Yohane 6
6
Yesu wakuryeska ŵanthu vikwi vinkhonde
(Mat 14.13-21; Mrk 6.30-44; Luk 9.10-17)
1Pamanyuma pa ichi, Yesu wakambukira ku sirya linyakhe la Nyanja ya Galileya iyo ndi nyanja ya Tiberiya. 2Mzinda wa ŵanthu ukamurondezga chifukwa ŵakawona vimanyikwiro ivyo wakachita pa ŵarwari. 3Yesu wakakwerera ku phiri ndipo kwenekura wakaya kakhara pasi na ŵasambiri ŵakhe. 4Ndipo Paska, chiphikiro cha ŵaYuda, likaŵa pafupi. 5Sono Yesu pakwinuska maso ghakhe na kuwona kuti mzinda wa ŵanthu ukwiza kwa iyo, wakamufumba Filipu wakati, “Kasi tingaya kagula nkhu vingwa kuti ŵanthu aŵa ŵarye?” 6Wakayowoya ichi kuti wamuyezge Filipu, chifukwa iyo mwenecho wakamanya kale icho wachitenge.
7Filipu wakamuzgora wakati, “Nanga ndarama 200 kuti zingagula chara vingwa vyakukwana kuti waliyose wa iwo wapokeko wuwo nanga kangaŵa kachoko.”
8 Musambiri wakhe yunji, zina lakhe Andreya, munung'una wa Simoni Petrosi, wakati, 9“Walipo pano musepuka yumoza mweneuyo wali na vingwa vya nyauti vinkhonde na somba ziŵiri. Kweni ndivyo vingachitachi ku ŵanthu wose aŵa?”
10Yesu wakati, “Ŵakharikani pasi ŵanthu.” Sono pakaŵa utheka unandi pa malo gheneghara. Ntheura ŵanthu ŵakakhara pasi ndipo unandi wawo ŵakaŵa ŵanarume pera pafupi vikwi vinkhonde. 11Ntheura Yesu wakatora vingwa, ndipo ŵakati wawonga kwa Chiuta, wakaŵagaŵira ŵanthu awo ŵakakhara pasi. Wakachita ntheura pera na somba na kuŵagaŵira kwakuyana na umo ŵakakhumbira. 12Para ŵanthu ŵakati ŵakhuta, Yesu wakaŵaphalira ŵasambiri ŵakhe kuti, “Sorani vimenyu ivyo vyakharapo, kuti pareke kutayikapo kalikose.” 13Ntheura ŵakasora vimenyu vya vingwa vinkhonde vya nyauti vyeneivyo ŵakavireka awo ŵakaryanga. Ndipo ŵakazuzga vidunga 12.
14Para ŵanthu ŵakawona chimanyikwiro icho Yesu wakachita ŵakati, “Iyi ndiyo nadi nchimi yeneiyo ŵakatenge yikwiza mu charu!” 15Para Yesu wakamanya kuti ŵanthu ŵakakhumbanga kwiza kamukora na nkhongono na kumwimika kuti waŵe karonga wawo, wakawukapo na kuwereraso ku phiri kuti wakaŵe pa yekha.
Yesu wakwenda pa maji
(Mat 14.22-33; Mrk 6.45-52)
16Kukati kwaŵa mise, ŵasambiri ŵakhe ŵakakhilira ku nyanja, 17na kunjira mu ngaraŵa na kwamba kwambuka nyanja kuruta ku Kaperenaumu. Pa nyengo iyi ndipo kwafipa kale, kweni Yesu wakaŵa wandafike kwa iwo. 18Nyanja yikawuka chifukwa mphepo yikuru yikaputanga. 19Para ŵakati ŵavuŵa ngaraŵa kuyana na mtunda wa makilomita ghankhonde panji ghankhonde na limoza, ŵakawona Yesu wakwenda pa nyanja, ndipo ŵakazura na wofi. 20Yesu wakaŵaphalira wakati, “Ndine, mungopanga.” 21Penepapo ŵakaŵa ŵakukondwa kumutorera mu ngaraŵa ndipo maluŵiro ngaraŵa yikafika pa mlima uko ŵakayanga.
Ŵanthu ŵakumupenja Yesu
22Na machero ghakhe ŵanthu awo ŵakakhalira sirya linyakhe la nyanja, ŵakawona kuti pakaŵa ngaraŵa yimoza pera, na kuti Yesu wakanjiramo chara pamoza na ŵasambiri ŵakhe, kweni kuti ŵasambiri ŵakhe ŵakaruta ŵekha. 23Ndipouli ngaraŵa izo zikafuma ku nyanja ya Tiberiya zikafika pafupi na apo iwo ŵakaryeranga vingwa Fumu yikati yawonga Chiuta. 24Ntheura ŵanthu ŵakati ŵawona kuti Yesu palije, nanga ndi ŵasambiri ŵakhe, iwoŵene ŵakanjira mu ngaraŵa na kuruta ku Kaperenaumu, kuya kapenja Yesu.
