यूहन्ना 5
5
पुखूया लिक्कसं च्वंम्हय्सित लाय्कादीगु
1अनंलि यहूदीतय्गु छगू नखः वःगुलिं येशू यरूशलेमय् झाल। 2यरूशलेमय् फै ध्वाखाया लिक्कसं न्याखेरं फः दुगु छगू पुखू दु। थ्व पुखूयात हिब्रू भाषां बेथेस्दा धाइ। 3थ्व हे न्यागू सतलय् लः संगु स्वय्त पिया च्वनीपिं थीथी ल्वचं काःपिं मनूत – कांत, खुत, ल्हाःतुति मसंपिं दु। 4इपिं अन गुबलय् लः सनी धकाः स्वयेत पियाच्वनीगु खः। छाय्धाःसा परमप्रभुया छम्ह दूत बरोबर वयाः पुखूया लः संकाबीगु जुयाच्वन। थथे लः संकूबलय् लाक्क दकलय् न्हापां पुखुलिइ कुहां वनीम्ह मनूयागु न्ह्याथें ज्याःगु ल्वय् नं लायावनिगु जुयाच्वन। 5अन स्विच्यादँ न्ह्यःनिसें ल्वचं कयाच्वंम्ह छम्ह मनू दु। 6येशूं वयात खनाः अले यक्व दँ न्ह्यःनिसें व अथे जुयाच्वंगु सीकाः धयादिल – “छु छन्त ल्वय् लाय्के मास्ति वः ला?”
7अले वं वय्कःयात धाल – “हजुर, पुखूयागु लः संकीबलय् जितः लखय् तया बीपिं सुं मदुगुलिं जि अन थ्यने न्ह्यः हे मेपिं थ्यनेधुंकीगु।”
8वय्कलं धयादिल – “थःगु लासा ज्वनाः न्यासि हुँ।”
9उबलय् हे वयागु ल्वय् लन। अले व थःगु लासा ज्वनाः न्यासि जुल। उखुन्हु विश्रामबार खः। 10अय्जूगुलिं यहूदीतय् नायःतय्सं व मनूयात धाल – “विश्रामबार खुन्हु लासा क्वबी मज्यू।”#नहे १३:१९; यर १७:२१
11वं इमित लिसः बिल – “जितः लाय्का ब्यूम्ह मनुखं ‘लासा ज्वनाः हुँ’ धकाः धयादीगु खः।”
12इमिसं न्यन – “छन्त लासा ज्वनाः हुँ धकाः धाःम्ह मनू सु खः?”
13अन यक्व मनू दुगुलिं व येशू तुरुन्त झायादीगुलिं वय्कःयात वं म्हमसील। 14लिपा येशूं वयात देगलय् नाप लानाः धयादिल – “स्व, छंगु ल्वय् लाये धुंकल। आवंनिसें पाप याये मते, अले छन्त छुं नं जुइ मखु।” 15अले व मनुखं इमिथाय् वनाः “जितः लायेका ब्यूम्ह येशू हे खः” धकाः धाः वन।
16येशूं विश्रामबार खुन्हु थथे यानादीगुलिं यहूदीतय् नायःतय्सं वय्कःयात दुःख बियाहल। 17अथेसां वय्कलं इमित धयादिल – “जिमि बाःनं न्ह्याबलें ज्या यानादी, उकिं जिं नं ज्या यानाच्वने।” 18वय्कलं थथे धयादीगुलिं इमिसं वय्कःयात स्यायेत झन अप्वः कुतः यात। छाय्धाःसा वय्कलं विश्रामबार मानय् मयाःगु जक मखु, अज्ज परमेश्वर नाप हे थःत ज्वलिंज्वः यानाः परमेश्वरयात वय्कःया बाः खः धकाः धयादिल।
काय्या अधिकार
19येशूं इमित धयादिल – “जिं छिमित खःगु खँ धाये – काय्नं थःगु मनं लुइकाः छुं हे याये फइ मखु, बरु बाःनं याःगु खनाः हे जक याये सइ। थथे जूगुलिं बाःनं छु छु यानादी, काय्नं नं व हे याइ। 20बाःनं काय्यात माया यानादीगुलिं बाःनं यानादीगु फुक्कं काय्यात क्यनादी। थ्व स्वयाः नं तःधंगु ज्या बाःनं काय्यात क्यनादी, गुकिं यानाः छिपिं छक्क जुइ। 21गथे बाःनं सीपिन्त म्वाकाः जीवन बियादी, अथे हे काय्यात यःपिन्त नं काय्नं जीवन बियादी। 22बाःनं सुयागुं न्याय यानादी मखु। न्याय यायेगु अधिकार काय्यात बियादी धुंकल। 23अय्जूगुलिं गथे बाःयात फुक्कसिनं मानय् याः अथे हे काय्यात नं फुक्कसिनं मानय् यायेमाः। काय्यात मानय् मयाःम्हय्सिनं काय्यात छ्वयाहःम्ह बाःयात नं मानय् मयाःगु जुइ।
