ޔޫޙަންނާ 5
5
އީސާގެފާނު ނުހިނގޭ މީހަކު ހެޔޮކުރެއްވުން
1މިއަށް ފަހު އީސާގެފާނު ވަޑައިގެންނެވީ ޖެރޫސަލަމަށް ބަނީއިސްރާއީލު މީހުންގެ ޢީދެއް ފާހަގަ ކުރެއްވުމަށެވެ. 2ޖެރޫސަލަމުގައި ޢިބްރާނީ ބަހުން ބެތުޒާތަ އޭ ކިޔާ ވެވެއް އޮވެއެވެ. މި ވެވުގައި ފަސް ފެންޑާ ހުރެއެވެ. މި ވެޔޮ އޮންނަނީ ކަންބަޅި ދޮރޯށްޓާއި ކައިރީގައެވެ. 3އެ ވެވުގެ ފެންޑާތަކުގައި ވަރަށް ގިނަ އަދަދެއްގެ ބަލި މީހުން ތިބެއެވެ. އޭގެ ތެރޭގައި ލޯ އަނދިރި މީހުންނާއި، ނުހިނގޭ މީހުންނާއި، ވާވެފައިވާ މީހުން ތިބެއެވެ. 4ބައެއްފަހަރު މާތްރަސްކަލާނގެ ފޮނުއްވާ މަލާއިކަތަކު ވަޑައިގެން އެވެވުގެ ފެންގަނޑު ހަލުވާލުމުން ފެންގަނޑު އުތުރި އަރައެވެ. އެ ހިނދު އެންމެ ފުރަތަމަ އެވެވަށް އެރޭ މީހެއްގެ ބަލި ރަނގަޅު ވެއެވެ.#5:4 ގުރީކު ބަހުން ލިޔެވިފައިވާ ލިޔުންތަކުގެ ތެރެއިން ބައެއް ލިޔުންތަކުގައި މި އާޔަތެއް ނުހިމެނެއެވެ.
5ވާވެފައިއޮންނަތާ ތިރީސް އަށް އަހަރު ވެފައިވާ މީހަކު އެވެވުގެ ކާރީގައި އޮތެވެ. 6އީސާގެފާނަށް އެމީހާ ފެނިވަޑައިގަތުމުން އެމީހާއަކީ މިހާ ގިނަދުވަހު ބަލިވެ އުޅެފައިވާ މީހެއްކަން އެނގިވަޑައިގަންނަވާތީ ވިދާޅުވިއެވެ. ”ކަލޭ ރަނގަޅުވާން ބޭނުންތަ؟“
7މި ބަލިމީހާ ޖަވާބުގައި ދެންނެވިއެވެ. ”ސާހިބާ! ފެންގަނޑު އުތުރި އަރާ އެއްވެސްފަހަރު އަޅުގަނޑު ވެވުގެ ތެރެއަށް ލާދޭނެ މީހަކު ނުވޭ. އަޅުގަނޑު ގޮސްގޮސް އޮއްވާ ކޮންމެވެސް އެހެން މީހަކު އަބަދުވެސް އަޅުގަނޑަށް ވުރެ ކުރިން ގޮސް އެރޭ.“
8ދެން އީސާގެފާނު ވިދާޅުވިއެވެ. ”ތެދުވޭ! އަދި ކަލޭ އޮށޯވެ ތިޔަ އޮތް ތަންމަތިގަނޑު ނަގައިގެން ހިނގައި ގަނޭ.“ 9ހަމައެވަގުތު އެމީހާ ގަދަ ވެއްޖެއެވެ. އަދި އެމީހާ އޮށޯވެ އޮތް ތަންމަތި ނަގައިގެން ހިނގަން ފަށައިފިއެވެ.
މިކަން މި ގޮތަށް ހިނގީ ސަބަތުގެ ދުވަހެއްގައެވެ. 10އެހެންކަމުން އެތާނގައި ތިބި ބަނީއިސްރާއީލުގެ ވެރިން އެމީހާއަށް ބުންޏެވެ. ”މިއަދު މިއީ ސަބަތުގެ ދުވަސް. މިއަދު ކަލޭ ތިޔަ ތަންމަތި އުފުލުމަކީ އަހަރެމެންގެ ގަވާއިދުތަކާއި ޚިލާފުކަމެއް.“
11ނަމަވެސް އޭނާ ޖަވާބުގައި ބުންޏެވެ. ”އަހަރެންގެ ބަލި ފަސޭހަކޮށްދިން މީހާ އަހަންނަށް އެންގެވީ މި ތަންމަތި ހިފައިގެން ހިނގައިގަންނާށޭ.“
12އެމީހުން ބުންޏެވެ. ”ކަލެއަށް ތިހެން ކަންތައް ކުރަން އެންގީ ކާކު؟“
13ނަމަވެސް ބަލި ފަސޭހަވީ މީހާއަކަށް އީސާގެފާނަކީ ކާކުކަމެއް ނޭނގެއެވެ. އެހެނީ އެތަނަށް އެތައް ބަޔަކު އެއްވުމުން އެމީހުންތަކުގެ ތެރެއަށް ވަދެވަޑައިގެން އީސާގެފާނު އެތަނުން ގެއްލި ވަޑައިގަތީމަ އެވެ.
14ފަހުން ބައިތުލް މަޤްދިސްގެ ތެރޭން އީސާގެފާނު އެމީހާ ހޯއްދަވައި އެމީހާއަށް ވިދާޅުވިއެވެ. ”އަޑުއަހާ! މިހާރު ކަލޭ ތިޔަވަނީ ގަދަ ވެފަ. ދެން ފާފަކުރުން ހުއްޓާލާ! އެހެން ނޫނީ ތިޔަށް ވުރެ ނުބައި ގޮތެއް ވެސް ދިމާ ވެދާނެ.“ 15ދެން މި މީހާ ގޮސް ބަނީއިސްރާއީލުގެ ވެރިންގެ ގާތު އޭނާގެ ބަލި ފަސޭހަ ކޮށްދެއްވީ އީސާގެފާނު ކަމުގައި ބުނެފިއެވެ.
މާތްރަސްކަލާނގެ ދަރިކަލުން
16އެއަށް ފަހު ބަނީއިސްރާއީލުގެ ވެރިން އީސާގެފާނަށް ވަރަށް ގިނަ އުނދަގޫތައް ދޭން ފެށިއެވެ. އެއީ އެކަލޭގެފާނު މިފަދަ ކަންތައްތައް ސަބަތުގެ ދުވަހުގައި ކުރައްވަމުން ގެންދަވާތީއެވެ. 17ނަމަވެސް އީސާގެފާނު އެމީހުންނަށް ވިދާޅުވިއެވެ. ”އަހަރެންގެ ބައްޕާފުޅު ވެސް މަސައްކަތް ކުރެއްވުން ހުއްޓައެއް ނުލައްވާ. އެހެންވީމާ އަހަރެން ވެސް މަސައްކަތް ހުއްޓައެއް ނުލާނަން.“ 18މިބަސްފުޅުގެ ސަބަބުން ބަނީއިސްރާއީލު މީހުން އަދި ވަކިން ބޮޑަށް އީސާގެފާނު އަވަހާރަކޮށްލަން މަސައްކަތް ކުރަން ފެށިއެވެ. އެއީ އީސާގެފާނު ސަބަތުގެ ދުވަހުގެ ގަވާއިދާއި ޚިލާފުވެ ވަޑައިގަތީތީ އެވެ. އަދި އެކަލޭގެފާނުގެ ބައްޕައަކީ މާތްރަސްކަލާނގެއޭ ވިދާޅުވީތީ އެވެ. އެގޮތުން އީސާގެފާނު އެކަލޭގެފާނާއި މާތްރަސްކަލާނގެ އާއި އެއްވަރު ކުރެއްވީތީ ވެސް މެއެވެ.
19އީސާގެފާނު ވިދާޅުވިއެވެ. ”ނަމަވެސް ހަމަ ޔަޤީން ކަށަވަރު. ދަރިކަލުންނަކަށް އެއްވެސް ކަމެއް އެކަންޏެއް ނުކުރެއްވޭނެ. ދަރިކަލުން ކުރައްވާ ހުރިހާ ކަމަކީ ވެސް ބައްޕާފުޅު ކުރައްވާތީ ދަރިކަލުންނަށް ފެންނަ ކަންތައް. އެއީ ދަރިކަލުން ކުރައްވަނީ ހަމަ ބައްޕާފުޅު ކުރައްވަމުން ގެންދަވާ ކަންތައްތައް. 20ބައްޕާފުޅު ދަރިކަލުންދެކެ ލޯބިފުޅުވެ ވޮޑިގެންވާތީ ބައްޕާފުޅު ކުރައްވާ ހުރިހާ ކަމެއް ދަރިކަލުންނަށް އަންގަވާ. ބައްޕާފުޅު މިއަށް ވުރެ އަދި މާ މަތިވެރި ކަންތައްތައް ކުރައްވަން ވެސް ދަރިކަލުންނަށް އަންގަވާނެ. އަދި އޭރުން ކަލޭމެން އެންމެން ވެސް މާހައިރާންވެ އަންތަރީސްވާނެ. 21ބައްޕާފުޅު މީސްތަކުން މަރުވުމަށް ފަހު އަލުން ދިރުއްވާހެން ހަމަ ދަރިކަލުން ވެސް އެދަރިކަލުން ބޭނުންފުޅު މީހަކަށް ދިރުން ދެއްވާނެ. 22އަދި ބައްޕާފުޅު އެއްވެސް މީހަކާ ދޭތެރޭ ހިސާބެއް ނުބައްލަވާނެ. އެހެނީ މީސްތަކުންނާ ދޭތެރޭ ހިސާބު ބެއްލެވުން ބައްޕާފުޅު ވަނީ ދަރިކަލުންނާއި ހަވާލުކުރައްވާފަ. 23އެހެންކަމުން އެންމެހާ މީސްތަކުން ވެސް ބައްޕާފުޅަށް އިޙުތިރާމުކޮށް ބިރުވެތިވާ ފަދައިން ދަރިކަލުންނަށް ވެސް އިޙުތިރާމުކޮށް ބިރުވެތިވާން ޖެހޭނެ. ދަރިކަލުންނަށް އިޙުތިރާމުކޮށް ބިރުވެތި ނުވާ މީހަކީ ދަރިކަލުން ފޮނުއްވި ފަރާތް ކަމުގައިވާ ބައްޕާފުޅަށް ވެސް އިޙުތިރާމުކޮށް ބިރުވެތިވާ މީހެއް ނޫން.
24ހަމަ ތެދެއް، އަހަރެންގެ ބަސްތައް ގަބޫލުކޮށް އަދި އަހަރެން ފޮނުއްވި ފަރާތް ގަބޫލު ކުރާ ކޮންމެ މީހަކަށް ވެސް ނިމުންނުވާ ޙަޔާތް ވަނީ މިހާރު ވެސް ލިބިފާ. އެމީހުން ކުށްވެރިކޮށް އެމީހުންނާ ދޭތެރޭ ހިސާބެއް ނުބެލެވޭނެ. އެއީ އެމީހުން މިހާރު ވެސް ވަނީ މަރުވުމުން ބޭރުވެ ދާއިމީ ޙަޔާތަކަށް ވާސިލުވެފައި. 25އަހަރެން ބުނަންތަ؟ އެފަދަ ދުވަހެއް އެބައާދޭ. އަދި ކޮބާ! އެދުވަސް މިހާރު ވެސް މި ވަނީ އައިސްފަ. އެދުވަހުން މަރުވެފައިވާ#5:25 މިތަނުގައި މަރުވެފައިވާ ކަމަށް އެ އިޝާރާތް ކުރައްވަނީ ފާފައިގެ ސަބަބުން ރޫޙާނީގޮތުން މަރުވެފައި ތިބި މީހުންނަށެވެ. މީހުންނަށް މާތްރަސްކަލާނގެ ދަރިކަލުންގެ އަޑުއިވޭނެ. އަދި އެ އަޑު އިވޭ ބަޔަކަށް ދިރިހުރުން ލިބޭނެ. 26ދިރުން ލިބެނީ ބައްޕާފުޅުގެ ކިބަފުޅުން. އެހެންކަމުން ބައްޕާފުޅު ވަނީ ދިރުން ދިނުމުގެ ހުއްދަ ދަރިފުޅަށް ދެއްވާފައި. 27އަދި މީސްތަކުންނާއި މެދު ހިސާބު ބެއްލެވުމުގެ އިޚުތިޔާރު ބައްޕާފުޅު ވަނީ ދަރިކަލުންނަށް ދެއްވާފައި. އެއީ އެ ދަރިކަލުންނަކީ އިންސާނާގެ ދަރިކަލުން ކަމަށް ވާތީ.#5:27 ”އިންސާނާގެ ދަރިކަލުން“ މިއީ އަލްމަސީޙަށް ނިސްބަތްކުރެވޭ އެއް ލަޤަބުފުޅެކެވެ.
