उत्पत्ति 49
49
याकूबले आफ्ना बाह्र छोराहरूलाई आशीर्वाद दिएका
1तब याकूबले आफ्ना छोराहरूलाई बोलाएर भने, तिमीहरू यहाँ जम्मा होओ, र पछिल्ला दिनहरूमा तिमीहरूमाथि के आइपर्नेछ सो म भनूँला।
2हे याकूबका छोरा हो,
जम्मा भएर सुन,
तिमीहरूका बुबा इस्राएलले भनेका सुन।
3रूबेन, तँ मेरो जेठो छोरो होस्,
मेरो शक्ति र मेरो बलको पहिलो फल,
गौरव र शक्तिमा सर्वप्रमुख।
4पानीजस्तो चञ्चल तँ,
तेरो प्रतिष्ठा कायम रहनेछैन,
किनभने तेरा बुबाको पलङ्गमा तँ चढ़िस्,
र त्यो अशुद्ध पारिस्—
तँ मेरो ओछ्यानमा चढ़िस्!
5शिमियोन र लेवी दाजुभाइ हुन्,
तिनका तरवार नै उपद्रवका हतियार हुन्,
6ए मेरो प्राण, तिनीहरूको सभामा नआइज,
तिनीहरूको सङ्गतमा नलाग्,
किनकि आफ्नो रीसमा तिनीहरूले
मानिसहरूलाई मारेका छन्,
तिनीहरूले आफूखुशी गरेर
गोरुहरूका ढोड़नसा काटेका छन्।
7तिनीहरूको रीसमाथि श्राप परोस्,
किनभने त्यो भयानक छ,
र तिनीहरूका क्रोधमाथि,
किनकि त्यो निष्ठुर छ।
तिनीहरूलाई म याकूबमा छिन्न-भिन्न पार्नेछु,
र इस्राएलमा तितरबितर पार्नेछु।
8ए यहूदा, तेरा दाजुभाइहरूले
तेरो प्रशंसा गर्नेछन्,
तेरो हातले तेरा शत्रुहरूका गर्दन पक्रनेछ,
तेरै बुबाका छोराहरू तेरो सामुन्ने निहुरिनेछन्।
9यहूदा सिंहको डमरु हो। #गन्ती २४:९; प्रका ५:५
ए मेरो छोरो, शिकारबाट तँ आएको छस्,
त्यो निहुरिन्छ, र सिंहझैँ लेटिरहन्छ,
अँ, सिंहनीझैँ— कसले त्यसलाई उठाउने आँट गर्छ?
10यहूदाको हातबाट राजदण्ड हट्नेछैन,
राज्य चलाउनेको लाठी त्यसका खुट्टाका बीचबाट हट्नेछैन,
जबसम्म त्यसका मालिक आउँदैनन्।
र जातिहरू उहाँको आज्ञाकारी बन्नेछन्।
11त्यसको गधालाई दाखको बोटमा,
र गधाको बछेड़ोलाई चाहिँ
उत्तम जातको हाँगामा बाँध्नेछ।
त्यसले आफ्ना लुगाहरू दाखमद्यमा,
आफ्ना पोशाक अङ्गूरको रसमा धुनेछन्।
12त्यसका आँखा दाखमद्यभन्दा गाढ़ा,
र त्यसका दाँत दूधभन्दा सेता हुनेछन्।
13जबूलूनको वास समुद्रको किनारमा हुनेछ,
जहाजहरूका निम्ति त्यो बन्दरगाह हुनेछ,
र त्यसको सिमाना सीदोनसम्म हुनेछ।
14इस्साखार बलियो गधा हो,
जो दुई भारीहरूका बीचमा लेटिरहन्छ।
15आफ्नो विश्रामको ठाउँ असल रहेछ,
र त्यसको देश रमाइलो रहेछ भन्ने त्यसले देखेपछि,
त्यसले भारी बोक्नलाई आफ्नो काँध झुकाउनेछ,
र बेगारीको काम गर्न मान्नेछ।
16इस्राएलका कुलमध्येको एक भएर
दानले आफ्ना मानिसहरूका निम्ति न्याय गर्नेछ।
17दानचाहिँ बाटोमा भएको एउटा सर्प,
र गोरेटोमा भएको विषालु साँप हुनेछ,
जसले घोड़ाका कुर्कुच्चा डस्छ,
र त्यसको घोड़चढ़ीचाहिँ पछिल्तिर लोट्छ।
