Yoane 6
6
Yesu wimula antu kuluta pa mazimbi yasano
(Mat 14:13-21; Mk 6:30-44; Luk 9:10-17)
1Pacisila ca vintu vii, Yesu alambila ku mbalama yuze yakwe yemba wa Galile (nanti yemba uwaku Tibelyasi). 2Alino iumba likulu limulondela, pano lyaweni vilangililo vino wacisile pa kupozya yao ali alwale. 3Lyene Yesu akwela pa mwamba, nga aikala pansi pali pamwi na alondezi yakwe. 4Insita ya kuzevya Cimulo ca Ucilo yapalime. 5Lino Yesu wasanzula manso, alola iumba likulu likwiza kunoli, nga auzya Filipo ati, “Uzye aukwi kuno tungakala mikate yakuti antu yaa yalye?” 6Wene uzizye vii kuti amwezye, pano ala atamanya cino wali nu kucita.
7Filipo nawe amwaasuka ati, “Nanti impiya madenali imyanda iili nazyo kwene zitangakala mikate yakuti antu yaa yonsi yalye!”
8Na muze kwene uwamu alondezi, Andeleya, mwina wakwe Simoni Petulo, avwanga ati, 9“Kuno kuli umulumendo wino akweti mikate isano, ino yapangwa kufuma ku ngano, nga ni nswi ziili. Lelo vii vitangakumana mu antu yaa aingi.”
10Yesu ayanena ati, “Tekini antu pansi.” (Pali ni sote lingi.) Caleka antu yonsi iikala pansi. Pali manye antu aonsi mazimbi yasano. 11Yesu atoola mikate ataizya kuli Leza, nga aankanya antu yano atenzi penepo. Mu musango uli onga atoola inswi ataizya kuli Leza, nga aankanya antu suka vikumana mu antu yonsi kulingana na vino yalondanga. 12Lino antu yonsi yalya iikuta, anena alondezi yakwe ati, “Kolonganikini mvungwa zino zisile zitatangana.” 13Alino nao yakolonganika, yazuzya mise ikumi na iili yakwe vyonsi vino vyasile.
14Caleka lino antu yalola cilangililo cino Yesu wacita yavwanga yati, “Cumi wii ali kasema wino malembelo yakati ali nu kwiza!” 15Lino Yesu wamanya vino yakulonda kumupatikizya kuya Mwene, afumapo aya ku mwamba kuko kuno wali wenga.
Yesu wapita pa manzi
(Mat 14:22-33; Mk 6:45-52)
16Lino kakuku katola, alondezi yakwe yatentemukila kuli yemba, 17yapatama mu wato kuti yalambe yemba yaye ku Kapenaumu. Lyene kusuka kufita ala Yesu atali aiize kunoyali. 18Alino kuya cipunga cikulu na maimbi yakatuka. 19Walanga alondezi yafiya wato ukuya mukasi kakwe yemba, manye kulingana na makilomita yatatu na citika, yalola Yesu akupalama ku wato, ala akupita pa manzi. Alino yuvwa intete. 20Lelo ayanena ati, “Anene! Mutoopa.” 21Lyene alondezi yalonda kumupatika mu wato, nga zuwazuwa uwato ufika ku cituntu, kuno yayanga.
Antu yalonda Yesu
22Pa wanda uwalondelela, iumba ilyali ku ufumondaka wakwe yemba, limanya vino papa pali sile uwato onga. Nupya lyamanyile vino Yesu atapatimemo nu kupita pamwi na alondezi yakwe. Lelo yene yapisile yamusya. 23Alino amato na yauze, yao afumile ku Tibelyasi, yasuka iiza. Pali pipi na pa ncende pano Mwene wataizye kuli Leza pa mukate nu kupeela iumba kuti lilye. 24Lino iumba lyalola ukuti Yesu na alondezi yakwe kwene yasipo, yapatama mu mato yaya ku Kapenaumu ku kulonda Yesu.
Yesu ali Cakulya Icikapela Umi
25Lino yamuzana ku mbalama yuze yakwe yemba, yamuzya yati, “Kasambilizya, uzye alilaci lino wizile kuno?”
26Yesu aasuka ati, “Cumi namunena nati musikundondela pamulandu wakuti mwaweni vilangililo, lelo pamulandu wakuti mwalile mikate mwikuta. 27Mutaombela cakulya cino cikalowa, lelo mwaombela cakulya cino cikaikalilila manda pe nupya cikapela umi wape. Cii cili cakulya cino Mwana wa Muntu alamupeela, pano Leza Tata wamupeela insambu yakucita vivyo.”
28Nao yamuzya yati, “Uzye lyene tulinzile kucita cani kuti tucite vino Leza akalonda?”
29Yesu nawe aasuka ati, “Cino Leza akulonda kuti mucite, ukutaila muli wino watuma.”
30Nao yamuzya yati, “Uzye cilangililo cii cino umacita kuti tulole nga tukutaile? Uzye icani cino umacita? 31#Kuf 16:4, 15; Mas 78:24 Mu lwanga vikolwe vitu vyalyanga mana, ndi vino calembwa mu malembelo, cati, ‘Wayapile cakulya kufuma kwiyulu kuti yalye.’”
