Yohane 2
2
A kpee yo ngɛ Kana
1E nɔ ligbi etɛ ɔ, a kpee yo ngɛ Galilea ma nɛ a tsɛɛ Kana a. Yesu nyɛ ya lejɛ ɔ; 2nɛ a fɔ Yesu kɛ e kaseli ɔmɛ hu nine kɛ ya yo kpeemi ɔ. 3Be saii mi ɔ, wai nɛ a ngɛ nue ɔ ta; nɛ Yesu nyɛ ba e ngɔ ba de lɛ ke, “Ni ɔmɛ a wai ɔ ta.”
4Se Yesu he nɔ ke, “Maa, mɛni he je o ngɛ ye nya dooe? Be nɛ ma tsu ní ɔ sui lolo.”
5Jehanɛ ɔ Yesu nyɛ de tsɔli ɔmɛ ke, “Nɔ́ tsuaa nɔ́ nɛ e ma de nyɛ ɔ, nyɛɛ pee.”
6Yuda bi a kusumi ji a fɔ a he nɛ a kɛ tsú a he. Enɛ ɔ he ɔ, didɔ ekpa maa si ngɛ lejɛ ɔ. Didɔ nɛ ɔmɛ ɔ, eko tsuaa eko yeɔ nyu lita lafa. 7Yesu de tsɔli ɔmɛ ke, “Nyɛɛ wo didɔ ɔmɛ a mi nyu nɛ a hyi.” A pee jã. 8Jehanɛ ɔ, e de tsɔli ɔmɛ ke, “Nyɛɛ yɛ eko ya ha nɔ nɛ ngɛ ní tsumi ɔ nɔ hyɛe ɔ.” A yɛ nyu 9nɛ plɛ pee wai ɔ ya ha nɔ nɛ ngɛ ní tsumi ɔ nɔ hyɛe ɔ, nɛ e sa e nya. Tsɔli ɔmɛ nɛ wo didɔ ɔmɛ a mi nyu ɔ le he nɛ wai nɛ ɔ je; se ní tsumi ɔ nɔ hyɛlɔ ɔ lɛɛ e li. Lɔ ɔ he ɔ, e tsɛ ayɛflo huno ɔ, 10nɛ e de lɛ ke, “Ke a tsɛ ní yemi ɔ, wai kpakpa a kɛ ba maa si kekle; nɛ ke ni ɔmɛ nu bɔ nɛ a ma nyɛ ɔ loko a kɛ nɔ́ nɛ ngɔɛ ɔ baa. Se moo lɛɛ o ngɔ wai kpakpa a ngɔ to kɛ ba su be nɛ ɔ.”
11Enɛ ɔ ji kekleekle nyakpɛ nɔ́ nɛ Yesu pee ngɛ Kana ngɛ Galilea kɛ to okadi kaa Mawu ha lɛ he wami; nɛ e kaseli ɔmɛ he lɛ ye.
12 #
Mat 4.13
Lɔ ɔ se ɔ, Yesu kɛ e nyɛ, kɛ e nyɛmimɛ ɔmɛ, kɛ e kaseli ɔmɛ pue nɔ kɛ ho Kapernaum ya, nɛ a ya hi lejɛ ɔ be bɔɔ.
Yesu ya sɔlemi we ɔ
(Mateo 21.12-13; Marko 11.15-17; Luka 19.45-46)
13 #
Mose II, 12.1-27
Benɛ Yuda bi ɔmɛ a Hetsɔmi nyami be ɔ su ɔ, Yesu ya Yerusalem. 14E ya sɔlemi we ɔ, nɛ e ya na nihi babauu ngɛ lejɛ ɔ nɛ a ngɛ nahi, tohi, kɛ lahuɛhi juae. Ni komɛ hu hii si ngɛ a we okplɔɔhi a se ngɛ sika tsakee. 15Kɛkɛ nɛ Yesu ngɔ tangme tsɔwi kɛ pee kpa, nɛ e fie jua yeli ɔmɛ, kɛ a to ɔmɛ, kɛ na amɛ tsuo kɛ je sɔlemi we ɔ. E tsitsɛɛ sika tsakeli ɔmɛ a we okplɔɔ ɔmɛ ngɔ fia si, nɛ e plɛ a sika amɛ ngɔ pue si. 16Nihi nɛ ngɛ lahuɛhi juae ɔ, e de mɛ ke, “Nyɛ je ní nɛ ɔmɛ kɛ je hiɛ ɔ esɔ! Tsaatsɛ we ɔ, nyɛ ko ngɔ kɛ pee jua nɔ.” 17#La 69.9 E kaseli ɔmɛ kai kaa a ngma ke, “Ye hɛ dɔ wawɛɛ ngɛ o we ɔ he.”
18Jehanɛ ɔ, Yuda bi ɔmɛ bi Yesu ke, “Mɛni okadi o maa to wɔ kɛ ma nɔ́ nɛ o pee nɛ ɔ nɔ mi?”
19 #
Mat 26.61; 27.40; Mar 14.58; 15.29 Yesu he nɔ ke, “Nyɛɛ ku sɔlemi we nɛ ɔ, nɛ ligbi etɛ se ɔ, ma ma lɛ ekohu.”
20A kpale de Yesu ke, “Sɔlemi we nɛ ɔ, jeha nyingmi eywiɛ kɛ ekpa loko a nyɛ ma; se moo lɛɛ o de ke ligbi etɛ o kɛ maa ma lɛ; o ma nyɛ?”
21Se sɔlemi we nɛ Yesu ngɛ he munyu tue ɔ ji lɛ nitsɛ e nɔmlɔ tso. Lɔ ɔ he ɔ, benɛ a tle Yesu si kɛ je gbeje ɔ, e kaseli ɔmɛ kai kaa e wo nɔ́ nɛ ɔ nɔ ta de mɛ hyɛ, 22nɛ a he ngmami ɔ, kɛ munyu nɛ Yesu kɛ mɛ tu ɔ tsuo ye.
Yesu le adesa su
23Yesu hi Yerusalem Hetsɔmi nyami be ɔ tsuo. E pee okadihi babauu, nɛ nihi tsuo nɛ na a, a he lɛ ye. 24Se Yesu lɛɛ e le mɛ tsuo pɛpɛɛpɛ, lɔ ɔ he ɔ, e kɛ e hɛ fɔɛ a nɔ. 25E hia we pohu nɛ nɔ ko nɛ ye nɔmlɔ adesa he odase kɛ tsɔɔ lɛ, ejakaa lɛ nitsɛ e le nɔmlɔ yi mi.
Currently Selected:
Yohane 2: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.