Johana 2
2
Yesu oloko pi divai e kisera Kana
1Bang’ ndalo adek, ne nitie kisera e dala mar Kana piny Galili. Min Yesu ne ni kuno, 2kendo Yesu bende noluongi e kiserano gi jopuonjrene. 3To divai norumo, omiyo min Yesu nowachone ni, “Jogi koro onge gi divai.” 4To Yesu nowacho ni min niya, “Mama, ere gimomiyo ikelona wachni? Kindena pok ochopo.” 5Eka min mare nowacho ni jotich ni, “Timuru gimoro amora mowachonu.”
6Degi auchiel mag kite nochung kanyo, mondo ji ologie e yo ma Chik jo-Yahudi dwaro. Dak ka dak ne nyalo ting’o pi moromo depe ariyo. 7Yesu nowacho ni jotich niya, “Pong’uru degigi gi pi.” Mi ne gipong’ogi thich. 8Eka nowachonigi ni, “Koro twomuru pi moko, uter ni jaduong’ kisera.” Ne gitimo kamano, 9to kane jaduong’ kisera obilo pi mane koro oselokore divai, ne ok ong’eyo kuma oaye, to mak mana jotich mane otuomo pigno ema nong’eyo. Eka jaduong’ kisera noluongo wuon kisera, mowachone niya, 10“Ji mang’eny kwongo kelo divai maber, eka bang’e ka welo osemer, to gikelo divai ma ok ber. Into isekano divai maber nyaka sani!”
11Yesu notimo hono Kana e piny Galili. En e ranyisi mane okwongo timo. Kamano nonyiso duong’ne maler, mi jopuonjrene noyie kuome.
12 #
Math 4.13. Bang’ mano, Yesu gi min mare gi owetene kod jopuonjrene nodhi Kapernaum, mobet kuno kuom ndalo moko manok.
Yesu oriembo joohala e Hekalu
(Mathayo 21.12-13; Mariko 11.15-17; Luka 19.45-46)
13 #
Wuok 12.1-27. Sap jo-Yahudi miluongo ni Pasaka nochopo machiegni, omiyo Yesu nodhi Jerusalem. 14Kane odonjo e Hekalu, noyudo johand dhok gi rombe kod akuche, kaachiel gi jowil pesa kobet kanyo. 15Nokawo tworo, olosogo del, mi oriembogo jogo duto oko e Hekalu, kaachiel gi jambgi. Nopuko pesa jowil pesa, kendo ogoyo mesnigi piny. 16Nowacho ni johand akuche niya, “Goluru gigi ka! Kik ulok od Wuora kar loko ohala!” 17#Zab 69.9.Mano nomiyo jopuonjrene oparo wach mondiki e Muma ni, “A Nyasaye, hera ma aherogo Hekalu mari wang’o chunya ka mach.”
18Jodong jo-Yahudi nopenjo Yesu ni, “Ere gima nyalo nyisowa ni in gi teko mar timo gima isetimono?” 19#Math 26.61; 27.40; Mar 14.58; 15.29.Yesu nodwokogi niya, “Mukuru Hekalu ni to abiro gere kendo gi ndalo adek.” 20To ne gimedo penje ni, “Gero Hekaluni osekawo higni piero ang’wen gauchiel! In to ere kaka dichak igere gi ndalo adek?”
21To Hekalu mane Yesu wuoyo kuome ne mana ringre owuon, 22kendo bang’e, kane ochier oa kuom joma otho, jopuonjrene noparo ni kara mano e gima ne owacho. Kuom mano, ne giyie ni Muma wacho adier, kendo ne giyie ni weche Yesu bende gin adier.
Yesu ong’eyo chuny dhano
23Kane Yesu ni Jerusalem, e Sap Pasaka, ji mathoth noyie kuome, nimar ne gineno honni motimo. 24Yesu to ne ok oketore e luetgi, nikech nong’eyo kit dhano kaka chal. 25Omiyo ne ok odwar mondo ng’ato onyise gimoro kuom dhano, nimar nong’eyo gik manie chuny dhano.
Currently Selected:
Johana 2: DHO15
Highlight
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.