Yohane 3
3
Yesu kɛ Nikodemo
1Yuda bi ɔmɛ a nɔkɔtɔma ko ngɛ nɛ a tsɛɛ lɛ Nikodemo. Farisi no ji lɛ. 2Nyumu nɛ ɔ ba Yesu ngɔ nyɔ mi, nɛ e ba de lɛ ke, “Tsɔɔlɔ, wa le kaa tsɔɔlɔ nɛ Mawu tsɔ kɛ ba ji mo. Níhi tsuo nɛ o peeɔ ɔ kɛ toɔ okadi ɔ, nɔ ko nɔ ko be nyɛe maa pee, ja Mawu piɛ e he.”
3Yesu he nɔ ke, “I ngɛ mo dee anɔkuale mi ke, ke a ji hiɔwe fɔ we nɔ ko ɔ e be Mawu matsɛ yemi ɔ mi sɛe.”
4Nikodemo bi Yesu ke, “Nɔmlɔ nɛ wa a, kɛ maa pee kɛɛ nɛ a ma fɔ lɛ ekohu? Anɛ e ma nyɛ kpale sɛ e nyɛ mi mi nɛ a dla fɔ lɛ nɔ nɛ ji si enyɔ lo?”
5Yesu he nɔ ke, “I ngɛ mo dee anɔkuale mi ke, ke a ji nyu kɛ mumi mi fɔ we nɔ ko ɔ, e be nyɛe maa sɛ matsɛ yemi ɔ mi. 6Adesa lɛɛ adesa kɛkɛ e fɔɔ, se Mumi Klɔuklɔu lɛɛ e fɔɔ nɔ ehe. 7O hɛ mi ko pee mo yaa kaa i de mo ke e hia nɛ a dla fɔ mo ehe. 8Kɔɔhiɔ ɔ, e fiaa kɛ yaa he tsuaa he nɛ e suɔ; o nuɔ e fiami ɔ, se he nɛ e je, kɛ he nɛ e yaa lɛɛ o li. Kikɛ nɛ ɔ nɔ tsuaa nɔ nɛ a je Mumi mi fɔ lɛ ɔ ngɛ.”
9Nikodemo bi Yesu ekohu ke, “Kɛ e maa pee kɛɛ nɛ enɛ ɔ maa ba mi?”
10Yesu he nɔ ke, “Tse tsɔɔlɔ nguaa ji mo ngɛ Israel! Nɛ o li enɛ ɔ? 11I ngɛ mo dee anɔkuale mi ke wɔɔ lɛɛ nɔ́ nɛ wa le ɔ, lɔ ɔ wa deɔ, nɛ wa yeɔ nɔ́ nɛ wa na a he odase. Se nyɛ sume nɛ nyɛɛ ngɔ munyu nɛ wa fiɛ ha nyɛ ɔ. 12Ke i de nyɛ zugba nɛ ɔ nɔ níhi nɛ nyɛ he we yi ɔ, lɛɛ ke i de nyɛ hiɔwe níhi ɔ, kɛ nyɛ maa pee kɛ he ye kɛɛ? 13Nɔ ko yɛ hiɔwe gblee kaa ja Nɔmlɔ Bi ɔ, nɔ nɛ je hiɔwe kple si kɛ ba a.”
14 #
Mose IV, 21.9
Bɔ nɛ Mose wo sinɔ ɔ nɔ ngɛ nga a nɔ ɔ, jã nɔuu nɛ e sa kaa a wo Nɔmlɔ Bi ɔ nɔ, 15konɛ nɔ tsuaa nɔ nɛ heɔ lɛ yeɔ ɔ, e na neneene wami. 16Ejakaa Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e na neneene wami. 17Mawu tsɔ we e Bi ɔ kɛ bɛ je ɔ mi nɛ e ba kojo; se mohu e ba, konɛ e ba he nihi a yi wami.