Yesu ndi chingwa cha umoyo
25Para ŵakati ŵamusanga Yesu ku sirya linyakhe la nyanja, ŵakamufumba ŵakati, “Musambizgi, mukiza pauli kuno?”
26Yesu wakaŵazgora wakati, “Inya, inya nadi, nkhumunenerani kuti mukundipenja chifukwa chakuti mukawona vimanyikwiro chara, kweni chifukwa chakuti mukarya vingwa vira na kukhuta. 27Mureke kuteŵetera chakurya icho chikumara, kweni teŵeterani chakurya icho chikukhalirira mpaka ku umoyo wa muyirayira, cheneicho Mwana wa Munthu wati wamupaninge. Chifukwa Chiuta Wiske wali kuŵika chimanyikwiro cha mazaza ghakhe pa iyo.”
28Ntheura ŵakamufumba ŵakati, “Kasi tikwenera kuchita vichi kuti tichite mlimo wa Chiuta?”
29Yesu wakaŵazgora wakati, “Mlimo wa Chiuta ndi uwu: kuti mupulikane na mweneuyo wakamutuma.”
30Ŵakamufumbaso ŵakati, “Nchimanyikwiro uli icho mungachita kuti ise tichiwone ndipo tipulikanenge namwe? Muchitenge vichi? 31Ŵasekuru ŵithu ŵakarya mana mu mapopa. Nga ndi umo kuli kulembekera kuti, ‘Wakaŵapa chingwa chakufuma kuchanya kuti ŵarye.’ ”#Kuf 16.4, 15; Mas 78.24
32Ntheura Yesu wakati kwa iwo, “Inya, inya nadi, nkhumunenerani kuti ndi Mozesi chara uyo wakamupani chingwa chakufuma kuchanya. Ŵadada ndiwo ŵakumupani imwe chingwa chenecho chakufumira kuchanya. 33Pakuti chingwa icho Chiuta wakupereka ndi mweneuyo wakwikha kufuma kuchanya na kupereka umoyo ku charu.”
34Iwo ŵakati kwa iyo, “Fumu, mutipenge chingwa ichi nyengo zose.”
35Yesu wakati kwa iwo, “Ine ndine chingwa cha umoyo. Uyo wakwiza kwa ine, kuti waŵenge na njara chara. Uyo wakupulikana mwa ine kuti wati womirwenge chara. 36Kweni ine nkhamuphalirani kuti mwandiwona, ndipouli kuti mukupulikana chara. 37Wose awo Ŵadada ŵakundipa, ŵati ŵizenge kwa ine. Ndipo yose uyo wakwiza kwa ine, kuti nditi ndimutaye kuwaro chara. 38Pakuti ine ndili kwikha kufuma kuchanya kwiza kachita khumbo lane na lane chara, kweni kwiza kachita khumbo la uyo wakandituma. 39Ndipo ili ndi khumbo la Ŵadada awo ŵakandituma, kuti ndireke kutayapo nanga njumoza wa awo ŵali kundipa. Kweni kuti ndiŵawuske wose pa zuŵa la umaliro. 40Pakuti ili ndilo khumbo la Ŵadada, kuti yose uyo wakuwona Mwana na kupulikana mwa iyo, waŵenge na umoyo wa muyirayira ndipo ndamkumuwuska pa zuŵa la umaliro.”
41ŴaYuda ŵakamba kumudinginyikira Yesu chifukwa wakati, “Ine ndine chingwa icho chikikha kufuma kuchanya.” 42Ntheura ŵakati, “Asi uyu ndi Yesu mwana wa Yosefe, uyo ŵawiske na ŵanyina tikuŵamanya? Kasi sono wakuyowoya uli kuti, ndili kwikha kufuma kuchanya?”
43Yesu wakaŵazgora wakati, “Rekani kudinginyika mukati mwinu. 44Palije munthu wakwiza kwa ine kwambula kuti Ŵadada awo ŵakandituma ŵamuguzira kwa ine, ndipo ine ndamkumuwuska ku ŵakufwa pa zuŵa la umaliro. 45Nchimi zikalemba kuti ‘Ŵanthu wose ŵamkusambizgika na Chiuta.’ Yose uyo wakuŵapulika Ŵadada na kusambira kwa iwo ndiyo wakwiza kwa ine.#Yes 54.13 46Palije na yumoza uyo wali kuwona Ŵadada, kweni uyo wali kufuma kwa Chiuta pera, ndiyo wali kuŵawona Ŵadada. 47Inya, inya nadi, nkhumunenerani kuti yose uyo wakupulikana wali na umoyo wa muyirayira. 48Ine ndine chingwa cha umoyo. 49Ŵawiskemwekuru ŵakaryanga mana mu mapopa ndipo ŵakafwa. 50Ichi ndi chingwa icho chikwikha kufuma kuchanya icho munthu wakwenera kurya kuti wareke kufwa. 51Ine ndine chingwa chamoyo icho chikikha kufuma kuchanya. Usange munthu wakurya chingwa ichi wati waŵenge wamoyo kwa muyirayira. Ndipo chingwa icho nditi ndiperekenge ine, ndi thupi lane mwakuti charu chiŵe na umoyo.”
