix ol kꞌaal a. 7-8Te jnopojeletik yuꞌune baemik ta jtejklum ta smanel tal tut ya sweꞌik. Ben te ora a tal ta lik-jaꞌ jtul samaria-ants. Te Jesuse la yalbe:
—Aꞌbon chꞌinuk awaꞌal —xyut.
9Te samaria-antse la yal:
—¿Tut yuꞌun te ya akꞌanbon jaꞌ ya awuchꞌe?, porke juriyoat y te joꞌone samariaon —xchi. Yuꞌun te juriyoetike ma spas ya sta sbaik ta kꞌop sok te samariaetike.
10Te Jesuse la sjakꞌbe:
—Te yauk anaꞌ te tut ya yakꞌ te Diose sok te yauk anaꞌbon jba, joꞌon te ya jkꞌanbeyat jaꞌe, jaꞌat me ya akꞌanbon jaꞌ te jichuke. Jich me ya kaꞌbeyat te kuxul jaꞌ stukele —xchi.
11Te antse la yalbe:
—Xiꞌlel, maꞌyuk tut ay awuꞌun yuꞌun ya alokꞌes tal a te jaꞌe, yuꞌun ben toyol te posoe. ¿Ba xba ata te kuxul jaꞌ te ya awaꞌbone? 12Te antibo jtatik Jacobe la yaꞌbotik jilel te poso to te liꞌ mismo la yuchꞌ jaꞌ euk te yuntikile sok te xchambalamike. ¿Meꞌn jaꞌat mas nailat yuꞌun? —xchi te antse.
13Te Jesuse la sjakꞌbe:
—Spisil te machꞌatik ya yuchꞌbeyik yaꞌlel te poso to ya xchaꞌtakej yoꞌtanik. 14Pero te machꞌa ya yuchꞌ te jaꞌ ya kakꞌ joꞌone, sbajtel kꞌinal ma xtakej yoꞌtan yuꞌun. Porke te jaꞌ ya kakꞌ joꞌone jich ya xkꞌot tutꞌil lokꞌi-jaꞌ ta yoꞌtan te ya xkuxuyin sbajtel kꞌinal yuꞌune —xchi te Jesuse.
15Te antse la yalbe:
—Xiꞌlel, aꞌbon te jaꞌ ya awale, yuꞌun makꞌ xtakejix koꞌtan a, y makꞌ xtalonix ta lik-jaꞌ a liꞌ ba posoe —xchi.
16Te Jesuse la yalbe:
—Baan, ban ikꞌa tal te amamlale y sujtan tal liye —xyut.
17Te antse la sjakꞌbe:
—Maꞌyuk jmamlal —xchi.
Te Jesuse la yalbe:
—Batsꞌi jich te tut ya awal te maꞌyuk amamlale, 18porke joꞌtulix winik a kꞌaxat a. Y te machꞌa awikꞌoj aba sok te ora to ma amamlaluk. Batsꞌi jich te tut la awale —xyut.
19La yalbe te antse:
—Xiꞌlel, la jnaꞌix te jꞌalwanejat yuꞌun te Diose. 20Te antibo jmeꞌ-jtatike sok te samariaetike la skejan sbaik ta stojol Dios liꞌ ba wits to. Pero te jaꞌex juriyoexe ya awalik te ta Jerusalen te ya skꞌan ya xba jkejan jbajtike —xchi.
21Te Jesuse la sjakꞌbe:
—Ants, chꞌuuna te tut ya kalbeyate: Ya me sta yorail te ma liyuk ba wits to ni ta Jerusalen te ya xba akejan abaik ta stojol te jTatik Diose. 22Te jaꞌexe ma xꞌanaꞌik te machꞌa ya akejan abaik ta stojole. Yan te joꞌotike ya jnaꞌtik te machꞌa ya jkejan jbajtik ta stojole, yuꞌun te kolele talemix te ba ay te juriyoetike. 23Pero ya sta yorail, y yorailix te ora to, te kꞌalal te machꞌa batsꞌi ya skejan sbaik ta stojol te jTatik Diose ya me snaꞌbeyik lek sluwaril ta skuenta te Chꞌul Espíritu yuꞌun te Diose. Yuꞌun te jTatik Dios ya skꞌan te jich ya spasik te ya skejan sbaik ta stojole. 24Espíritu te Diose y te machꞌatik ya skejan sbaik ta stojole, ya skꞌan ya spasik sok spisil yoꞌtanik, te tutꞌil ya skꞌan te Espíritu yuꞌun Diose —xchi.
25Te antse la yalbe:
—Ya jnaꞌ te ya xtal te jMesias te Cristo xchi ta alele, y te kꞌalal ya xtale ya me yalbotik spisil stukel —xchi.
26Te Jesuse la yalbe:
—Joꞌonix abi, te ya xꞌaꞌabiyanat soke —xchi.
27Ben te ora a kꞌot te jnopojeletik yuꞌune. Lom cham a yaꞌiyik yuꞌun te tutꞌil yipal sok ta aꞌbiyej te ants te Jesuse. Pero ni jtuluk machꞌa sjojkꞌobe te tut a te ya skꞌanbeye sok tut a te ya yaꞌbiyanike. 28Te antse la sjiles te skꞌibe y sujt bael te ba jtejklume. Ba yalbe te gentee:
29—Laꞌik, laꞌ ila awilik, ay jtul winik te la yalbon spisil te tut ma tsaꞌamuk jpasoje. Naꞌtik me ma jaꞌuk te Cristoe —xchi.
30Jich te genteetike lokꞌik tal te ba jtejklume, laj bajt te ba ay te Jesuse. 31Mientras baem tal ta jtejlum a te antse, te jnopojeletike la yalbeyik te Jesuse:
—Maestro, ¿me makꞌ xweꞌat chꞌinuk? —xyutik.
