Yowann 6
6
Maga an Pymp Mil
Mat 14:13-21; Mark 6:30-44; Luk 9:10-17
1Wosa hemma, Yesu eth dhe'n tu arall a vor Galile (henn yw, Tiberias). 2Ha routh veur a'n siwyas, rag yth esons ow kweles an toknys a wre war an glevyon. 3Ha Yesu eth yn-bann y'n menydh, hag ena ev a esedhas gans y dhyskyblon. 4Hag yth esa an pask, goel an Yedhewon, ow tos nes. 5Ytho pan dhrehevis Yesu y dhewlagas, ha gweles routh veur devedhys dhodho, yn-medh ev dhe Felip, ‘A-ble hwren ni prena bara, rag may teppro an dus ma?’ 6Ev a leveris hemma dh'y brevi; rag ev y honan a wodhva pandr'a vynna y wul. 7Felip a worthybis dhodho, ‘Ny via bara a dhew kans diner lowr ragdha, rag may kemmerro pubonan temmik.’ 8Onan a'y dhyskyblon, Androw broder Simon Peder, a leveris dhodho, 9‘Yma maw omma, ha dhodho pymp torth-vara heydh ha dew bysk vyghan; mes pyth yw henna rag kemmys tus?’ 10Yn-medh Yesu, ‘Gwrewgh dhe'n wer esedha.’ Lemmyn yth esa meur a wels y'n tyller. Ytho an wer a esedhas, a-dro dhe bymp mil aga niver. 11Ytho Yesu a gemmeras an torthow ha wosa ri grasow ev a ros dhe'n re esedhys,#6:11 dhe'n re esedhys: War-lergh re a'n dornskrifow dhe'n dhyskyblon, ha'n dhyskyblon dhe'n re esedhys. hag y'n keth vaner a'n puskes, kemmys dell vynnsons. 12Pan vons lenwys, ev a leveris dh'y dhyskyblon, ‘Kuntellewgh an brewyon yw gesys, rag na vo kellys travyth.’ 13Ytho i a's kuntellas, ha lenwel dewdhek kanstellas a vrewyon a'n pymp torth heydh, ha re bia moy es lowr dhe'n re a dhybris. 14Ena an dus, pan welsens an tokyn a wrug Yesu, a leveris, ‘Hemma dhe wir yw an profoes a dal dos y'n bys.’
15Ytho pan wodhva Yesu i dhe dhos dh'y dhalghenna gans nerth rag y wul myghtern, ev eth dhe-ves arta y'n menydh, y honan.
Kerdhes war an Mor
Mat 14:22-27; Mark 6:45-52
16Ha devedhys an gorthugher, y dhyskyblon eth yn-nans dhe'n mor, 17hag entra a-bervedh yn gorhel, ha mos dres an mor, troha Kapernaum. Seulabrys tewl o hi, ha ny veu Yesu hwath devedhys dhedha. 18Ha'n mor a dhrehevis drefenn gwyns meur esa ow hwytha. 19Ytho pan wrussens roevya neb pymp erowhys warn ugens, i a welas Yesu ow kerdhes war an mor, hag ow tos nes dhe'n gorhel; hag own 20Mes yn-medh ev dhedha, ‘My yw; na berthewgh own.’ 21Ena i a vynnas y gemmeres a-bervedh y'n gorhel, ha hware an gorhel a dheuth dhe'n lann mayth esens ow mos.
Yesu, Bara Bewnans
22Ternos, an routh ow kortos a'n tu arall dhe'n mor a welas na via gorhel arall ena saw onan, ha na wrussa Yesu mos a-bervedh y'n gorhel dh'y dhyskyblon, saw unnsel y dhyskyblon a wrussa mos dhe-ves. 23Mes gorholyon erell a dheuth dhiworth Tiberias, ogas dhe'n tyller may tyb'sens an bara, wosa an Arloedh dhe ri grasow. 24Ytho pan welas an routh nag esa Yesu ena, na'y dhyskyblon, i ynwedh eth a-bervedh yn gorholyon ha dos dhe Kapernaum, ow hwilas Yesu.