24 “जिं छिमित खःगु खँ धाये – जिगु खँ न्यनाः जितः छ्वया हःम्हय्सित सुनां विश्वास याइ, वयात अनन्त जीवन दइ। थज्याःम्ह मनूयागु न्याय जुइ मखु, बरु सीम्वाय्क अनन्त जीवन दये धुंकी।”
25 “जिं छिमित खःगु खँ धाये – ई वयाच्वंगु दु, अले व ई थ्व हे खः – सीपिन्संनापं परमेश्वरया काय्यागु सः ताइ, अले सुनां न्यनी, इपिं म्वाइ। 26परमेश्वर बाः जीवनया मुहान खः, अथे हे वय्कलं थःकाय्यात नं जीवनया मुहान यानादिल। 27वय्कः मनूया काय् जूगुलिं वय्कःयात हे न्याय यायेगु अधिकार बियादिल। 28थ्व खँय् अजू चाये मते, सी धुंकूपिन्संनापं वय्कःयागु सः ताइगु ई वयाच्वंगु दु। 29अले थुपिं म्वाना वइ। भिं याःपिन्त अनन्त जीवन बियादी। अले मभिं याःपिन्त न्याय यानादी।”#दान १२:२
येशूया साक्षी
30 “थथःम्हं जिं छुं नं याये मफु, बाःनं जितः धयादी थें जिं न्याय जक यायेगु खः। अय्जूगुलिं जिं न्याय यानागु ठीक जू, छाय्धाःसा जितः यःथें जिं न्याय यायेगु मखु, बरु जितः छ्वया हःम्हय्सित यःथें यायेगु खः।”
31 “जिं तुं जिगु साक्षी ब्यूसा जिगु साक्षी सत्य जुइ मखु। 32जिगु साक्षी बीम्ह मेम्ह हे दु, वय्कलं धयादीगु सत्य खः धकाः जिं स्यू। 33छिमिसं यूहन्नायाथाय् मनू छ्वयाहल, अले वं ‘सत्य थ्व हे खः’ धकाः साक्षी बिल।#यूह १:१९-२७; ३:२७-३० 34जिगु लागि सुनानं साक्षी बी म्वाः। अय्नं छिपिं बचय् जुइमा धकाः जिं थथे धयाच्वनागु खः। 35यूहन्ना ला च्याःगु व थीगु मत जक खः। वयागु जलय् छिमिसं छुं ई तक जक जूसां लय्ताय्गु हे यय्कल। 36तर यूहन्नां ब्यूगु साक्षी स्वयाः तःधंगु साक्षी जिके दु। बाःनं जितः पूवंकेत बियादीगु ज्या व जिं यानाच्वनागु ज्यां हे जितः बाःनं छ्वयाहयादीगु खः धकाः सी दु। 37जितः छ्वयाहयादीम्ह बाःनं हे जिगु साक्षी बियादीगु दु। वय्कःयागु सः छिमिसं गुबलें मताःनि, अले ख्वाः नं मखंनि।#मत्ती ३:१७; मर्क १:११; लूक ३:२२ 38वय्कलं छ्वया हःम्हय्सित छिमिसं विश्वास मयाःगुलिं वय्कःयागु वचन छिमिके थाइ मखु।
39 “अनन्त जीवन दइ धकाः छिमिसं धर्मशास्त्र ब्वना जुइ। व हे धर्मशास्त्रं जिगु साक्षी बी, 40अय्नं छिपिं जिथाय् अनन्त जीवन कायेत वइ मखु।
41 “मनूतय्सं तःधंकूगु जितः मयः। 42छिमिसं परमेश्वरयात माया मयाः धकाः जिं स्यू। 43जितः बाःनं छ्वयाहःगुलिं छिमिसं जितः थः नाला मकाः। थःगु हे नामय् मेपिं सुं वल धाःसा छिमिसं इमित ग्रहण याना काइ। 44छिमिसं थःथवय् तःधंका च्वन, तर परमेश्वरं तःधंकीगुलिइ छिमिसं वास्ता मया। छिमिसं गथे यानाः विश्वास याये फइ?
45 “जिं छिमित परमेश्वरया न्ह्यःने दोषी ठहरय् याइ धकाः मतिइ तये मते। छिमिसं आशा तयाच्वंम्ह मोशां हे छिमित दोषी ठहरय् याइ। 46छिमिसं मोशायात धात्थें हे विश्वास यानाच्वंगु खःसा जितः नं विश्वास यायेमाःगु खः। छाय्धाःसा मोशां जिगु हे खँ च्वया थकूगु खः। 47मोशां च्वया थकूगु खँय् हे छिमिसं विश्वास मयासा जिगु खँय् गथे यानाः विश्वास याये फइ?”
Currently Selected:
यूहन्ना 5: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.