Juan 3
3
Jaꞌ Skꞌaneal Yet Jix Kꞌanabꞌ Jesús Yetoj Naj Nicodemo
1Ey jun naj Fariseo Nicodemo sbꞌi, yaaw yeoc naj snan xol ebꞌ yet Israelal, cꞌal snan xol ebꞌ yet yaawilal. 2Jaꞌ naj Nicodemo tiꞌ, jix apni naj scꞌatan Jesús yet jun akꞌbꞌalil. Jix yalon naj tet Jesús jaxca tiꞌ:
—Jaach Cuywam, kotaj jon tol Dios jix jaach aontej yu cu cuyomaloj jon. Yutol asan yetoj yipal Dios chi cꞌal skeꞌ xꞌoxle milagro jaxca cha wun tiꞌ, ẍi naj tet Jesús. 3Catuꞌ jix yalon Jesús tet naj jaxca tiꞌ:
—Caw yel chi wal ey jaach an, jaꞌ mactxequel cꞌam chi ali el yet scaelal, ma skeꞌ yoc yul skꞌabꞌ Dios, ẍi Jesús tet naj. 4Catuꞌ jix skꞌanlen pax naj Nicodemo tuꞌ:
—Jaꞌ junoj icham ánima xa, ¿tzet utbꞌil chi yun yali el yet scaelal? ¿Tumi chi to skeꞌ yoc yin xutx junelxa, catuꞌ chi ali el junelxa? ẍi naj tet Jesús. 5Catuꞌ jix takꞌwi Jesús jaxca tiꞌ:
—Caw yel chi wal ey jaach an, jaꞌ mac cꞌam chi ali yu jaꞌ, cꞌal yu Yespíritu Dios, ma skeꞌ yoc yul skꞌabꞌ Dios. 6Jaꞌ mactxequel chi ali el yin ánima, ánima toni, jal pax mactxequel chi ali el yu Espíritu, chi oc can Yespíritu Dios yin. 7Manche qꞌueya ja cꞌul yutol chi wal wan tiꞌ, tol sowalil chi ali el masanil ánima yin scaelal. 8Jaꞌ kaꞌeꞌ chi too bꞌeytuꞌ chi yal scꞌul chi toocoj. Chi kabꞌ yeqꞌui, man pax kotajoj bꞌey chi toocoj. Queyton tuꞌ ebꞌ chi ali yu Yespíritu Dios, cꞌam chi kil yin Yespíritu tuꞌ, chi kil pax tzet chi yun kin, ẍi Jesús tet naj.#3:8 Jaꞌ wan tiꞌe jix yal Jesús, jaꞌton Griego cꞌal Hebreo. Jaꞌ yin caabꞌ tiꞌeal tiꞌ, junne kꞌane chi yal yeloc apnoj “espíritu,” cꞌal “kaꞌeꞌ”. 9Catuꞌ jix skꞌanlen naj Nicodemo tuꞌ junelxa:
—¿Tzet utbꞌil oj yun wan tiꞌ? ẍi naj tet Jesús. 10Catuꞌ jix takꞌwi Jesús jaxca tiꞌ:
—¿Tumi man ja wotaj oj wan tiꞌ xin? Ilaꞌ tol cuywam jaach pax xol ebꞌ ket Israelal. 11Caw yel chi wal ey jaach an, jaꞌ tzet kotaj, jaꞌ chi kalaꞌ. Jaꞌ tzet chi kil yetoj cu sat, jaꞌ chi kal pax oj. Jal jex jaex tiꞌ, cꞌam che chaꞌ pax je yabꞌ tzet chi kal ey jex. 12Ta cꞌam che chaꞌ pax je yabꞌ tzet chi wal ey jex yu tzettaj yetal ey yul yibꞌankꞌinal tiꞌ, ¿tumi oj je chaꞌ pax je yabꞌe, ta jaꞌ tzettaj yetal ey satcan chi waltej ey jex? 13Cꞌamto junoj mactxequel chi bꞌetecꞌ bꞌey satcan. Jal jin xin, jatuꞌ titnaj jin, yutol jain Akꞌbꞌil Wopiso xol ebꞌ ket animail yu Dios, /a satcan jin./ 14Jain tiꞌ, jain Akꞌbꞌil Wopiso yu Dios xol ebꞌ ket animail, jaxca cꞌal jix yute stꞌunbꞌan a jun chꞌen yechel labꞌa naj Moisés bꞌey cusiltaj txꞌotxꞌ, queytuꞌ oj yun wa tꞌunan oj.#3:14 Jaꞌ bꞌey Números 21:6-9 chi ilcha skꞌaneal jun chꞌen labꞌa tiꞌ. 15Oj jin a tꞌunan oj, yet watxꞌ, jaꞌ masanil mactxequel chin aon oc yin scꞌul cꞌam chi qꞌueyeloj, tol oj ẍaꞌ cꞌal skꞌinal ebꞌ tol ey cꞌal yin tobꞌalkꞌinal.
