Yohane 5
5
Yesu tsa hiɔtsɛ ko ngɛ taku ko he Hejɔɔmi ligbi ɔ
1Enɛ ɔ se ɔ, Yuda bi ɔmɛ ngɛ nyami ligbi yee ngɛ Yerusalem, nɛ Yesu ya lejɛ ɔ. 2Taku ko kɛ e he kue enuɔ ngɛ To Agbo ɔ nɛ ngɛ Yerusalem ɔ kasa nya. Hebri gbi mi ɔ, a tsɛɛ taku nɛ ɔ Betesda. 3Hiɔtsɛmɛ babauu, hɛ yuyuili, glɔtsɛmɛ, kɛ ni nɛmɛ nɛ hule pueɔ si tsuo ngɛ kue ɔmɛ a mi. [A ngɛ blɔ hyɛe nɛ a ba klɛ nyu ɔ mi. 4Be komɛ ɔ, Nyɔmtsɛ ɔ bɔfo ma kple si ba klɛ nyu ɔ mi; kɛkɛ ɔ, nɔ tsuaa nɔ nɛ lɛ kekle e ma ya nɔ nyu ɔ mi ɔ, hiɔ tsuaa hiɔ nɛ ngɛ e he ɔ taa amlɔ.] 5Nyumu ko ngɛ lejɛ ɔ nɛ ngɛ hiɔ nue jeha nyingmi etɛ kɛ kpaanyɔ sɔuu. 6Yesu na lɛ nɛ hwɔɔ si, nɛ e le kaa nyumu ɔ na we he wami be babauu. Lɔ ɔ he ɔ, e bi lɛ ke, “O suɔ nɛ a tsa mo lo?”
7Hiɔtsɛ ɔ he nɔ ke, “Nyɔmtsɛ, ke a ba klɛ nyu ɔ mi kikɛ nɛ ɔ, i be nɔ ko nɛ ma wo mi ya fɔ taku ɔ mi. Be tsuaa be ɔ, ke ma su lejɛ ɔ, nɔ kpa sɛ ye hlami ya nɔ mi momo.”
8Yesu de lɛ ke, “Tee si, wo o sa a nɛ o nyɛɛ.” 9Amlɔ nɔuu ɔ, nyumu ɔ he mi wa lɛ; e wo e sa a, nɛ e bɔni nyɛɛmi.
Se Hejɔɔmi ligbi nɛ a tsa hiɔtsɛ ɔ. 10#Neh 13.19; Yer 17.21 Lɔ ɔ he ɔ, Yuda ma nimeli ɔmɛ de nɔ nɛ a tsa lɛ ɔ ke, “Mwɔnɛ ɔ, Hejɔɔmi ligbi; wa mlaa a ngmɛ́ blɔ kaa o hɛɛɔ o sa.”
11E he nɔ ke, “Nɔmlɔ nɛ tsa mi ɔ lɛ de mi ke ma wo ye sa a nɛ ma nyɛɛ.”
12Jehanɛ ɔ, a bi lɛ ke, “Mɛnɔ lɛ de mo ke o pee jã a?”
13Se nɔ nɛ a tsa lɛ ɔ li Yesu; nɛ pohu nihi babauu ngɛ lejɛ ɔ, lɔ ɔ he ɔ, Yesu sã e he nɛ e je.
14Pee se ɔ, Yesu ya na nyumu ɔ ngɛ sɔlemi we ɔ, nɛ e de lɛ ke, “Bu tue, amlɔ nɛ ɔ nɛ o na he wami nɛ ɔ, koo pee yayami hu. Ke pi jã a, nɔ́ nɛ maa ba o nɔ ɔ maa pe kekle nɔ́ ɔ.”
15Jehanɛ ɔ, nyumu ɔ pue nɔ kɛ ho nɛ e ya de Yuda ma nimeli ɔmɛ ke Yesu ji nɔ nɛ tsa lɛ ɔ nɛ. 16Lɔ ɔ he ɔ, Yuda ma nimeli ɔmɛ je hɛ pi Yesu nɛ a bɔni e nya doomi, ejakaa e tsa hiɔtsɛ Hejɔɔmi ligbi ɔ. 17Yesu de mɛ ke, “Tsaatsɛ ngɛ ní tsue be tsuaa be, nɛ imi hu i ngɛ ní tsue.”
18Nɔ nɛ e de nɛ ɔ mohu ha Yuda ma nimeli ɔmɛ a hɛ dɔ pe kekle ɔ po, nɛ a to kaa ja a gbe lɛ. Ejakaa pi mlaa a nɛ kɔɔ Hejɔɔmi ligbi ɔ he ɔ kɛkɛ nɛ e tɔ̃; se e de hu ke e tsɛ ji Mawu, nɛ́ tsɔɔ kaa e kɛ Mawu sɔ.
Bi ɔ ngɛ he blɔ
19Jehanɛ ɔ, Yesu ya nɔ nɛ e de mɛ ke, “I ngɛ nyɛ dee anɔkuale mi ke Bi ɔ pee we nɔ́ ko ngɛ lɛ nitsɛ e yi mi tomi nya. Nɔ́ nɛ e na nɛ Tsɛ ɔ ngɛ pee ɔ, lɔ ɔ nɛ e peeɔ. Nɔ́ nɛ Tsɛ ɔ peeɔ ɔ, Bi ɔ hu peeɔ. 20Ejakaa Tsɛ ɔ suɔ Bi ɔ saminya, nɛ e tsɔɔ lɛ nɔ́ tsuaa nɔ́ nɛ lɛ nitsɛ e peeɔ. Jehanɛ ɔ, e maa tsɔɔ Bi ɔ ní nguahi nɛ pe enɛ ɔmɛ tete, nɛ e maa pee nyɛ nyakpɛ. 21Kaa bɔ nɛ Tsɛ ɔ tleɔ gbogboe si, nɛ e ngɔɔ wami woɔ mi ɔ, jã nɔuu Bi ɔ hu haa níhi nɛ e suɔ mɛ ɔ wami. 22Tsɛ ɔ nitsɛ kojo we nɔ ko. E ngɔ jamɛ a he blɔ ɔ tsuo kɛ ha Bi ɔ, konɛ Bi ɔ nɛ kojo nihi. 23Kɛkɛ ɔ, nihi tsuo maa wo Bi ɔ hɛ mi nyami kaa bɔ nɛ a woɔ Tsɛ ɔ hɛ mi nyami ɔ. Lɔ ɔ he ɔ, nɔ tsuaa nɔ nɛ wui imi Bi ɔ, ye hɛ mi nyami ɔ, Tsɛ ɔ nɛ tsɔ mi ɔ hɛ mi nyami e wui ɔ nɛ.
24“I ngɛ nyɛ dee anɔkuale mi ke, nɔ tsuaa nɔ nɛ buɔ ye munyu tue, nɛ e heɔ nɔ nɛ tsɔ mi ɔ yeɔ ɔ, e nine su neneene wami nɔ. A be lɛ fɔ bue, ejakaa e po mi ngɛ gbenɔ mi kɛ ho wami mi ya. 25I ngɛ nyɛ dee anɔkuale mi ke be ma, pohu e su ta, nɛ gbogboehi maa nu Mawu Bi ɔ gbi, nɛ a maa ba wami mi ekohu. 26Lɔ ɔ he ɔ, kaa bɔ nɛ Tsɛ ɔ ngɛ wami ngɛ e mi ɔ, ja nɔuu e ha e Bi ɔ hu wami. 27Tsɛ ɔ ha Bi ɔ he blɔ kaa e kojo nihi, ejakaa lɛ ji Nɔmlɔ Bi ɔ nɛ. 28Nyɛ hɛ mi kó pee nyɛ yaa kaa be maa su nɛ gbogboehi tsuo maa nu Mawu Bi ɔ gbi, 29#Dan 12.2 nɛ a maa je kpo kɛ je a yɔkɔ ɔmɛ a mi. A ti ni nɛmɛ nɛ pee kpakpa a, a maa te si, nɛ a maa hi si kɛ maa ya neneene; se ni nɛmɛ nɛ pee yayami ɔ lɛɛ a maa te si, konɛ a kojo mɛ.