25Ha pan y'n kavsons a'n tu arall dhe'n mor, yn-medhons dhodho, ‘Rabbi, p'eur hwrussys dos omma?’ 26Yesu a worthybis dhedha ha leverel, ‘Yn hwir, yn hwir y lavarav dhywgh, ny'm hwilowgh drefenn hwi dhe weles toknys, mes drefenn hwi dhe dhybri a'n torthow ha bos lenwys. 27Na lavuryewgh rag boes a wra pedri, mes rag boes a dhur bys yn bewnans heb diwedh, hag a wra Mab an den y ri dhywgh; rag warnodho Duw an Tas re settyas y sel.’ 28Ytho yn-medhons dhodho, ‘Pandr'a wren rag kowlwul oberow Duw?’ 29Yesu a worthybis ha leverel dhedha, ‘Hemm yw ober Duw, hwi dhe grysi ynno ev neb a wrug y dhannvon.’ 30Rakhenna yn-medhons dhodho, ‘Py tokyn a wredh ytho, rag may hwellyn ha krysi ynnos? Pandr'a wredh y oberi? 31Agan tasow a dhybri manna y'n gwylvos, dell yw skrifys: “Ev a ros dhedha bara a nev dhe dhybri.” ’ 32Ytho Yesu a leveris dhedha, ‘Yn hwir, yn hwir y lavarav dhywgh, nyns o Moyses neb a ros dhywgh an bara a nev, mes ow Thas yth yw neb a re dhywgh an gwir vara a nev. 33Rag bara Duw yw ev neb a dheu yn-nans dhiworth nev hag a re bewnans dhe'n bys.’ 34Ytho i a leveris dhodho, ‘Arloedh, ro dhyn an bara ma bynitha.’
35Yesu a leveris dhedha, ‘My yw an bara a vewnans; neb a dheu dhymmo vy nown bynitha, ha neb a grys ynnov vy ny'n jevydh syghes nevra. 36Mes my a leveris dhywgh, hwi re'm gwelas, ha ny grysowgh. 37Pup-tra a re an Tas dhymm a dheu dhymm, ha piwpynag a dheffo dhymm, ny wrav vy nevra y dewlel mes. 38Rag nyns ov vy devedhys yn-nans dhiworth nev dhe wul ow bolonjedh ow honan, marnas bolonjedh neb a'm dannvonas. 39Ha hemm yw bolonjedh neb a'm dannvonas, ma na wrylliv kelli travyth a bup-tra re ros ev dhymm, mes y dhrehevel yn-bann dydh fin. 40Rag hemm yw bolonjedh ow Thas: pubonan a wel an Mab ha krysi ynno a gyv bewnans heb diwedh, ha my a'n drehav dydh fin.’
41Rakhenna an Yedhewon a grodhvolas warnodho, rag ev dhe leverel, ‘My yw an bara a dheuth yn-nans dhiworth nev’, 42hag yn-medhons, ‘A nyns yw hemma Yesu mab Yosep neb a aswonnyn y das ha'y vamm? Fatell lever ytho, “Devedhys ov vy yn-nans dhiworth nev”?’ 43Yesu a worthybis ha leverel dhedha, ‘Na grodhvolewgh yntredhowgh. 44Ny yll denvyth dos dhymmo vy marnas an Tas neb a'm dannvonas a'n tenn; ha my a'n drehav dydh fin. 45Skrifys yw y'n brofoesi, “Hag i oll a vydh dyskys gans Duw.” Seul a woslow orth an Tas ha dyski anodho, a dheu dhymmo vy. 46Nyns yw, nebonan dhe weles an Tas; marnas ev neb usi dhiworth Duw, ev re welas an Tas. 47Yn hwir, yn hwir y lavarav dhywgh, neb a grys#6:47 neb a grys: War-lergh re a'n dornskrifow neb a grys ynnov vy. a'n jeves bewnans heb diwedh. 48My yw an bara a vewnans. 49Agan tasow a dhybri manna y'n gwylvos, hag i a verwis. 50Hemm yw an bara a dheu yn-nans dhiworth nev, rag may teppro den anodho, ha na varwo. 51My yw an bara bew a dheuth yn-nans dhiworth nev; mar teber den a'n bara ma, ev a vew bynitha; ha'n bara a rov yw ow hig, rag bewnans an bys.’
