Yohana ENAITURUK
ENAITURUK
Ore embuku e YOHANA neitodolu Yesu ajo Ororei loo ntarasi le Nkai “Otaa ninye oltung'ani neton tiatua iyiook” Anaa enajo embuku makewan, etisiraki ena buku oo lomon, supati peyie etum ilaisumak aairuko nchere ore Yesu naa ninye apa olaitajeunoni osiligieki iltung'ana, naa ninye Enkerai Enkai, naa tiatua enkirukoto enye etum ninche enkishui oo ntarasi (20.31).
Ore peyie eidip atisira aitodolu nchere ore Ororei loo ntarasi le Nkai netii tenebo Yesu, eitodolu e matua naituruku mbaa enking'asia naapaashipaasha naataasa Yesu pee eitadedeyie nchere ninye apa Olaitajeunoni oisiligieki olorere, Enkerai e Nkai. Esuju sii kuna kirorot mbaa naalimuno neibalunyeki too mbaa enking'asia. Kidol tena rishata eneikuna ilkulikae tung'ana pee eiruk Yesu, neaku ilasujak lenyena, netii kulikae ooibooitie imbaa enyena neany eiruk ninye. Ore imatuan e 13-17, nesir te nkadori enchula apa e atua oleng e Yesu tenebo ilooiteng'eni lenyena teina kewarie apa naibung'aki ninye, o rorei lenyena ooitagolie ninche erretena teina kewarie napuoi aashe ninye. Ore imatuan naabayie nelimu enkibung'ata e Yesu, o enkiguana pee eshei ninye to salaba, o empiunoto enye o pee eipang'aki ilkipaareta lenyena eidipa atopiu.
Ore enkatini enkitok nainepuaki easita eloloito netii ing'adeta neeijo kuna [8.1-11] amu metii apa ina atini kulie ardasini naasira musan, netii kulie naatii.
Eitirrish Yohana oleng enkishooroto e nkishui nemeish tiatua Kristo ajo enkishooroto ina natumi tena kata nalotu ajing atua lelo oong'amu Yesu te nkoitoi enkirukoto, aajo ninye enkoitoi o esipata, o enkishui. Ore embae nauno oleng te Yohana naa ina naasishore intokitin naalioo e nkishon aitadedeyie imbaa oltau le Nkai anaa enkare, emukate ewang'an, olchekut o ntare, o lchani loo sabibu o lng'anayio lenyena.
Iorot oo Matuan
Enaituruku 1.1-18
Yohana olaibatisani o looiteng'eni le dukuya le Yesu 1.19-51
Esiaai e Yesu tiatua olorere 2.1–12.50
Inkolong'i naabayie tiaatua o tembata e Yerusalem 13.1–19.42
Empiunoto o enkipang'akinoto o Laitoriani 20.1-31
Enkikenoto: ae kipang'akinoto te Galilaya 21.1-25
Currently Selected:
Yohana ENAITURUK: MBS
Highlight
Share
Copy
Want to have your highlights saved across all your devices? Sign up or sign in
The Bible in Maasai © United Bible Societies, 1991.