Chi Camcꞌulnele Masanil Ánima Yu Dios
16Yu caw ey scamcꞌulal Dios yin ebꞌ yul yibꞌankꞌinal tiꞌ, yuxan jix yatej jun qꞌuetxan Scꞌaal. Jaꞌ mactxequel chi yaoc scꞌul yin Naj Scꞌaal Dios tuꞌ, man oj qꞌueyeloj, ey skꞌinal yin tobꞌalkꞌinal. 17Jix yatej jun Scꞌaal Dios yul yibꞌankꞌinal tiꞌ yu scolcha can el ánima, man yu oj sqꞌueyon can el ebꞌ. 18Jaꞌ mac chi yaoc scꞌul yin Scꞌaal Dios tuꞌ, jajbꞌil eloj. Jal pax mac cꞌam chi yaoc scꞌul yin Naj xin, majan ebꞌ yutol cꞌam chi yaoc scꞌul ebꞌ yin jun qꞌuetxan Scꞌaal Dios. 19Jain tiꞌ, jix jin eyol yul yibꞌankꞌinal tiꞌ yu wakꞌon sajkꞌinal yin spixan ebꞌ ánima. Ey pax ebꞌ cꞌam chi ochen jun sajkꞌinal tiꞌ, yuxan oj cꞌal cancan syaꞌilal yibꞌan ebꞌ. Asan kꞌejkꞌinal chi yoche ebꞌ, yutol asan spenail chi el yunen ebꞌ. 20Jaꞌ masanil ebꞌ chi unen spenail, ma yoche jun sajkꞌinal tiꞌ ebꞌ. Cꞌam chi yal scꞌul ebꞌ chi ẍaꞌ, yutol chi xiw ebꞌ ta chi txeclo el wan tzet man watxꞌoj chi el yunen ebꞌ tuꞌ. 21Jal pax ebꞌ chi jijen jaxca yalon jun cuybꞌanile jaꞌcaw yel, chi ẍaꞌ ebꞌ jun sajkꞌinal tiꞌ, yet watxꞌ chi txeclo eloj tol eyoc Dios yetoj ebꞌ yin tzet chi yunne, ẍi Jesús tet naj Nicodemo tuꞌ.
