Matiye 1
1
Yiezu ɓà nɛnkɛ̃nù
Lik 3.23-38
1Lɛ iè Yiezu Kirisa ɓà nɛnkɛ̃nù. Àpe Yiezu Kirisa iè Daviide hũn yɛ̀nù, à Daviide ɛ́ ɓiɛ̀ iè Abarahaamu hũn yɛ̀nù. 2Á Abarahaamu ɛ́ tɔn ɔ̀ Yizaake, á Yizaake ɛ́ tɔn ɔ̀ Zakɔɔbu, á Zakɔɔbu ɛ́ tɔn ɔ̀ Zuda àá ɓá zɛ̀ɓɛ̀. 3Á Zuda ɛ́ tɔn ɔ̀ Perɛɛze àá Zera, ɓɛ̀pe zɛ̀ɓɛ̀ bìɛ ɲu sɔ ɓà nín ɛ́ pɛ̃̀hṹ iè Tamaare. á Perɛɛze ɛ́ tɔn ɔ̀ Hɛserɔn, á Hɛserɔn ɛ́ tɔn ɔ̀ Araamu. 4Á Araamu ɛ́ tɔn ɔ̀ Aminadaabu; á Aminadaabu ɛ́ tɔn ɔ̀ Nasɔn; á Nasɔn ɛ́ tɔn ɔ̀ Salema; 5Á Salema ɛ́ tɔn ɔ̀ Booze, ápe Booze ɓà nín ɛ́ pɛ̃̀hṹ iè Rahaabu; Á Booze ɛ́ tɔn ɔ̀ Obɛɛde, ápe Obɛɛde ɓà nín ɛ́ pɛ̃̀hṹ iè Ruuti; 6Á Obɛɛde ɛ́ tɔn ɔ̀ Zese; á Zese ɛ́ tɔn ɔ̀ bɛ́zuú Daviide. Á Daviide ɛ́ tɔn ɔ̀ Salomɔn, ápe Salomɔn ɓà nín ɛ́ hàarí iè ɔ̀ Uiri lɛ húrun ɓà hṹnu. 7Á Salomɔn ɛ́ tɔn ɔ̀ Roboamu; á Roboamu ɛ́ tɔn ɔ̀ Abiya; Á Abiya ɛ́ tɔn ɔ̀ Azaafu; 8Á Azaafu ɛ́ tɔn ɔ̀ Zozafaate; Á Zozafaate ɛ́ tɔn ɔ̀ Yoraamu; á Yoraamu ɛ́ tɔn ɔ̀ Oziasi; 9Á Oziasi ɛ́ tɔn ɔ̀ Yotaamu; á Yotaamu ɛ́ tɔn ɔ̀ Akaaze; á Akaaze ɛ́ tɔn ɔ̀ Ezekiasi; 10Á Ezekiasi ɛ́ tɔn ɔ̀ Manasee; Á Manasee ɛ́ tɔn ɔ̀ Amɔn; á Amɔn ɛ́ tɔn ɔ̀ Zoziasi; 11Á Zoziasi ɛ́ tɔn ɔ̀ Yekonia àá ɓá zɛ̀ɓɛ̀ pɛ̃̀hṹ lɛ ɛ́ ɓɛ́ Babilɔɔnɛ siè ɛ́ dàa ɓɛrɛ ɓaakɛa ɓɛ̀ Yizarayɛɛle nìɛ dàa van ɓɛ́ cɛ̃̀mɛ̀nɛ́ hũn.
12Ɛ́ hɔ́ lɛ ɛ́ ɓɛ́ Yizarayɛɛle nìɛ ɛ́ ɓɛ́ ɓaakɛa dàa van hɔ̀ Babilɔɔnɛ cɛ̃̀mɛ̀nɛ́ hũn vɔ́, á Yekonia ɛ́ tɔn ɔ̀ Seyatiɛli; á Seyatiɛli ɛ́ tɔn ɔ̀ Zorobabɛɛle; 13Á Zorobabɛɛle ɛ́ tɔn ɔ̀ Abiyuude; á Abiyuude ɛ́ tɔn ɔ̀ Eliakiimu; á Eliyakiimu ɛ́ tɔn ɔ̀ Azɔɔre; 14Á Azɔɔre ɛ́ tɔn ɔ̀ Sadɔɔke; á Sadɔɔke ɛ́ tɔn ɔ̀ Akiimu; á Akiimu ɛ́ tɔn ɔ̀ Eliyuude; 15Á Eliyuude ɛ́ tɔn ɔ̀ Eleazaare; á Eliazaare ɛ́ tɔn ɔ̀ Matan; á Matan ɛ́ tɔn ɔ̀ Zakɔɔbu; 16Á Zakɔɔbu ɛ́ tɔn ɔ̀ Zozɛɛfu lɛ iè ɔ̀ Maari ɓà bɛ́rɔ; á Maari ɛ́ tɔn ɔ̀ Yiezu lɛ ɛ́ ɓɛ́ wóò ve nɛ Kirisa. 