Yesu he odase yemi
30“I be he blɔ nɛ i peeɔ imi nitsɛ ye yi mi nɔ́ ko. Bɔ nɛ Mawu tsɔɔ mi ke ma kojo ɔ, jã pɛ i peeɔ; lɔ ɔ he ɔ, i yeɔ dami sane. Ejakaa i hla we kaa ma pee nɔ́ nɛ imi nitsɛ i suɔ, se mohu Tsaatsɛ nɛ tsɔ mi ɔ suɔmi nya ní i peeɔ.
31“Ke i ye imi nitsɛ ye he odase ɔ, e sɛ kaa a ngɔ nɔ́ nɛ i de ɔ kaa anɔkuale. 32Se mohu nɔ kpa nɛ ngɛ ye he odase yee; lɔ ɔ he ɔ, i le kaa anɔkuale e ngɛ tue. 33#Yoh 1.19-27; 3.27-30 Nyɛɛ lɛɛ nyɛ tsɔ kɛ ya Yohane ngɔ, nɛ e ye anɔkuale ɔ he odase. 34Imi lɛɛ i ngɔɛ nɔmlɔ adesa ko odase, se bɔ nɛ pee nɛ a he nyɛ yi wami he je nɛ i ngɛ enɛ ɔ dee. 35Yohane ba kaa la nɛ ngɛ tsoe, nɛ ngɛ kpɛe ha nyɛ. Se be bɔɔ pɛ nɛ nyɛ ná e he bua jɔmi. 36Imi lɛɛ i ngɛ odase nɛ pe Yohane nɔ́ ɔ, ejakaa ní tsumihi nɛ Tsaatsɛ ngɔ ha mi kaa ma tsu ɔ, jamɛ a ní tsumi ɔmɛ nɛ́ i tsuɔ ɔ nɔuu yeɔ ye he odase kaa Tsɛ ɔ lɛ tsɔ mi. 37#Mat 3.17; Mar 1.11; Luk 3.22 Tsɛ ɔ nɛ tsɔ mi ɔ, lɛ nitsɛ e yeɔ ye he odase, se nyɛɛ lɛɛ nyɛ nui e gbi, nɛ nyɛ nɛ lɛ hyɛ hulɔ. 38Nyɛ bui e munyu ɔ, ejakaa imi nɔmlɔ nɛ e tsɔ ɔ, nyɛ he we mi yi. 39Nyɛ hlaa ngmami ɔmɛ a mi, ejakaa nyɛ susuɔ kaa a mi nyɛ ma na neneene wami ngɛ; nɛ lɔ ɔmɛ nɔuu yeɔ ye he odase. 40Se nyɛ sume kaa nyɛ maa ba ye ngɔ, konɛ nyɛ na wami.
41“I hla we nimli a hɛ mi nyami. 42I le nyɛ su, nɛ i le hu kaa Mawu suɔmi be nyɛ mi. 43I ba ngɛ Tsaatsɛ biɛ mi po nyɛ he we mi; se nɔ ko nɛ maa ba ngɛ lɛ nitsɛ e suɔmi nya a lɛɛ nyɛ ma he lɛ. 44Nyɛ nɛ nyɛ hlaa nɛ nihi nɛ je nyɛ yi, se nyɛ bɔɛ mɔde, konɛ nɔ nɛ lɛ nɔ kake pɛ ji Mawu ɔ nɛ wo nyɛ hɛ mi nyami ɔ, kɛ maa pee kɛɛ nɛ nyɛ ma he mi maa ye mɔ? 45Nyɛ ko susu kaa imi lɛ ma po nyɛ nya ngɔ ha Tsaatsɛ. Mose nɛ nyɛ ngɔ nyɛ hɛ kɛ fɔ e nɔ ɔ, lɛ tutuutu ji nɔ nɛ maa po nyɛ nya. 46Kaa nyɛ he Mose ye jinɛ imi hu nyɛ ma he mi maa ye, ejakaa munyuhi nɛ e ngma a, ye he e ngma ngɛ. 47Se nɛ nyɛ bui níhi nɛ e ngma a, kɛ maa pee kɛɛ nɛ nyɛ ma he ye munyu ɔmɛ maa ye mɔ?”
Currently Selected:
Yohane 5: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.