52Ntheura ŵaYuda ŵakamba kupindana mukati mwawo. Ŵakayowoyeskana ŵakati, “Kasi munthu uyu wangatipa uli thupi lakhe kuti tirye?”
53Yesu wakazgora wakati, “Inya, inya nadi, nkhumunenerani, kwambula kuti murye thupi la Mwana wa Munthu, na kumwa ndopa zakhe, kuti mungaŵa na umoyo pa mwekha chara. 54Yose uyo wakurya thupi lane na kumwa ndopa zane wali na umoyo wa muyirayira. Ndipo ine ndizamkumuwuska ku ŵakufwa pa zuŵa la umaliro. 55Pakuti thupi lane ndi chakurya chenecho ndipo ndopa zane ndi chakumwa chenecho. 56Yose uyo wakurya thupi lane na kumwa ndopa zane, wakukhara mwa ine ndipo ine nane mwa iyo. 57Nga ndi umo Ŵadada ŵamoyo ŵakanditumira ine, ndiposo ine nane ndili na umoyo mwa iwo, ntheuraso yose uyo wakurya ine, wati waŵenge na umoyo chifukwa cha ine. 58Ichi ndi chingwa icho chikikha kufuma kuchanya icho kuti chikuyana na mana chara agho ŵasekuru ŵinu ŵakarya kweni ŵali kufwa. Uyo wakurya chingwa ichi wati waŵenge wamoyo kwa muyirayira.”
59Yesu wakayowoya ichi mu nyumba ya kusoperamo apo wakasambizganga ku Kaperenaumu.
Mazgu gha umoyo wa muyirayira
60Ŵasambiri ŵa Yesu ŵanandi ŵakati ŵapulika vyeneivi ŵakati, “Kayowoyero aka nkhanonono, ndi njani wangapulikizga ku ichi.”
61Yesu wakamanya kuti ŵasambiri ŵakhe ŵakudinginyika pa ichi, ntheura wakati kwa iwo, “Kasi mukukhuŵara na kasambizgiro aka? 62Ipo kungaŵa uli usange mungawona Mwana wa Munthu wakukwerera uko wakaŵa kale? 63Mzimu wa Chiuta ndiwo ukupereka umoyo, thupi la munthu kuti likwandula kanthu chara. Mazgu agho ndamuyowoyerani ndigho Mzimu na umoyo. 64Kweni pali ŵanji ŵa imwe awo kuti ŵakupulikana chara.” (Pakuti Yesu wakaŵamanya kufuma pakudanga awo ŵamkuwura kupulikana na uyo wizamkumwendera mphiska.) 65Yesu wakarutilira wakati, “Ichi ndicho chifukwa ndangumuphalirani kuti, palije na yumoza wangiza kwa ine kwambula kuti Ŵadada ndiwo ŵamwenereske kwiza kwa ine.”
66Kufuma nyengo iyo ŵanandi ŵa ŵasambiri ŵakhe ŵakamujowola na kuwerera ku vinthu vyawo vya kale, ndipo kuti ŵakamanya kwendaso nayo chara. 67Yesu wakaŵafumba ŵasambiri 12 ŵara, wakati, “Kasi namweso mukukhumba kuruta?”
68Simoni Petrosi wakamuzgora wakati, “Fumu, kasi tirutenge kwa njani? Imwe ndimwe muli nagho mazgu gha umoyo wa muyirayira. #Mat 16.16; Mrk 8.29; Luk 9.20 69Ntheura ise tapulikana, ndipo tapanikizga na kumanya kuti imwe ndimwe Mutuŵa Yura wa Chiuta.”
70Yesu wakaŵazgora wakati, “Asi ine nkhamusorani imwe 12, kweni yumoza wa imwe ndi Satana?” 71Wakanenanga Yudasi mwana wa Simoni Isikariyoti, pakuti iyo, nanga wakaŵa yumoza wa ŵasambiri 12, ndiyo wakaŵa wakwiza kamwendera mphiska Yesu.
Currently Selected:
Yohane 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi