Jṉ. 6
6
Jesus seṉku mir áishmaṉkan ayurawarma
(Mat. 14:13-21; Mar. 6:30-44; Ruk. 9:10-17)
1Nu naṉkaamasmatai Jesus Kariréa antumiaṉnum amain katiṉmiayi. Nu antumiaṉsha Tipirias antumiaṉ tuíniawai. Jimiará náartiniaiti. 2Untsurí shuar Jesus ti jáinian timiá wárik tsuan wáinkiaru ásar Nin nemariarmiayi. 3-4Israer shuara Paskua namperi̱ ishichik ajasmatai Jesussha ni unuiniamuri̱ji̱a̱i̱ nainnium waka nui̱ pujusmiayi. 5Jesussha untsurí aents wininian wainiak Jiripin chichaak “Timiá untsurí shuar ayuratniusha ¿tuya̱ṉ yurumak sumaktajⁱ?” tímiayi. 6Kame Jesuska Ni túrattana nuna neka asa Jirip warittiṉ tusa tímiayi. 7Jiripsha nuyá̱ chichaak “Timiá nukap kuitji̱a̱i̱ paṉ sumakmesha ashí ishichik susamsha jeachaintjia” tímiayi. 8Nuyá̱ chíkich unuiniamuri̱ Antres, Pitru yachi̱, chichaak 9“Uchi ju̱i̱ seṉku páṉkan jimiará namakja̱i̱ takakui. Ausha timiá untsurínmasha jeatpiash” tímiayi. 10Nuya̱ṉka “Ashí pujustarum titiarum” tímiayi Jesus.
Áishmaṉsha nuwa̱sha uchisha irunmiayi. Tura chírichri núkap aa asamtai nui̱sha seṉku mir áishmaṉ pujusármiayi. 11Jesussha nu páṉkan achik Yusan yumiṉkias ni unuiniamuri̱n susamiayi. Nisha ashí nui̱ pujuinian súsarmiayi. Namaknasha núnisaṉ ashí ni wakeriarmiania nuna súsarmiayi.
12Jémararmataisha Jesus ni unuiniamuri̱n chicharainiak “Ampirma júukrum chaṉkinnium chumpíatarum. Wasurnáka̱i̱ṉ” tímiayi. 13Nisha seṉku paṉnumia̱ ampirman júukar tuse chaṉkinnium áimkiarmiayi.
14Nu shuarsha Jesus túramun iisar “Ju̱ nekas Yúsnan etserin tátinia núchakait” tiármiayi. 15Shuar Jesusan úunt akupin awajsataj tutai Jesus nekáa Niṉki nainnium wémiayi.
Jesus entsá pátatek wekasamu
(Mat. 14:22-27; Mar. 6:45-52)
16Kí̱akui̱ Jesusa unuiniamuri̱ antumiaṉnum wéarmiayi. 17Káshisha Jesus tuke táchamtai uunt kanunam eṉkemáwar Kapernáumnum wénak jíinkiarmiayi. 18Tura nase ti umpuakui chíchimi ti wajaimiayi. 19Ajapén ajasár Jesus entsá pátatek nanamas tíjiu̱ch winian wáinkiar ashamkarmiayi. 20Tura Jesus “Witjiai. Ashamprukairap” tímiayi. 21Núja̱i̱ṉkia ti shiir warasar kanunam itiaawarmiayi. Tura nu chichamtaik ni wéamunam jeawarmiayi.
Aents Jesusan e̱a̱k wekainiamu
22Kashincha chíkich shuar amain ayuramunam kanararu nekaawarmai. Jesusa unuiniamuri̱ Jesusja̱i̱nchu chikichik kanu amia nuja̱i̱ wéarun nekaawarmai. 23Nui̱ matsatai̱ Tipiriasnumia̱ chíkich kanu táarmiayi. Ya̱u̱ Jesus Yusan yumiṉkias páṉkan ayuramunam tíjiu̱ch táarmatai 24nu shuar Jesussha ni unuiniamuri̱sha nui̱ atsuiniakui nu kanunam eṉkemáwar Kapernáumnum Jesusan e̱a̱ktajtsa wéarmiayi.
Jesus apatkua áintsaṉkete
25Entsa amain Jesusan wáinkiar chicharainiak “Uuntá, ¿urutía ju̱i̱sha támam?” tuíniakui 26Jesus chichaak “Ti nekas tájarme. Aents tujintiamu wainkia asarum e̱a̱ttsurme. Aya paṉ yuárum jémaru asarum e̱a̱ttrume. 27Ju̱yá̱ yurumak amuukatin asamtai ti enentáimtuschatnuitrume̱. Antsu amuukashtin yurumak tuke iwiaaku pujustinian amaana nu takarsatniuiti. Nú yurumkanka Wi Aents Ajasu asan susattajrume. Tú tusa Yus Apa nuna túratniun surusuiti” tímiayi. 28Takui̱ “¿Warí túratniuitiajⁱ Yus wakerana nu umiktin?” tiármiayi. 29Nuikia Jesussha chichaak “Yus akupta asa Winia enentáimtursarat tusa wakerawai” tímiayi. 30Takui̱ “¿Aentsti tujintiamuka ii iisar Ámin nekas enentáimtustin warí túrattam? 31Yaunchu ii uuntri̱ aents atsamunam maná yurumkan nayaimpinmaya̱ susamun yurumáwarmiayi. Yus Chichamnum nuní̱ áarmaiti ‘Nayaimpinmaya̱ yurumkan Yus susamiayi’” Jiin. 16:4 tiármiayi.
32Tuíniakui Jesus “Wi tájana nu ti nekasaiti. Muisais atumín nayaimpinmaya̱ yurumkan súsachmiayi antsu Winia Aparka nekas apatkun nayaimpinmaya̱n súramprume. 33Iis, Yusai̱ya̱ apatkuka nayaimpinmaya̱ tara núiti. Tuma asa ashí shuaran nekas iwiaakman suawai” tímiayi. 34Takui̱ “Uuntá, nu apatuk tuke amasta” tiármiayi.
35Tura Jesus chichaak “Witjiai nu apatuk nekas iwiaakman súana nu. Winí̱ winiana nú shuar peṉké tsukamáshtatui tura Winia enentáimturna nusha tuke kitiarchattawai. 36Túrasha wáinkiurmesha Winia chichamur anturtatsrume. 37Ashí shuaran Winia Apar tsaṉkatrukarmiania nu, Wí shuar ajasártatui. Winin winiana núnaka peṉké nakitrashtatjai. 38Wi wakeraj nuna túratniun táchaitjiai antsu Winia akuptúkmia nuna umirkatniun táwitjiai. 39Winia Apar akuptúkuiti tura ju̱na wakerawai. Ashí winia tsaṉkatrukman emeṉkátsuk amuukatin tsawantai̱ iniantkiarat tusa wakerawai. 40Yus Apa wakerana nu ju̱i̱ti. Ashí shuar Winia ‘Yusa Uchirí̱nti’ tu enentáimturkui yamaram iwiaakman tuke takusat tusa wakerawai. Nú shuarnaka amuukatin tsawantai̱ iniantkíttiajai” tímiayi Jesus.
41Tura Jesus “Witjiai, nayaimpinmaya̱ apatuk akupkámu” takui̱ Israer shuar Jesusan áujmatiarmiayi. 42Chicharainiak “Ju̱ Jesuschakait, Jusé uchirí̱ya nu. Iikia ni aparí̱sha nukurí̱sha nékatsjik. ¿Itiurak ‘Nayaimpinmaya̱ táraitjiai’ taa?” tiármiayi. 43Jesussha chichaak “Tu áujmatrusairap. 44Winia Apar shuaran akuptúrkachuitkiuiṉkia peṉké weantúrkachainti. Tura Winia akupturna nuna amuukatin tsawantai̱ iniantkíttiajai. 45Yúsnan etserniu áarmari̱n tawai ‘Ashí Yus jintintiámu ártatui.’ Isa. 54:13 Núnisaṉ ashí Yusa Chichame̱n antukar unuimiátainiakka Winí̱ táiniawai. 46Aya Yusai̱ya̱ tauwa nuke Yúsnaka wáinniuiti. Chíkichkia peṉké wáinkiachuiti. 47Ti nekasan tájarme. Winia enentáimturna nú shuarka yamaram iwiaakman amuukashtinian takakui. 48Wikia iwiaakman súana nú apatkuitjiai. 49Iis, atumí uuntri̱ aents atsamunam maná yurumkan yuáwariatcha ashí jákarmiayi. 50Antsu nayaimpinmaya̱ tara nú apatkun shuar yúakka jákachartatui. 51Wikia nayaimpinmaya̱ tara iwiaaku apatkuitjiai. Nu apatkun shuar yúakka tuke iwiaaku átiniaiti. Nu apatkun Wi susattaj nusha winia aya̱shruiti. Ashí shuar Yusai̱ iwiaaku pujusárti tusan winia aya̱shrun susattajai” tímiayi Jesus.
52Nuyá̱ nuamtak tunaikiar chichainiak “¿Ju̱sha itiurak ni aya̱shi̱ncha ayurtamatjik?” tiármiayi. 53Tuíniakui Jesus chicharainiak “Ti nekas tájarme, Wi Aents Ajasu asamtai winia aya̱shur yúatniuitrume. Winia aya̱shur yúachmeka tura winia numpar umarchamka nekas iwiaaku pujatsrume. 54Winia aya̱shrun yúana nuka tura winia numparun úmakka iwiaakman amuukashtinian takakui. Tura nu shuaran amuukatin tsawantai̱ iniantkíttiajai. 55Winia aya̱shruka nekas yurumkaiti tura winia numparsha nekas umutainti. 56Winia aya̱shrun yúakka tura winia numparnasha úmakka Wi niin pujurjai tura ni Winí̱ pujurtawai. 57Iwiaaku Yus Apa Winia akuptúkua nuna iwiaakmari̱ji̱a̱i̱ iwiaaku pujajna núnisaṉ Winia yurakka winia iwiaakmarui̱ iwiaaku pujustatui. 58Ju̱i̱ti apatuk nayaimpinmaya̱ tau. Ju̱ apatkuka atumí uuntri̱ yuáwariat ashí kajinkiarua núnischaiti antsu ju̱na yúana nu tuke iniaitsuk iwiaaku pujustatui” tímiayi. 59Núnaka Kapernáumnum Israer shuar iruntai̱niam Jesus tu unuiniarmiayi.
Iwiaaku chicham
60Jesusa unuiniamuri̱ nu chichaman antukar untsurí chicharainiak “Ni tana nu ti itiurchat asamtai ¿yaki anturka̱i̱ṉ?” tiármiayi.
61Jesussha nuamtak tunainian nekáa tímiayi “Atumniaka ju̱ chicham ¿yajauchik awajtámprum? 62Wátsek Wi nayaimpiniam pujuyaj nui̱ wáketkuisha ¿urukawaintrumek? 63Warí aya wakanik iwiaakman súwiti. Nekas iwiaaku awajsatniun aya̱shkia peṉké antraiti. Wi tájana nuja̱i̱ imiá nekas wakankia iwiaaku awajsámniaiti. 64-65Túrasha atumíincha winia chichamprun enentáimtachu tuke awai. Kame shuaran winia Apar akuptúrkachuitkiuiṉkia peṉké weantúrkachainti” tímiayi. Jesus Niin nekas enentáiji̱a̱i̱ enentáimtachun tura Nin suruktatna nunasha yaunchu neka asa núnaka tímiayi.
66Nuya̱sha ni nemarniuri̱ untsurí armia nu Jesusan ikiukiar atakka Niji̱a̱i̱ wekasacharmiayi. 67Nuyá̱ Jesus ni tuse unuiniamuri̱n chicharainiak “¿Atumsha waketkitin enentáimprarmeash?” tímiayi. 68Semuṉ Pítrusha ái̱kmiayi “Uuntá, ¿yáini̱ṉ wétajⁱ? Ame chichammiji̱a̱i̱ṉ tuke iwiaaku áminiaiti. 69Ame Kristu asam nekas iwiaaku Yusna Tunaarinchaitme. Nuka enentáimtusar ti paant nékaji” tímiayi. 70Jesussha áimiuk “Ashí tuse árumna nuna nekas Wí shuar ajastinian Wikia júurmaitiatrum atumíin chikichik íwianchchakait” tímiayi. 71Nuna taku Semuṉka uchirí̱ Jútas Iskariútin enentáimtus tímiayi. Jútassha ni unuiniamuri̱ntiat Jesusan ukunam surukmiayi.
Currently Selected:
Jṉ. 6: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.