18Nɔ tsuaa nɔ nɛ heɔ Mawu Bi ɔ yeɔ ɔ, a be lɛ fɔ bue; se nɔ nɛ he we yi ɔ, a bu lɛ fɔ momo; ejakaa e he we Mawu Bi kake too ɔ yi. 19Nɔ́ nɛ nɔ nɛ a da kɛ bu mɛ fɔ ji nɛ ɔ nɛ: la a ba je ɔ mi, se adesa suɔ diblii ɔ mohu pe la a, ejakaa a peeɔ yayami. 20Nɔ tsuaa nɔ nɛ peeɔ yayami ɔ, e nyɛɔ la a; nɛ e sume nɛ e baa la a nya, ejakaa e sume nɛ a naa e ní yayami ɔmɛ. 21Se nɔ tsuaa nɔ nɛ nyɛɛɔ anɔkuale se ɔ, e baa la a nya, konɛ la a nɛ tsɔɔ kaa e peeɔ Mawu suɔmi nya ní.
Yesu kɛ Yohane
22Ní nɛ ɔmɛ a se ɔ, Yesu kɛ e kaseli ɔmɛ ya Yudea. A hi lejɛ ɔ be bɔɔ, nɛ e sɔle nihi. 23Jamɛ a be ɔ, Yohane hu ngɛ nihi sɔlee ngɛ Aenon, ngɛ Salim kasa nya, ejakaa nyu babauu ngɛ lejɛ ɔ. Nihi babauu nitsɛnitsɛ ba e ngɔ, nɛ e sɔle mɛ. 24#Mat 14.3; Mar 6.17; Luk 3.19-20 Jamɛ a be ɔ, a wui Yohane tsu lolo.
25Pee se ɔ, kusumi nɛ a peeɔ kɛ tsuɔ nɔ he ɔ, Yohane kaseli ɔmɛ ekomɛ, kɛ Yuda bi komɛ sã nya ngɛ he. 26Lɔ ɔ he ɔ, kaseli ɔmɛ ba Yohane ngɔ, nɛ a ba bi lɛ ke, “Tsɔɔlɔ, nyumu ɔ nɛ e kɛ mo hi Yordan pa a beleku je nɛ o tu e he munyu ɔ, o kai lɛ lo? Hyɛ, amlɔ nɛ ɔ, nihi babauu ngɛ e ngɔ yae, nɛ e ngɛ mɛ sɔlee.”
27Yohane he nɔ ke, “Nɔ ko be nyɛe ma na nɔ́ ko kaa ja Mawu ha lɛ. 28#Yoh 1.20 Nyɛ nitsɛmɛ nyɛ nu nɛ i de paa ke, ‘Pi imi ji Kristo ɔ, se mohu a tsɔ mi kɛ sɛ e hlami’. 29Ayɛflo huno ɔ, e nɔ ji ayɛflo ɔ. Se kɛ̃ ɔ, ayɛflo huno ɔ huɛ nɛ daa si ngɛ e kasa nya a, ke e nu ayɛflo huno ɔ gbi kɛkɛ e bua jɔ. Enɛ ɔ nɛ haa imi hu i naa bua jɔmi babauu. 30E sa kaa e ya nɔ, konɛ imi lɛɛ ma ba si.”
Nɔ nɛ je hiɔwe kɛ ba a
31Nɔ nɛ je hiɔwe kɛ ba a pe nihi tsuo. Nɔ nɛ ngɛ je ɔ mi ɔ, je mi no ji lɛ, nɛ je mi níhi a he munyu e tuɔ. Se nɔ nɛ je hiɔwe ɔ pe nɔ tsuaa nɔ. 32Nɔ́ nɛ e na, kɛ nɔ́ nɛ e nu ɔ, lɔ ɔmɛ a he odase e yeɔ, pohu nɔ ko nɔ ko ngɔɛ e munyu ɔ. 33Nɔ tsuaa nɔ nɛ heɔ e munyu ɔ yeɔ ɔ, yeɔ odase kaa Mawu tuɔ anɔkuale. 34Nɔ nɛ Mawu tsɔ ɔ, Mawu munyu e tuɔ, ejakaa Mawu Mumi hyi lɛ tɔ. 35#Mat 11.27; Luk 10.22 Tsɛ ɔ suɔ e Bi ɔ, nɛ e tu nihi tsuo ngɔ wo e dɛ mi. 36Nɔ nɛ heɔ Bi ɔ yeɔ ɔ, e nine su neneene wami ɔ nɔ; se nɔ tsuaa nɔ nɛ bui Bi ɔ tue ɔ, e be neneene wami nae. Mawu maa gbla e tue mohu.
Currently Selected:
Yohane 3: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.