A Zã Sõng 2
2
Kana yikãadem
1La dasma a tãab dẽ poore, yikãadem n zĩnd Kana, Galile tẽnga, la a Zezi ma da bee be. 2La b boola a Zezi ne b karen-biisã tɩ b wa kibsã. 3La rãam waa n paoogame t'a Zezi ma yeel-ba: «B ka le tar dãam ye!» 4T'a Zezi leoke: «Paga, tɩ f yet tɩ m maan bõe? Ad-m wakat nan pa ta ye.» 5La b ma yeela rakõapã: «Bɩ y maan b sẽn na n yeel-y tɩ y maan fãa.»
6La kug sĩms a yoobe n da tẽg beenẽ, tɩ Zʋɩf zakẽ, koom sẽn na n waas ka tog n kong ye. Sĩng fãa da reegda ko-yʋy a yiib bɩ a tãabo. 7A Zezi yeela rakõapã: «Pids-y sĩmsa ne koom.» La b pids-b lame n sãdge. 8T'a Zezi yeel-ba: «Bɩ y toog marsã n tɩ kɩs sẽn geta rɩɩba yelle.» La b tallame n tɩ kɩs-a. 9La yẽ soaba sẽn lemb kooma sẽn lebg rãama — a da ka mi rã-kãng sẽn yitẽ ye, la dakõapa sẽn toog kooma, da miime — a boola pʋg-sɩdã, 10n yeel-a: «Ned kam fãa rengd n waa ne rãam sẽn noome tɩ neba sã n yũ n tɩge, bɩ a yaool n wa ne rã-faasgã, la yãmb yẽ kell n yiisa sẽn noome, n ta marsã!» 11Dẽ yɩ-la a Zezi pipi wẽnd makre, b sẽn maan Kana, Galile tẽnga. Bãmb puka b zɩɩre la b karen-biisa fãa tẽ-b lame. 12#Mt 4,13. Dẽn poore, b siga Kafarnaom ne b ma, ne b saam-biisi, ne b karen-biisi la b tɩ zĩnda be dasma a wãn bala.
Wẽnd dooga yɩlgre
13 #
Ey 12,1-27. Zʋɩf rãmba pak ra kolgame t'a Zezi kẽng Zerizalɛɛm. 14La b yãee wẽnd doogẽ wã neb sẽn da be be n koosd lolse, piisi ne wala la b zĩi n tekd ligdi. 15La b rɩka wĩ n maan kaase n dig bãmb fãa ne b niis la b piis n yiis wẽnd doogẽ. La b sẽega ligd tɛkdba ligdi, n tus b teedã n lubi. 16La b yeela sẽn da koosd-b wala: «Yiis-y fãa ka, la y ra rɩk m Ba roogã n maan teed koosg roog ye.» 17#Yɩ 69,10. La karen-biisa tẽega sẽn gʋlsã:
«Yãmb dooga nonglem na n dɩ-m la zãnga.»
18Zʋɩf rãmba yeel-b lame: «Yãmb sẽn maan woto wã, bõe n wilgd tõnd tɩ y tara rẽ tõogo?» 19#Mt 26,61; 27,40; Mk 14,58; 15,29. T'a Zezi leok-ba: «Wã-y wẽnd do kãnga la dasma a tãab pʋgẽ, m na me-a n yalse.» 20Tɩ Zʋɩf rãmba leok-ba: «Yaa yʋʋm pis naas la a yoob pʋgẽ la b me wẽnd do-kãnga tɩ yãmb tõe n me-a n yals dasma a tãab pʋgẽ?» 21Mik a Zezi da gomda b menga yĩng sẽn ya wẽnd dooga yelle. 22Woto me la b sẽn waa n vʋʋg kɩɩms sʋka, b karen-biisa tẽegame tɩ b ra yeel-b la rẽ la b tẽe sebr sõng la gomdã b sẽn da togsã.
23A Zezi paa Zerizalɛɛm pak kibsa yĩnga. Neb wʋsg tẽ b yʋʋre, b sẽn yãe wẽnd makr dãmb b sẽn maana. 24A Zezi yẽ da ka teeg neba woto ye, tɩ b ra mii bãmb fãa sẽn ya-la, 25b ra ka baood ninsaal kaseto, tɩ bãmb meng ra mii sẽn be ninsaal pʋgẽ.
Currently Selected:
A Zã Sõng 2: SSDC98
Highlight
Share
Copy
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.