AndersVoorbeeld

Jou Ander Denke

Fisieke en emosionele pyn het 'n manier om ons brein te verander. Wanneer jy jouself verbrand verander jou denke oor hoe jy oor vuur dink. Dit is hoe 'n moeilike diagnose 'n lewenstyl verander, wat dikwels passievolle voorstanders skep in die stryd om nuwe geneesmiddels uit te vind. Wanneer pynlike realiteite ons liggame binnedring, of die liggame van mense vir wie ons lief is, verander dit ons denke vir altyd. 

Petrus het dit eerstehands ervaar, veral omdat dit verband hou met sy gedagtes oor lyding. In Matteus 16 het Jesus sy eie lyding en dood voorspel. Petrus het Jesus eenkant toe geneem en Hom berispe! Jesus het egter na Petrus toe gedraai en vir hom gesê: “Moenie in my pad staan nie, Satan! Jy is vir My 'n struikelblok, want jy dink nie aan wat God wil hê nie, maar aan wat die mense wil hê" (Matteus 16:23). Treffend. Later, toe Petrus sien hoe Jesus gedurende die kruisiging ly, het hy Hom verloën, uit vrees vir sy eie lewe. Tog het iets omtrent hierdie pynlike ervarings vir Petrus verander. 

Pynlike ervarings lei dikwels tot kragtige passie.

Toe Petrus in 1 Petrus 4:1 oor lyding geskryf het, was hy 'n man met 'n nuwe uitkyk op lyding. Toe hy lyding beskryf het, het hy dieselfde woord, páschō, gebruik wat Jesus met hom in Matteus 16 gebruik het. Petrus het hierdie selfde woord regdeur 1 Petrus gebruik, en vandaar ons moderne woord “passie.” Páschō is die rede waarom ons na Jesus se verhoor, kruisiging en opstanding verwys as die Lydenstyd. Pynlike ervarings lei dikwels tot kragtige passie.

Jesus se fisieke pyn, sy páschō, behoort die basis van ons passie te wees. Jesus se dood en opstanding het die uiteindelike krag om ons denke te verander, en ook ons gedrag te verander. Dit is hoekom Petrus sy vierde hoofstuk so begin het: “Omdat Christus dan liggaamlik gely het, moet julle julleself met dieselfde gedagte bewapen, en self bereid wees om liggaamlik te ly. As julle bereid is om liggaamlik te ly, het julle met die sonde afgereken" (1 Petrus 4:1).

Klaar met sonde. Dit is wat die passie van Jesus kan doen. Met watter sonde in jou lewe wil jy klaar wees? Watter onreg is jy gereed om te beveg?

Terwyl jy vandag 1 Petrus 4 lees, vra God om jou te wys hoe Jesus se fisieke pyn en passie jou denke kan verander en jou die voorneme gee om klaar te wees met sonde. Vra ook vir God om jou te wys hoe om te bid vir mense regoor die wêreld wat fisieke en emosionele vervolging ly terwille van hul geloof. Ten slotte, as jy terwille van jou geloof vervolg word, weet dat jy geselskap het in jou páschō met Jesus. 

Bid: Jesus, dankie vir u lyding en passie om my vry te maak van sonde. Dankie dat U vir my 'n rede gee om passievol vir U te lewe. Ek vra U, Jesus, om 'n aanwesige vertroosting en hulp te wees vir mense wat vir hulle geloof vervolg word. Amen.