28މިވާހަކަތަކާ މެދު ހައިރާން ނުވޭ. މަރުވެފައިވާ އެންމެންނަށް އެކަލޭގެފާނުގެ އަޑު އިވޭނެ ދުވަހެއް އެބައާދޭ. 29ދެން އެމީހުން ކަށްވަޅުތަކުން އަރައި ދިރިގެން އަންނާނެ. ހެޔޮ އަމަލު ކުރި މީހުންނަށް އަލުން ދިރުން ލިބި ނިމުންނުވާ ޙަޔާތް ލިބޭނެ. އަދި ނުބައި އަމަލުކުރި މީހުން ނަންގަވައި އެމީހުންނަށް ޙައްޤު ސަޒާދެވޭނެ. 30އަހަރެން އަމިއްލައަކަށް އެއްވެސް ކަމެއް ނުކުރެވޭނެ. އަހަރެން ކަންތައްކުރަނީ އަހަރެންނަށް އެންގެވުނު ފަދައިން. އެހެން ކަމުން އަހަރެންގެ ނިންމުމަކީ އިންސާފުވެރި ނިންމުމެއް. އަހަރެން އެއްކަމެއް ވެސް އަހަރެންގެ އަމިއްލަ އުފަލަކަށްޓަކައެއް ނުކުރަން. އަހަރެން ކުރަނީ އަހަރެން ފޮނުއްވި ފަރާތުގެ އުފަލަށްޓަކައި ކުރާ ކަންތައް.“
އީސާގެފާނާއިމެދު ވާ ހެކިތައް
31”އަހަރެންނާއި ދޭތެރޭ އަހަރެން މިބުނާ ބަސްތަކަކީ އަހަރެން އެކަނި ބުނާ ބަސްތަކެއް ނަމަ އެބަސްތަކުގެ ތެދުކަން ޔަޤީންކޮށް ދެވޭނެ ގޮތެއް ނޯންނާނެ. 32ނަމަވެސް އަހަރެންނާއި މެދު ހެކިދޭނެ ފަރާތެއް އެބަވޭ. އަދި އަހަރެންނާއި މެދު އެކަލާނގެ އެންގެވި ބަސްތަކަކީ ތެދުކަން އަހަރެންނަށް އެނގޭ. 33ޔަޙުޔާގެފާނުގެ އަރިހަށް ކަލޭމެން މީހުން ފޮނުވީމު. އަދި އެކަލޭގެފާނު ތެދުބަހުން ކަލޭމެންގެ ސުވާލުތަކަށް ޖަވާބުދެއްވި. 34އަހަރެން އެހެން މިބުނީ ކޮންމެހެން އެހެން އިންސާނެއްގެ ހެކިބަހެއް އަހަންނަށް ބޭނުން ވާތީއެއް ނޫން. ނަމަވެސް އަހަރެން މިހެން މި ބުނީ މިގޮތުން ވެސް ކަލޭމެންނަށް ދިންނެވުން ލިބޭނެ ހެން ހެދުމަށް. 35ޔަޙުޔާގެފާނު ހުރީ އަލިގަދަ ބައްތިއެއް ފަދައިން ވިދަވިދާ. އަދި ކަލޭމެން އެކަލޭގެފާނުގެ ކިބައިން ލިބެމުން ދިޔަ އަލިކަމުން ދުވަސްކޮޅަކަށް އުފާ ހާސިލް ކުރި. 36ނަމަވެސް ޔަޙުޔާގެފާނު ވިދާޅުވި ބަސްފުޅުތަކަށް ވުރެވެސް މާ މުހިންމު ހެއްކެއް އަހަރެންގެ ފަރާތުގައިވޭ. އެއީ އަހަރެން ދަސްކޮށްދެމުން މިދާ ކަންތަކާއި ދައްކަމުން މި ގެންދާ މުޢުޖިޒާތްތައް. އަދި އަހަރެންގެ ބައްޕާފުޅު އަހަރެންނަށް ކުރުމަށް އެންގެވި ކަންތައްތައް އަހަރެން ކޮށް ނިންމުން. މިކަންތައްތަކުގެ ސަބަބުން އަހަރެން ފޮނުއްވީ ބައްޕާފުޅުކަން ސާބިތު ކޮށްދޭ. 37އަދި ހަމަ އަހަރެން ފޮނުއްވެވި އަހަރެންގެ ބައްޕާފުޅު ވެސް އަހަރެންނާއި މެދު ހެކިވެ ވޮޑިގަންނަވާ. ކަލޭމެން ދުވަހަކު ވެސް ބައްޕާފުޅުގެ އަޑުފުޅު އަހާފައެއް ނުވާނެ. އަދި ބައްޕާފުޅު ފެނިފައެއް ވެސް ނުވާނެ. 38އަދި އެކަލާނގެ ބަސްފުޅުތަކެއް ކަލޭމެންގެ ހިތުގައި ހަރުލާފައެއް ވެސް ނުވާނެ. އެއީ ކަލޭމެން އެކަލާނގެ ފޮނުއްވި ފަރާތް ކަމަށްވާ އަހަރެން ގަބޫލު ނުކުރުމުގެ ސަބަބުން.
39ކަލޭމެން މާތްރަސްކަލާނގެ މުޤައްދަސް ފަތްފުށްތައް ކިޔަވާ އެފޮތްތައް ދަސްކޮށް ހަދާ! ކަލޭމެން އެފޮތްތައް ކިޔަވަނީ ނިމުންނުވާ ޙަޔާތް ލިބިގަތުމަށް އެދި. އެކަމަކު އެފޮތްތަކުގައި ލިޔެވިގެން ވަނީ ހަމަ އަހަރެންނާ ބޭހޭގޮތުން. 40ނަމަވެސް އެ ނިމުންނުވާ ޙަޔާތް ލިބިގަތުމަށް އަހަރެންގެ ބަސްތައް ގަބޫލު ކުރުމަށް ކަލޭމެން އެބަ އިންކާރުކުރޭ. 41މީސް މީހުންގެ ކިބައިން ލިބޭ ތަޢުރީފުގެ ބަސްތަކެއް އަހަރެންނަކަށް ބޭނުމެއް ނުވޭ. 42ނަމަވެސް އަހަރެން ދަންނަން ކަލޭމެންގެ ގޮތް. ކަލޭމެންގެ ހިތުގައި މާތްރަސްކަލާނގެ ކިބަފުޅަށް ލޯތްބެއް ނުވޭ.
43އަހަރެން އައިސް މިހިރީ ސީދާ ބައްޕާފުޅު ފޮނުއްވައިގެން. ވިޔަސް ކަލޭމެން އަހަރެން ބަލައެއް ނުގަތް. އެކަމަކު އެހެން މީހަކު އޭނާގެ އަމިއްލަ ނަމުގައި އައުމުން އެމީހަކަށް އެބަ މަރުހަބާ ކިޔާ. 44ކަލޭމެން އެކަކު އަނެކެއްގެ ތަޢުރީފުގެ ބަސްތައް ލިބުމަށް އެދޭ. ނަމަވެސް އެއްކައުވަންތަ މާތްކަލާނގެ ކިބަފުޅުން ރުހިވޮޑިގަތުން ލިބިގަތުމަކަށް ކަލޭމެން މަސައްކަތެއް ނުކުރޭ. ވީއިރު ކަލޭމެންނަށް އީމާން ވެވޭނީ ކިހިނެއް؟ 45ނަމަވެސް ބައްޕާފުޅުގެ ކުރިފުޅުމަތީ ކަލޭމެން ކުށްވެރިކުރާނީ އަހަރެން ކަމުގައި ހީނުކުރާތި. ކަލޭމެން ހީކޮށް ތިޔަތިބީ ކަލޭމެން ސަލާމަތް ކޮއްދެއްވާނީ މޫސާގެފާނު ކަމަށް. އެކަމަކު ބައްޕާފުޅުގެ ކުރިފުޅުމަތީ ކަލޭމެން ކުށްވެރި ކުރާނީ އެކަލޭގެފާނު. 46ކަލޭމެން މޫސާގެފާނުގެ ބަސްފުޅުތައް އަހައި ގަބޫލުކޮށް އީމާންވެގެން ތިބިނަމަ ކަލޭމެން އަހަރެންގެ ބަސް ގަބޫލު ކުރީސް. އެއީ މޫސާގެފާނު އަހަރެންނާއި ބޭހޭގޮތުން ވަނީ ލިޔުއްވާފައި. 47އެކަމަކު ކަލޭމެން މޫސާގެފާނު ލިޔުއްވި ބަސްފުޅުތައް ގަބޫލު ނުކުރިއިރު އަހަރެންގެ ބަސްތައް ވަކި ގަބޫލު ކުރާނެތަ؟“
Currently Selected:
ޔޫޙަންނާ 5: ކމ
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.