17Ɛ̀ dàá mìí ɔ́ Abarahaamu pɛ̃̀hṹ ǹ fúu ɓen dɛ̃ a Daviide pɛ̃̀hṹ, ɛ́ hɔ́ iè zĩhĩ́ɛ ɲúuhɛ̃ pírú àá bɔ̀nbɔ̀ nɛ́ bɛ́rɔ àá ɓɛ́ pɛ̃̀hṹ ɛ́ temu sɛ̃̀mɛ́kɛa ɓá ǹ. Ɛ̀ bĩní dàá mìí ɔ́ Daviide pɛ̃̀hṹ ǹ fúu ɛ̀ ɓen dɛ̃ lè yìi lɛ ɛ́ ɓɛ́ dàa ɓɛrɛ ɓaakɛa ɓɛ̀ Yizarayɛɛle nìɛ ɛ́ dàa van hɔ̀ Babilɔɔnɛ cɛ̃̀mɛ̀nɛ́ hũn, ɛ́ hɔ́ iè zĩhĩ́ɛ ɲúuhɛ̃ pírú àá bɔ̀nbɔ̀ nɛ́ bɛ́rɔ àá ɓɛ́ pɛ̃̀hṹ ɛ́ temu sɛ̃̀mɛ́kɛa ɓá ǹ. Ɛ̀ bĩní dàá mìí àá lé yìi lɛ ɛ́ ɓɛ́ dàa ɓɛrɛ ɓaakɛa ɓɛ̀ Yizarayɛɛle nìɛ fúu ɛ̀ ɓen dɛ̃ a Kirisa tenlɔ́, ɛ́ hɔ́ iè zĩhĩ́ɛ ɲúuhɛ̃ pírú àá bɔ̀nbɔ̀ nɛ́ bɛ́rɔ àá ɓɛ́ pɛ̃̀hṹ ɛ́ temu sɛ̃̀mɛ́kɛa ɓá ǹ.
Yiezu Kirisa tenlɔ́ bòo
Lik 2.1-7
18Lɛ iè bòo lɛ ɛ́ Yiezu Kirisa ɛ́ dàa tɔn. Ɓà nín Maari ɓà ńtɛ̃́un ɛ́ hàarí iè Zozɛɛfu. Ɛ́ pɛ̃̀hṹ lɛ ɛ́ ɓɛ́ lò ɲɛùn yí yɛ ɓán ɛ̀ kansí ɓánlɔ̀n, ɛ̀ lè Mɛkɛ̃n-Sãanu pànkɛ́ ɛ́ lɛ́ á Maari ɛ́ tù púo. 19Ɛ́ ɓà ńtɛ̃́un Zozɛɛfu lɛ iè nìnbírɔ lɛ ɛ́ cã̀aní ɛ́ den yí wɛ nɛ mí yaa piè yèrè wɛ̀. Á nɛ mii ɓé ɓɛ́ ńtɛ̃́un yáanú kɛ́ mí yá bie bòo dɔ̀ ɛ́ lɛ́ nìnbírɔ dɔ̀ ǹ wɛ̀. 20Ɛ́ hɔ́ lɛ á Zozɛɛfu ɛ́ mí hũn ɛ̀ vɛ̀ pehɔ̀ lɔ̀n, ɛ́ Ɲunsɔ mɛlɛkɛ dɔ̀ ɛ́ ɓɛrɛ zɛ̃́niɛ míte ɔ̀ ǹ hɔ̀ dɛ̀woò hũn à bie lɛ́ à ǹ ɛ́ nɛ làa: «Zozɛɛfu, Daviide hũn yɛ̀nù, bí zán ɛ̀ bie nɛ kɔ́ yí kɔ yɛ́ á Maari wɛ̀; iè hɔ lɛ ɛ́ lé iè Mɛkɛ̃n-Sãanu temu lɛ́ á dàa tù hɔ̀ púo.» 21À ɓén te bɛ́zikíì, ɛ̀ kɔ̀ cé piè yèrè nɛ Yiezu, iè hɔ̀ lɛ ápe ɛ́ te ɓá dàa nìɛ ɛ́ ɓén fuenínin ɛ́ lé peɓɛ̀ bɔ̀koohɛ̃ hũn.
22Hɔ̀pe sí míkùi ɛ́ wɔ́ kɛ̀amu, bòo lɛ wé ɛ̀ hɔ̀ bòo lɛ ɛ́ Dɔfĩn hàarí bie àá mí bɔ̀háanírɔ ɲunù ɛ̀ dàá ɲunù tí. Hɔ̀ den hàarí ɛ́ nɛ làa:
23 «Mì húi, à ńyentí lɛ ɲɛùn yí dũ bɛ́rɔ ɛ́ ɓén tì púo, à ɛ́ te bɛ́zikíì.
Ɛ́ ɓɛ́ ɓén cé piè yèrè nɛ Emanuwɛɛle,
iè bòo ɛ́ ɓɛ́ nɛ: Dɔfĩn wi àá kie.»
24Ɛ́ hɔ́ lɛ á Zozɛɛfu ɛ́ yìe fɛ́, ɛ́ hɔ́ bòo lɛ á Ɲunsɔ mɛlɛkɛ ɛ́ bie lɛ́ à ǹ iè pe á hĩ́nà wɔ́, à fɔ́ á Maari ɛ́ yan. 25Kɛ́ á den yí dɛ̃ a yí mi wɛ̀. fúu á van tɔn mí zuú á Zozɛɛfu ɛ́ cɔ́ yèrè nɛ Yiezu.
Currently Selected:
Matiye 1: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation