YouVersion Logo
Search Icon

John 1

1
Akuzin
1Piinlighyuwhaalleghmeng Akuzin tawantekaq, Akuzin Kiyaghneghmetkaq, Akuzin Kiyaghneghulghii. 2Ellnga Kiyaghneghmetkaq piinlighyuggaalleghmeng ima. 3Kiyaghneghem ellngakun sangwaa qamagtengngwaaghluku ulimakaa, talwa sangwaa ataasighhaq ulimamangitaa Akuzitngunani. 4Akuzitmetuq unguvalleq, taana unguvalleq nighuguuq yugnun. 5Taana nighuk kuukgutnguuq mamlegmi, mamlegem kayaalqumangitaa.
6Taawanguq yuuk Kiyaghneghem kayagtekaa, aatgha John. 7John‑em apeghyaghtuqaa nighuk qamaglluki yuget ugpeghesqelluki ungipaqilleghmikun. 8Ellnga nighugunghituq, iwernga apeghyaghtuuwaa nighuk. 9Taana nighupiiguuq tagikaq nunamun, nighugullghii tamaghhaanun yugnun.
10Taana Akuzin nunametkaq. Qaywa nuna ulimakaayaghngaan ellngakun, tawalliima nunam yugita nallukegkaat. 11Tagikaayalghii ellmi katam yugminun, iwernga tugukliimangilkangat. 12Iwernga qamaglluki tuguklighilghiitlu ugpelghiitlu ellmineng, avaqutaliisaghqaaghtestekaqii Kiyaghneghmun. 13Avaqutaliisimangitii yugkun allgeghaqelghiistun, talwa yugem piyukellghakun nalighmeng nakmikellghakun. Kiyaghneghem ellmineng katam avaqutaliitkaqii.
14Akuzin kemgughlluni akulemnnitkaq. Ellngakun Kiyaghneq liitestengngwaaqaaguq, liitestengngwaaqaqaallu piniqelleni whangkunnun. Esghaqaqaghput taawa seghleghllaguftuq. Seghleghllaguftuq qayughllak taananginaghhaalghii Ighnegha Atam.
15John‑em Paaptaayestem aapqaqaa, akilghuutkegkaqaa whaten, “Taananguuq aapqaqa elpesinun whaten piiqngama, ‘Kingumneng tagiyaghqaq aangeghllagtuq whangamneng, qayughllak kiyaghtengngulghii talwa allgellghillunga.’”
16Piniqingaghllagutmineng quyastaqiinkut uteghpagtiinaq. 17Kiyaghneghem tuunegkaqii Liilightuusat Moses‑kun, iwernga piniqelleqlu ipalleqlu liitestekaqaak Jesus Christ‑akun. 18Kitum alngunak esghiigataa Kiyaghneq. Taananginaghhaam Ighneghem qantaghantelleghpigaam Atamun, liitestekaa yugnun.
John‑em Paaptaayestem Ungipaa
19Jerusalem‑emeng Jews‑et igleghutistengit kayagtikat priest‑enengllu Levite‑enengllu aaptesqelluku John whaten, “Kinanguzin?” 20Aapsatni kiimsighaghtekii whateghlluwaaq, “Whanga Christ‑angunghitunga.”
21Enkaam aaptekaat, “Kinanguzinmi? Elijah‑nguziin?” John‑em kiimsiqii, “Nakaa.” Aaplaataqaat, “Uuknaliqistenguziin?” Kiimsiqii, “Nakaa.” 22Pikaat, “Ungipaatikut kinanguten, qayughllak ungipaasaghtupestaaghnaqaput kayagtikat whangkunneng. Aapghi kinanguten.” 23John‑em pikii, “Uuknaliqista Isaiah pikaaguq,
‘Ma akilghuugaquq kilgaani whaten,
Taklaghteggu tuumkaghqaa Atanghem’.
Taana yuuk akilghuulghii whanganguuq.”
24Pharisees‑et taakut kayagtekaqegkangit John‑mun. 25Aaptekaat, “Christ‑angunghilkuvek, Elijah‑ngunghilkuvek, uuknaliqistengunghilkuvek, sangavek paaptaayeghiiqsin?” 26John‑em kiimsiqii, “Paaptaayeghiiqunga meghqun. Akulegpesinituq kina nallukegkaghsi. 27Taananguuq tagiyaghqaq kingumneng, seghleghllaguuq repall whanga pininghitunga itemsaghqaaluki singii.”
28Qamaglluteng tamaakut pikaagut Bethany‑mi inglunganilngughmi Kiiwegni Jordan‑egni. Taakwani John paaptaayeghingulghii yugneng.
Penniighaghaa Kiyaghneghem
29Unaamingani John‑em esghaghluku Jesus tagilghii ellminun yuget pikii, “Ii‑i, taanata Penniighaghaa Kiyaghneghem iqitiyaghqaq seghleghqellghaneng nunam yugan. 30Taananguuq aapqaqa whaten, ‘Yuuk taginaqnguuq kingumneng, iwernga aangwaaghuuq whangamneng, qayughllak kiyaghtengnguuq talwa allgellghillunga.’ 31Whangallu nalluksaghaqa kinangutanga, iwernga paaptaayeghiyaghtuugunga meghqun liitesqelluku kinangutanga Israel‑eghmiinun.”
32-33Taagken John‑em ungipaqegkaqaa, “Kiyaghneghem kayagtekaqaanga paaptaayeghisqellunga meghqun. Paninang nalluknguluku kinangutanga, Kiyaghneghem ungipaatkaqaanga, ‘Esghaghlleqagken Taghneghak ukilghiik yugmun. Taana yuuk paaptaayeghiyaghqaaguq Agleghnalghiignekun Taghneghagnekun.’ Enkaam esghaghagka qilagmeng Taghneghak ukilghiik dove‑ngulutek Jesus‑mun, ellnganitkaklu” 34Taagken John‑em pikii, “Tawatelluku esghaqaqaqa, ungipaatamsi, taana Ighneqaa Kiyaghneghem.”
Maligsaaghteksuwhaaghi Jesus‑em
35Unaamingani John tawanllaataqaq, maalghuklu maligsaaghtekek. 36John‑em esghaghluku Jesus naghughlleghhii pikaq, “Esgha taanata Penniighaghaa Kiyaghneghem!” 37Taakuk maligsaaghtek nagalluku John, maligtekaak Jesus. 38Jesus‑em qiivluni esghaghlukek maligullghiik ellminun aaptekakek, “Sangwaa piiqestegnegu?” Kiimsiqaak, “Rabbi, naantaqsin?” (“Rabbi” whaten pisiiguq, “Apeghtughista”.) 39Pikakek, “Maligllunga esghaghyaghtughtegnegu.” Enkaam maligtekaak kiyaghfiganun, tawantekak 4‑eklaagmeng kenlanga unulleghmun.
40Yugem aallgha nagatkaq John‑meng akuzilghiimeng, maligtikaq Jesus‑meng Andrew‑nguftuq, Simon Peter‑em anglegutanga. 41Tawaninginaq Andrew anglegutminun Simon‑mun aglaghluni pikaa, “Naalkumaaghpung Messiah.” (“Messiah” whaten pisiiguq, “Christ‑a”.) 42Taagken Simon aglaatkaa Jesus‑mun. Jesus‑em esghaghluku pikaa, “Elpek Simon‑nguuten ighnegha John‑em. Aatghen Cephas‑ngullequq, whaten pisiq, Peter.”
Jesus‑em Nakmikegkek Philip‑enkuk Nathanael‑enkuk Maligsaaghtengulukek
43Unaamingani Jesus Galilee‑nnaqumalghii. Nallaghluku yuuk aatgha Philip, pikaa, “Maligtinga.” 44(Philip Bethsaida‑ghmiingulghii, Andrew‑nkugetun Peter‑enkugetun.) 45Taagken Philip‑em ivaghyaghtughluku Nathanael ungipaatkaa, “Nallaamaaghput yuuk Moses‑em igaqegkaa igiitgun Liilightuusat, uuknaliqistetlu igaqegkaqaat igamegteggun. Jesus‑nguuq Nazareth‑eghmii, ighnegha Joseph‑em.” 46Nathanael‑em aaptekaa, “Sangwaangam pinilghii Nazareth‑meng allgeghlleqefta?” Philip‑em kiimsiqaa, “Esghaghyaghtuqaghhuqun.”
47Jesus‑em esghaghyamigu Nathanael tagilghii ellminun pikaa, “Taanata Israel‑eghmiipik, temngitwhangilnguq.” 48Nathanael‑em aaptekaa, “Naten liisimaksinga?” Jesus‑em kiimsiqaa, “Esghaqaqamken asinganilluten figs‑em uqfigan, talwa salin Philip‑em apellghillunga elpenun.” 49Nathanael‑em pikaa, “Apeghtughista, elpek Ighneqaaten Kiyaghneghem! Elpek Umiilkaaten Israel‑em!” 50Jesus‑em pikaa, “Ugpeghsiin qayughllak ungipaaskemken esghaamaniluten asingani figs‑em uqfigan? Sangwaat aangataghalghiit tamaakuneng esghaghlleqaten.” 51Taagken pikii “Ipa ungipaatamsi, esghaghlleqaghsi qilak qelpelghii, Kiyaghneghemllu yaqulgi mayulghiit, ukilghiit Ighneghakun Yugem.”

Currently Selected:

John 1: ess

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy