YouVersion Logo
Search Icon

Joni 3

3
Jesu aNikodemasi
1Kwakalinga muntu wa mulikoto lya baFalisi wiitwa ayi Nikodemasi uyo wakalinga mweendeleshi umwi wa baJuda. 2Uyu muntu wakaya kuli Jesu mashiku akumwaambila ayi, “Bafundishi, tulishi kwaamba ayi mwebo muli bafundishi bakaswa kuli Lesa mukwiinga taaku muntu weenga wacita shaankamiko isho nshemucita, na Lesa taabete anguwe.”
3Jesu wakakumbula ayi, “Ncakwiila, ntookulwiita calushinisho ayi taaku muntu eshi akabone Bweene bwakwe Lesa na taana kushalwa cipya.”
4Nikodemasi wakeepusha Jesu ayi, “Ino muntu munene kale inga washalwa buyani cipya? Sa inga wenjila alimwi mumala muli banyina akushalwa cipya?”
5Jesu wakakumbula ayi, “Ncakwiila ntookulwiita ayi taaku muntu utana kushalwa mumaanshi alimwi aMushimu Usalashi weshi akenjile muBweene bwakwe Lesa. 6Ushalwa kumuntu ngumuntu, sombi uyo ushalwa kuMushimu Usalashi ngumushimu. 7Utakankamani mukwiinga ndakwaambila ayi, ‘Ulyeelete kushalwa cipya.’ 8Muuwo ulapupila kuli koonse nkoosuni alimwi mulanyumfwa koopupa, sombi tamwishibi nkowaswita nabi nkootooya. Mbweeke ubo mbocibete kumuntu woonse washalwa kuMushimu Usalashi.”
9Nikodemasi wakeepusha ayi, “Ino ici inga cacitika buyani?” 10Jesu wakamukumbula ayi, “Sa te webo uli mufundishi wa bene Isilaeli? Ino ono toocishi buyani cikani ici? 11Ntookulwiita calushinisho ayi tulaamba nshetwishi akupa bukamboni bwa shintu nshetwakabona, sombi mwebo tamusumini maswi esu, sobwe. 12Na tamushomi ndimwaambila shintu sha pacishi ca panshi, ino inga mwashoma buyani na ndamwaambila shintu sha kwiculu? 13Taaku muntu wakayaako kale kwiculu, sombibo MwanaaMuntu eenka uyo wakaswa kwiculu.
14“Ono bweenka mbuli Mose mbwaakaanjika nsoka ya bulonse muluyanga, mbweeke ubo MwanaaMuntu alakwe mbweshi akaanjikwe#Shakube 21:9 15kwaamba ayi uyo woonse ushoma muli nguwe abe abuumi butamaani. 16Lesa wakasunisha bantu boonse ba mucishi ca panshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani. 17Lesa taakwe kutuma Mwanaakwe mucishi kwaamba ayi oomboloshe bantu, sombi ayi bapulushikwe kwiinda muli nguwe. 18Nkokwaamba ayi uyo woonse ushoma muli nguwe taomboloshekwi, sombi uyo woonse utashomi woomboloshekwa kale mukwiinga taakwe kushoma Mwanaakwe Lesa uyo wakashalwa eenkabo. 19Bupingushi mboobu, mumuni wakesa mucishi, sombi bantu bakasuna munshinshe kwiinda mumuni mukwiinga micito yabo njibiibi. 20Kulilabo muntu ucita shibiibi ulipatite mumuni. Teesi kumumuni kuloonda kwaamba ayi micito yakwe inga yabonekela patuba. 21Sombi ucita shintu sha lushinisho ulesa kumumuni kwaamba ayi micito yakwe iboneke ayi ilacitikwa mukunyumfwila Lesa.”
Bukamboni bwabili bwakwe Joni
22Kuswawaawo Jesu abashikwiiya bakwe bakaya kucishi ca Judeya uko nkwaakekala nshiku shiniini ambabo, kaabombeka. 23Joni alakwe wakalinga kubombeka kuEnoni, pafwaafwi aSalimu, mukwiinga nkokwakalinga maanshi aanji. Mpeeke bantu bakalinga kuya kuli nguwe mukubombekwa. 24(Paciindi ici Joni kaatana kubikwa muntolongo.)#Mate 14:3; Maako 6:1; Luka 3:19, 20
25Bashikwiiya bakwe Joni bamwi bakatalika kupikishanya amuJuda umwi pamulawo wakusamba kumaansa kweelana akwishibila kwa baJuda. 26Mpeeke bakaya kuli Joni akumwaambila ayi, “Bafundishi, muntu ulya ngomwakalingaakwe petala lya Mulonga wa Joodani, ulya ngomwakaambaawo, alakwe sunu utoobombeka alimwi bantu baanji batooya kuli nguwe!” 27Joni wakakumbula ayi, “Taaku cintu muntu nceenga wacana na Lesa taakwe kumupa. 28Mwebo nobeene inga mwambeta bakamboni mucikani ncendakaamba ayi, ‘Teshi ndime Usalitwe wakwe Lesa, sombi ndakatumwabo kunembo lyakwe.’#Joni 1:20 29Uyo ucite nabwiinga ngushibwiinga. Nakubi boobo mubye shibwiinga uleemikana pafwaafwi akumukutika. Na wanyumfwa liswi lyakwe ulasangalala abuumbi. Mbweeke ubo anebo ndasangalala abuumbi. 30Aboobo ulyeelete kuba abulemu kwiinda ndime.
31“Uyo uswa kwiculu uleenda pabantu boonse. Uyo uswa mucishi ca panshi ngwa panshi alimwi ulaambabo sha mucishi ca panshi. Sombi uyo uswa kwiculu uleenda pabantu boonse. 32Lakwe ulaamba shintu nshaakabona akunyumfwa mwiine, nakubi boobo taakuuwo muntu ushoma nshaamba. 33Sombi muntu ushoma nshaamba ulashinisha ayi Lesa ngwalushinisho. 34Ee, uyo Lesa ngwaakatuma ulaamba maswi akwe Lesa ceebo ulamupa Mushimu Usalashi cakuteeleka. 35Ishi ulimusuni Mwanaakwe alimwi shintu shoonse wakashibika mumaansaakwe.#Mate 11:27; Luka 10:22 36Aboobo uyo woonse ushoma Mwaana, ulicite buumi butamaani. Sombi uyo woonse utashomi Mwanaakwe Lesa, teshi akabe abuumi butamaani alimwi bukali bwakwe Lesa mbobuli pali nguwe.”

Currently Selected:

Joni 3: BBBLI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy