LATE 98
98
Adihtatna zieh a Mangpa phatna ding
Phatna la.
1Aw Mangpa pahtawi in la tha sa un,
aziehpen Aman sillamdangte abawlta a,
akhut zietlam leh aban siengthouin Ama aguolzou sahta hi.
2Mangpa’n ahundamna atheisahta a,
adihtatna namte mitmu ah chientah in a langsahta hi.
3Aman Israel innkuonte tungah akhotuona leh,
agin umna athei ngitnget hi.
Kawlmong tan a mi zousie in i Pasian uh,
hundamna amu suohta uhi.
4Leitung luo zousiete aw,
Mangpa pahtawi in nuomtahin aphatna la sa in kikou un.
5Mangpa phat in kaiging toh la sa unlen,
tumging leh phatna lasah ging toh.
6Pengkul ging leh belamtal kii kimut ging toh,
Lengpa, Mangpa mai ah nuomtah in kikou un.
7Tuipi leh a sunga um zousie ging zoizoi uhenlen,
leitung leh asunga um zousie toh.
8Luipiten akhut uh beng uhenlen,
muolten Mangpa masangah nuom in la sa khawm uhen.
9Aziehpen, Ama leitunga vaihawm dinga hing pei ding ahi.
Aman dihtatna toh leitung pumpi vai ahawm dinga,
khentuom neilou in vai ahawmpieh ding hi.
Currently Selected:
LATE 98: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.