Yoane Kulondolola
Kulondolola
Ilandwe Lisuma ilyalemvilwe na Yoane likalanda vino Yesu Izwi lyakwe Leza ilya pe. Yesu wizile aya umuntu aikala na pakasi kitu (1:14). Ndi vino calembwa ukuti Ilandwe Lisuma likalanda kuli kawelenga kuti ataile vino Yesu ali Katuula uwalavilwe nupya Mwana wakwe Leza, nu kuti yano amutaila yaye nu umi (20:31)
Pacisila ca kulondolola kuno kukulanda pi zwi lyakwe Leza lyakuma kuli Yesu, muputule wakutandika wi Landwe Lisuma ukulanda pa vizungusyo vino vikalanga ukuti Yesu ali Katuula uwalavilwe, Mwana wakwe Leza. Ivyalondelela pali vii, ukulanda kwa kuumbula kwa vizungusyo. Imbali ii ya lupapulo ikatunena vino antu yamwi yataile Yesu nu kuya alondezi yakwe, na vino yamwi yamukanyile nupya yatamutaile. Capita 13-17 yalanda mu utali utandano uwali pali Yesu na alondezi yakwe mu usiku uno Yesu walemilwe. Nupya yalanda pa mazwi ya kuiteyanya nu kukomelezya kunoyali pa wanda wa kutanwa. Macapita akusyalikizya yakalanda pa kulemwa kwakwe na vino yamutwazile ku upinguzi, pakutanwa nu kuzyukuka kwakwe, nu kuloleka ku alondezi yakwe pacisila ca kuzyukuka.
Kulanda pa mwanaci wino yalemile ala akulongozya (7:53–8:11) kwene kwalembwa mukasi ka tumanyililo tuu […] pamulandu wakuti mpapulo zya nkolelo na yakasenula ya mpapulo ankolelo yakusile. Lelo yamwi yene yalemvile kulanda kukwene muze mumwi.
Yoane wakonkomezya pa wila wa umi wapee muli Klistu. Umi uu ukatandika ndakai nupya ukaiza kuli yao azumila Yesu ukuti ali nzila, cumi nu umi. Yoane mu milembele yakwe waomvya vimanyililo vya vintu vikaloleka cila wanda. Vyene vikasontelela ku umi wa mupasi uwa cumi. Vintu vii amanzi, mukate, luswepo, kacema ni mfwele zyakwe nga ni calo ca matingi ni vizao vyakweco.
Utantiko wa vili mu lupapulo luu
Kulondolola kwi zwi lino likapela umi 1:1-18
Yoane Kawatizya nga na alondezi ankolelo yakwe Yesu 1:19-51
Milimo yakwe Yesu 2:1–12:50
Manda yakusyalikizya yano Yesu waomvile mukasi nu mupipi na Yelusalemu 13:1–19:42
Kuzyukuka nu kuloleka kwa Mwene 20:1-31
Kulanda mu wipi kwakusyalikizya: Yesu waloleka nupya mu Galile 21:1-25
Currently Selected:
Yoane Kulondolola: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013