यूहन्ना 2
2
काना शहरय् जूगु ब्याहा भ्वय्
1कंस खुन्हु गालीलय् च्वंगु काना शहरया छखा छेँय् ब्याहा भ्वय् जुयाच्वन। येशूया मांनं अन हे दु। 2येशू व चेलातय्त नं भ्वजय् सःतातःगु दु। 3दाखमद्य फुगुलिं येशूया मांनं वय्कःयात धाल – “इमिके दाखमद्य मन्त।”
4अले वय्कलं धयादिल – “मय्जु, जिं छु यायेमाःगु खः, व छिं धया च्वनेमाःगु मदु। आः तक जिगु ई मवःनि।”
5अय्नं वय्कःया मांनं च्यःतय्त धाल – “वय्कलं छु धयादी छिमिसं व हे या।”
6यहूदीतय्गु चलन कथं च्वख यायेत अन सछि-सछि लिटर ति न्ह्यंगु ल्वहंयागु खुगः त्यप तयातःगु दु। 7येशूं इमित धयादिल – “फुक्क त्यपय् जाय्क लः ति।” अले इमिसं फुक्क त्यपय् जाय्क लः तल। 8वय्कलं इमित धयादिल – “आः भतिचा तुयाः मूभलिंयाथाय् यंकि।” अले इमिसं यंकल।
9मूभलिंनं व लःया सवाः कयास्वःबलय् दाखमद्य जुयाच्वने धुंकल। वं थ्व गनं हःगु धकाः मस्यू। लः तःपिं च्यःतय्सं जक स्यू। अले वं जिचाभाजु जूम्हय्सित सःताः धाल – 10“मनूतय्सं भिंगु दाखमद्य निं न्हापालाक त्वंकी, अले भचा भचा काये धुंकाः तिनि मभिंगु दाखमद्य त्वंकी। छिं धाःसा आः तक नं भिंगु दाखमद्य ल्यंका हे तलतिनि।”
11वय्कलं गालील जिल्लाया काना शहरय् दक्कलय् न्हापांगु थ्व अजू चायापुगु ज्या यानाः थःगु महिमा क्यनादिल। थथे यानादीगुलिं चेलातय्सं वय्कःयात विश्वास यात।
12अनं लिपा वय्कः थः मां, किजापिं व चेलात नाप कफर्नहुमय् झायाः अन हे छुं न्हि च्वनादिल।#मत्ती ४:१३
येशूं देगः शुद्ध यानादीगु
मत्ती २१:१२-१३; मर्क ११:१५-१७; लूक १९:४५-४६
13यहूदीतय्गु छुत्काराया नखः न्ह्यःने थ्यंगुलिं येशू यरूशलेमय् झाल।#प्रस १२:१-२७ 14वय्कः देगलय् झाःबलय् द्वहं, फैचा, व सुकुभतु मियाच्वंपिं व धिबा हिलीपिं च्वनाच्वंगु खन। 15अले वय्कलं खिपः छपु निलाः कोर्रा थें दय्काः इपिं फुक्कसितं पितिनाछ्वयादिल। फैतय्त व द्वहंतय्त देगलं पिने ख्याना छ्वयादिल। अले धिबा हिलीपिनिगु धिबा थल प्वंकाः इमिगु टेबिल नापं ग्वतुइकाबिल। 16सुकुभतु मिया च्वंपिन्त वय्कलं धयादिल – “थुपिं फुक्कं चिज थनं यंकि, जिमि बाःयागु छेँयात छिमिसं ब्यापारया छेँ याये मते।”
17वय्कःया चेलातय्सं थ्व खँ च्वयातःगु लुमंकल – “हे परमेश्वर, छिगु देगःया जोश जि छ्वय्की।”#भज ६९:९
18थथे यानादीगुलिं नायःतय्सं वय्कःयात धाल – “छु छिके थथे यानादीगु अधिकार दु ला? अथे जूसा छु छिं जिमित अजू चायापुगु ज्या व चिं क्यनादी फु?”
19वय्कलं लिसः बियादिल – “थ्व देगःयात थुना बियादिसँ, जिं स्वन्हुं हे थुकियात हानं दय्काबी।”#मत्ती २६:६१; २६:४०; मर्क १४:५८; १५:२९
20थ्व न्यनाः इमिसं धाल – “थ्व देगः दय्केत पीखुदँ बित, छिं स्वन्हुं हे थ्व देगः दनादी फु ला?”
21वय्कलं धयादीगु देगः ला वय्कःया थःगु हे म्ह खः। 22वय्कः सिनाः हानं म्वाना वये धुंकाः चेलातय्सं थ्व खँ लुमंकल। थथे जूगुलिं इमिसं धर्मशास्त्र व येशूं नवानादीगु वचनय् विश्वास यात।
23छुत्काराया नखःबलय् यरूशलेमय् वय्कलं यानादीगु अजू चायापुगु ज्या खंगुलिं यक्व हे मनूतय्सं वय्कःयात विश्वास यात। 24वय्कलं धाःसा इमिके भरोसा तयामदी, छाय्धाःसा वय्कलं फुक्क मनूतय्त बांलाक म्हस्यू। 25सुनानं वय्कःयात थ्व मनू थज्याःम्ह धकाः धयाच्वने म्वाः। मनूतय्गु नुगलय् छु दु धकाः वय्कलं हे स्यू।
Currently Selected:
यूहन्ना 2: NEW
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.