52Rakhenna an Yedhewon a gedrynnas an eyl gans y gila, ow leverel, ‘Fatell yll hemma ri dhyn kig#6:52 kig: War-lergh re a'n dornskrifow y gig. dhe dhybri?’ 53Ytho Yesu a leveris dhedha, ‘Yn hwir, yn hwir y lavarav dhywgh, marnas hwi a dheber kig Mab an den, hag eva y woes, ny'gas beus bewnans ynnowgh agas honan. 54Piwpynag a dheppro ow hig hag eva ow goes a'n jeves bewnans heb diwedh, ha my a'n drehav dydh fin. 55Rag ow hig yw boes yn hwir, ha'm goes yw diwes yn hwir.#6:55 War-lergh re a'n dornskrifow Rag ow hig yw gwir voes, ha'm goes yw gwir dhiwes. 56Piwpynag a dheppro ow hig hag eva ow goes a drig ynnov vy, ha my ynno ev. 57Dell y'm dannvonas an Tas bew, ha my a vew der an Tas, yndella neb a'm deber, henna a'n jevydh bewnans dredhov vy. 58Hemm yw an bara a dheuth yn-nans dhiworth nev. Nyns yw kepar ha pan dhybri an tasow,#6:58 kepar ha pan dhybri an tasow: War-lergh re a'n dornskrifow kepar ha pan dhybri an tasow an manna. hag i a verwis; neb a dheber an bara ma a vew bynitha.’ 59Ev a gewsis an taklow ma y'n synaga, hag ev ow tyski yn Kapernaum.
An Geryow a Bewnans heb Diwedh
60Rakhenna, lies a'y dhyskyblon pan glewsons hemma a leveris, ‘Kales yw an lavar ma; piw a yll y glewes?’ 61Yesu, ow konvedhes y dhyskyblon dhe grodhvolas a-dro dhe hemma a leveris dhedha, ‘A wra hemma agas sklandra? 62Pandra ytho mar kwelowgh Mab an den owth yskynna dhe'n tyller mayth esa kyns? 63An Spyrys yth yw neb a re vewnans; nyns eus prow vyth y'n kig. An geryow a gowsav dhywgh, yth yns i spyrys, ha bewnans. 64Mes yma re yntredhowgh neb na grysons.’ Rag Yesu a wodhva a'n dalleth piw ens i neb na gryssons, ha piw o neb a wrussa y drayta. 65Hag yn-medh ev, ‘Rakhenna my a leveris dhywgh, na yll denvyth dos dhymmo vy marnas hemm yw grontys dhodho gans ow Thas.’
66Alena rag lies a'y dhyskyblon eth war-dhelergh, ha ny gerdhens ganso namoy. 67Ena Yesu a leveris dhe'n dewdhek, ‘Hwi ynwedh, a vynnowgh hwi mos yn-kerdh?’ 68Simon Peder a worthybis dhodho, ‘Arloedh, piw y hwren ni mos dhodho? Yma dhis an geryow a vewnans heb diwedh. 69Ha ni a grys, hag a woer ty dhe vos an Sans a Dhuw.’#6:69 ty dhe vos an Sans a Dhuw: War-lergh re a'n dornskrifow ty dhe vos an Krist, Mab an Duw bew. 70Yesu a worthybis dhedha, ‘A ny wrugavy agas dewis, agas dewdhek? Hag onan ahanowgh yw dyowl.’ 71Ev a gewsi a Yudas mab Simon Skaryoth; rag ev, onan a'n dewdhek, a vedha orth y drayta.
Currently Selected:
Yowann 6: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023