Jaꞌ Naj Juan Jix Yaltej Skꞌaneal Cristo Junelxa
22Jix lawi tuꞌ xin, catuꞌ jix too Jesús yetoj ebꞌ scuywom tuꞌ bꞌey Judea, catuꞌ jix can Naj jayebꞌ cꞌu yetoj ebꞌ tituꞌ. Catuꞌ jix yakꞌon bautizar ánima ebꞌ scuywom tuꞌ. 23Chi yakꞌon pax bautizar ánima naj Juan bꞌey jun lugar chi yij Enón, bꞌey scawilal Salim, yutol caw ey jaꞌ tituꞌ. Jix apni ebꞌ ánima scꞌatan, jix apni ebꞌ yakꞌ bautizar sbꞌa tet naj Juan tuꞌ. 24Jaꞌ yet cꞌamto chi ale oc naj Juan tuꞌ yul preso, catuꞌ jix yunen cꞌal wan tuꞌ. 25Ey jaywan ebꞌ scuywom naj Juan jix steele sbꞌa ebꞌ yetoj ebꞌ Israel, yu tzet chi yute sajbꞌanen spixan ánima. 26Yuxan, jix bꞌet yal ebꞌ jaxca tiꞌ tet naj Juan:
—Jaach Cuywam, jaꞌ jun jix ecꞌ ja wetoj bꞌey skꞌaxepal ecꞌtoj jaꞌ Jordán, jun jix ja wal ey jon, jaꞌ jun tuꞌ, lalan yakꞌon bautizar ebꞌ ánima tinaniꞌ. Caw ey ebꞌ lalan yapni scꞌatan Naj, ẍi ebꞌ tet naj Juan tuꞌ. 27Catuꞌ jix yalon naj tet ebꞌ jaxca tiꞌ:
—Cꞌam junoj mactxequel comon cꞌal chi oc yopiso, ta manaj Dios chi akꞌon tet. 28Jaex tiꞌ, jix je yabꞌ walon an, tol man jin Cristo oj an. Jain tiꞌ, tucꞌal bꞌabꞌel chejbꞌil jintej. 29Kꞌinaloj ey junoj nupil chi oc tinaniꞌ, jaꞌ naj chi nupi, chi yiꞌ junoj ix naj. Ta ey junoj yamigo naj eyecꞌ yetoj, chi cꞌal yabꞌ naj masanil tzet chi yal naj. Caw chi tzala naj sicꞌlebꞌil, chi yabꞌen naj tzet chi yal naj chi nupi tuꞌ. Queyton tuꞌ, chi yun jin tzala tinaniꞌ, yutol lalan yapni ebꞌ ánima scꞌatan Jesús.#3:29 Ey bꞌey chi yal yul Biblia yin nupil, tol yechel Dios yetoj conobꞌ Israel, ma Cristo yetoj yiglesia. Jaꞌ jun skꞌaneal tiꞌ, jaꞌ naj chi nupi, jaꞌton Cristo. Jaꞌ jun yamigo naj chi nupi tuꞌ, jaꞌton naj Juan Bautista. 30Jaꞌ Naj Jesús tuꞌ, sowalil chi a cꞌal can yopiso naj. Jal jin xin, cꞌuancꞌulal chi tancan ey wopiso, ẍi naj Juan tet ebꞌ scuywom tuꞌ.
Jaꞌ jun Mactxequel Titnaj Satcan
31Jaꞌ jun mactxequel eynajtej satcan, yaaw yeoc yibꞌan masanil ánima. Jal jaon a yul yibꞌankꞌinal jon tiꞌ, ánima jon cꞌal el cu masanil. Asan yet yul yibꞌankꞌinal tiꞌ chi kalaꞌ. Jal pax jun mac eynajtej satcan tuꞌ xin, yaaw yeoc kibꞌan cu masanil. 32Jaꞌ tzet abꞌbꞌil yu, yetoj tzet ilbꞌil yu, jaꞌ chi yalaꞌ, cꞌam wal mac chi chaꞌon pax yabꞌ tet. 33Ta ey ebꞌ chi chaꞌon yabꞌ tet naj, chi yakꞌ sbꞌa testigoal ebꞌ yin tzet utbꞌil tol caw yel chi yal Dios. 34Yutol jaꞌ jun mactxequel tuꞌ, jaꞌ Dios jix chejontej. Yuxan, jaꞌ skꞌane Dios chi yalaꞌ. Jaꞌ bꞌey jun tuꞌ, tzꞌajaji chi yun yakꞌon Yespíritu Dios tet. 35Scꞌaal cu Mam Dios jun tuꞌ, caw camcꞌulnebꞌil yu. Yuxan, jaꞌ Smam tuꞌ, jix aon oc masanil tzetyetal yul skꞌabꞌ yu yakꞌon cuenta. 36Jaꞌ mac chi yaoc scꞌul yin Naj Scꞌaal Dios tuꞌ, ey skꞌinal tol ey cꞌal yin tobꞌalkꞌinal. Jal pax mac cꞌam chi yaoc scꞌul yin Naj xin, ma ẍaꞌ kꞌinale ebꞌ tol ey cꞌal yin tobꞌalkꞌinal. Jaꞌ tiꞌ yet ebꞌ, tol chi eytej sjowal scꞌul Dios yibꞌan ebꞌ.
Currently Selected:
Juan 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.