32Pero te Jesuse la yaltalanbe:
—Te joꞌone ay tut ya jweꞌ te ma xꞌanaꞌbeyik sluware —xchi.
33Te jnopojeletike lijk sjojkꞌobe sbaik:
—¿Meꞌn ay wan tut ichꞌbil tal yuꞌun ya sweꞌ? —xchiik.
34Pero te Jesuse la yaltalanbe:
—Te jweꞌele jaꞌ te ya jpasbe sboluntar te machꞌa la stikonon tale, y jaꞌ to teme juꞌ kuꞌun te yaꞌtele. 35Te jaꞌexe ya awalik: “Ay to skꞌan chaneb u te kꞌajoje”, xchaex. Pero joꞌon ya kalbeyex: Kꞌeluya awilik te tut stsꞌuntalanbile. Yijubenix, ya skꞌanix kꞌajel. 36Te machꞌa ya xꞌaꞌtej ta kꞌajoje ya yichꞌ stojol yuꞌun, y te sit te tut ya skꞌajike ya xkuxuyin sbajtel kꞌinal. Jich te machꞌa awaleje sok te machꞌa kꞌajojine, pajal me ben jun yoꞌtanik yuꞌun. 37Porke yuꞌun batsꞌi jich te tut yipal ta alele: “Yan machꞌa ya yaw y yan machꞌa ya skꞌaj”, xchi me. 38Joꞌon ya jtikonex bael ta skꞌajel te ma jaꞌukex a aꞌtejex ta stsꞌunele. Yan machꞌa aꞌtejik teꞌae, y jaꞌex a ochex te ba aꞌtejemike —xchi te Jesuse.
39Bayal te genteetik te ba jtejklum Samariae la xchꞌuunik te Jesuse yuꞌun te tutiꞌ ba yal te antse. Jaꞌ te la yale: “Spisil a yalbon te tut ma tsaꞌamuk jpasoje”, te xchie. 40Jich te kꞌalal laj tal te samariaetike la skꞌanbeyik pawor te Jesuse te teyuk ya xꞌaninik sok ae. Jaꞌ yuꞌun anin cheb kꞌaal teꞌa te Jesuse. 41Y bayal xan a xchꞌuunik te la yaꞌiybeyik sluwar te tut yipal ta yalel te Jesuse. 42Y la yalbeyik te antse:
—Te ora to ma jaꞌuk xanix te tut la awalbotik te ya jchꞌuuntike. Yuꞌun mismo joꞌotik a kaꞌibetik sluwar te skꞌope, y la jnaꞌtikix te batsꞌi jich te jaꞌix te Cristo te jkoltaywane yuꞌun spisil te genteetike —xyutik.
Te Jesuse la slekutesbe xnichꞌan jtul yaj-aꞌtel te reye
43Kꞌaxix cheb kꞌaal yuꞌun teꞌa te Jesuse. Lokꞌ bael te ba Samariae y la spas bael seguir beel te ya xbajt ta Galileae. 44Porke te Jesuse stukel mismo a yal te jtul jꞌalwaneje ma xꞌakꞌot ta jkuenta yuꞌun te slumale. 45Te kꞌalal kꞌot te ba Galileae, te genteetik yuꞌun te estadoe ben sniꞌ xyaꞌiyik te kꞌote. Yuꞌun xkꞌotikuk ta kꞌin Pascua euk te ba Jerusalene, y teꞌ yilik a spisil te tuti spas te ba kꞌin te Jesuse.
46Te Jesuse chaꞌsujt xan bael ta jtejklum Cana te ay ta estado yuꞌun Galileae te ba la skꞌajtates ta bino te jaꞌe. Ay jtul mamal teꞌey a te ay aꞌbil tulan yaꞌtel yuꞌun te reye. Ay ta chamel jtul xnichꞌan te ay ta jtejklum Capernaum. 47Te kꞌalal ya yaꞌi te mamal te kꞌotix ta estado yuꞌun Galilea a te Jesuse te lijk bael ta estado yuꞌun Judea, ba yil y la skꞌanbe pawor te yauk xbajt ta sna yuꞌun xba slekutesbe te xnichꞌane, yuꞌun ya xchamix. 48Te Jesuse la sjakꞌbe:
—Te jaꞌexe ma xꞌachꞌuunuk te jichuk makꞌ ya awilik te señaetik sok te milagroetike —xyut.
49Pero te mamale la yalbe:
—Kajwal, konik ta ora antes te ya xcham te jnichꞌane —xchi.
50Te Jesuse jich a yalbe:
—Sujtanix bael ta ana. Te anichꞌane kuxix —xchi.
Te mamale la xchꞌuun te tuti albot yuꞌun te Jesuse, y ora bajt. 51Te kꞌalal nopol xkꞌotix ta sna ae, te yaj-aꞌteltake lokꞌik tal ta staik bael. La yalbeyik:
—Te anichꞌane kuxix —xchiik.
52Te mamale la sjojkꞌolanbe te tut ora a te lijk lekubuk te xnichꞌane. La sjakꞌbeyik:
—Wojey la una a te kom bael te skꞌajkꞌe —xchiik.
53Te state la snaꞌ te jich ora a te albot yuꞌun te Jesuse: “Te anichꞌane kuxix” te xꞌutote. Jaꞌ yuꞌun te mamale sok swololik ta na la xchꞌuunik te Jesuse.
54Jaꞌ to jaꞌ xchaꞌmelal la yakꞌ ta ilel seña smilagro a te Jesuse te kꞌalal chaꞌsujt bael ta Galilea te lijk bael ta Judea ae.
Currently Selected:
JUAN 4: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.