18“हे प्रभु, मैले तपाईंको उद्धारको प्रतीक्षा गर्दैआएको छु।
19“गादमाथि एक दलले आक्रमण त गर्नेछ,
तर त्यसले तिनीहरूलाई उल्टा खेद्दै हमला गर्नेछ।
20“आशेरबाट उत्पन्न हुने अनाजहरू उत्तम हुनेछन्,
र त्यसले राजकीय खाना बाँड़िदिनेछ।
21नप्ताली फुकाइएकी मुडुली-मृग हो,
जसले सुन्दर-सुन्दर पाठा-पाठी बियाउँछे।
22योसेफ फलले लटरम्म भएको एउटा लहरा हो,
पानीको मूलनेर भएको फल दिने लहरा,
जसका हाँगाहरू पर्खाल माथि-माथि फैलिन्छन्।
23धनुर्धारीहरूले त्यसलाई ज्यादै दु:ख दिए,
त्यसमाथि काँड़ चलाए,
र त्यसको खेदो गरे।
24तैपनि त्यसको धनु दह्रो नै रह्यो,
र त्यसका पाखुराहरू फूर्तिलै रहे,
याकूबका परमशक्तिशालीको हातद्वारा,
ती गोठाला, इस्राएलको चट्टानद्वारा,
25अर्थात् तेरा बुबाका परमेश्वर, जसले तँलाई सहायता गर्नुहुन्छ, सर्वशक्तिमान्, जसले तँलाई आशिष् दिनुहुन्छ— माथि स्वर्गका आशिष्हरू, तल अगाधका आशिष्हरू, स्तन र गर्भका आशिष्हरू।
26तेरा बुबाका आशीर्वाद प्राचीन पहाड़हरूका
आशीर्वादभन्दा र अनन्त डाँड़ाहरूका
आशिष्भन्दा प्रबल छ।
ती सबै योसेफको शिरमा होऊन्,
त्यसका दाजुभाइहरूमध्येका प्रधानको शिरैमा।
27“बेन्यामीन त एउटा फहराउने ब्वाँसो हो,
बिहानचाहिँ ल्याएको शिकार त्यसले खान्छ,
र बेलुकीचाहिँ त्यसले लूट बाँड्छ।”
28यी सबै इस्राएलका बाह्र कुल हुन्। आफ्ना बुबाले तिनीहरूलाई आशीर्वाद दिँदै भनेको कुरा यही हो। प्रत्येकलाई तिनले सुहाउँदो आशीर्वाद दिए।
याकूबको मृत्यु
29तब तिनले तिनीहरूलाई यो आज्ञा दिए: “म त मेरा मानिसहरूकहाँ मिल्न जान लागेको छु। हित्ती एप्रोनको खेतमा भएको ओड़ारमा मेरा पिता-पुर्खाहरूका साथमा मलाई गाड़, 30अर्थात् कनान देशमा मम्रेनेरको मक्पेलाको खेतमा भएको ओड़ार, जो अब्राहामले हित्ती एप्रोनको हातबाट खेतसमेत चिहान बनाउनलाई किनेका थिए। #उत २३:३-२० 31त्यहीँ नै उनीहरूले अब्राहाम र तिनकी पत्नी सारालाई गाड़ेका थिए। र त्यहीँ नै उनीहरूले इसहाक र तिनकी पत्नी रिबेकालाई पनि गाड़ेका थिए। त्यहीँ नै मैले लेआलाई गाडें। #उत २५:९-१०; ३५:२९ 32त्यो खेत र त्यहाँ भएको ओड़ार हित्तीहरूको हातबाट किनेको हो।”
33छोराहरूलाई यो आज्ञा दिइसकेपछि याकूबले आफ्ना खुट्टा ओछ्यानमा पसारेर आफ्नो प्राण त्यागे, र आफ्ना पिता-पुर्खाहरूसँग मिल्न गए। #प्रे ७:१५
Currently Selected:
उत्पत्ति 49: NNRV
Highlight
Share
Copy
Want to have your highlights saved across all your devices? Sign up or sign in
Nepali New Revised Version © Nepal Bible Society 1997, 2006, 2009, 2012