32Yesu ayanena ati, “Cumi namunena vino asi Mose uwamupile cakulya kufuma kwiyulu, lelo Tata aliwe akamupeela cakulya ca cumi kufuma kwiyulu. 33Pano cakulya cino Leza akapeela awiyo uwafuma kwiyulu, wino akapeela umi ku antu amu nsi onsi.”
34Alino yavwanga yati, “Mwene watupeela cakulya cico manda pe.”
35Yesu nawe avwanga ati, “Nene cakulya icikapela umi.” “Wino uwiza kunondi ataluvwa nzala, nga na wino uwataila ataluvwa lusala. 36Namunena vino ukundola kwene mwandola lelo mutantaila. 37Onsi yano Tata wampeela yaliza kunondi, na wino wensi uwiza kunondi ntalamuzinga. 38Pano nika kufuma kwiyulu asi kwiza cita kulonda kwane, lelo kulonda kwakwe wino uwantuma. 39Na kuu kuli kulonda kwakwe wino uwantuma, ukuti ntakaponzye nanti wenga pali yonsi yano wampela. Lelo ukuti nkaleke yonsi yakazyukuke yaye nu umi pa wanda wampelelekezyo. 40Pano kulonda kwakwe Tata kwakuti wensi uwalola Mwana nu kumutaila, wene alaya nu umi wape, nga nani ndaleka azyukuke pa wanda wampelelekezyo.”
41Ayuda yang'wing'wintika pano wavwanga wati, “Nene cakulya cino cafuma kwiyulu.” 42Yavwanga yati, “Uzye wii asi Yesu mwana wakwe Yosefu? Uzye lyene angavwanga uli ati, ‘Nafuma kwiyulu?’”
43Yesu ayanena ati, “Tini kung'wing'wintika pakasi kinu. 44Kusi umwi angiza kunondi, suka sile Tata wino uwantuma ndi wamuleta kunondi, nga nani ndaleka azyukuke aye nu umi pa wanda wampelelekezyo. 45#Eza 54:13 Yakasema yalemvile yati, ‘Onsi yalasambiliziwa na Leza.’ Wino wensi akauvwa nu kusambilila kuli Tata wene akaiza kunondi. 46Nsyakuti umuntu ali wensi watala walola Tata, suka sile wino uwafuma kuli Leza, wene uwalola Tata. 47Cumi, namunena nati, wino uwataila munondi wene ali nu umi wape. 48Nene Cakulya icikapela umi. 49Nanti angala vikolwe vinu mu lwanga vyalyanga cakulya cino camwangwa ukuti mana, lelo vyene vyafwile. 50Lelo wino wensi uwalya cakulya cino ciiza pano pansi kufuma kwiyulu wene atalafwa. 51Nene kwene indi cakulya icikapela umi cino ciiza pano pansi kufuma kwiyulu. Muntu ndi walya cakulya cii, wene alaya nu umi wape. Umwili wane uli cakulya ca umi uno nkapela ku antu yonsi amu nsi kuti yaye nu umi.”
52Caleka Ayuda yapazyanya nu kuuzyanya aisikulu yati, “Uzye umuntu wii angatupeela mwili wakwe kuti tulye mu musango cii?”
53Yesu ayanena ati, “Cumi namunena vino ndi mutangalya mwili wa Mwana wa Muntu nu kumwa wazi wakwe, mutangaya nu umi. 54Wino wensi akulya mwili wane nu kumwa wazi wane wene ali nu umi wape, nga nani ndaleka azyukuke aye nu umi pa wanda wampelelekezyo. 55Pano umwili wane uli cakulya kwene ca cumi. Uwazi wane nao uli cakumwa kwene ca cumi. 56Wino wensi akulya umwili wane nu kumwa uwazi wane wene akaikala munondi, nga nani nkaikala munoli. 57Tata wino akapeela umi uwantuma, nga nani indi nu umi pamulandu wakwe. Mu musango uli onga kwene wino wensi akulya umwili wane alaya nu umi pamulandu wane. 58Cii cili cakulya cino ciiza pano pansi kufuma kwiyulu. Cisi wa cakulya cino vikolwe vinu vyalile, lelo pacisila vyene vifwa.”
59Yesu wavwanzile vintu vii ala akusambilizya mu ng'anda ya mapepo ku Kapenaumu.
Amazwi akapeela umi wape
60Lino alondezi yakwe aingi yuvwa vino Yesu wavwanga, nao yavwanga yati, “Amazwi yaa akome. Uzye aweni angayazumila?”
61Lelo Yesu lino wamanya vino alondezi yakung'wing'wintika pa mazwi yaa, ayauzya ati, “Uzye cii camusakamika? 62Uzye lyene cingaya uli ndi mwaweni Mwana wa Muntu akukwela kwiyulu, kuswilila kuno wafumile? 63Mupasi wakwe Leza aliwe akapeela umi. Amaka ya muntu yatangapeela umi. Amazwi yano namunena yene akapeela Mupasi wakwe Leza nu umi. 64Lelo nalyo kwene yamwi munomuli yasyakutaila.” (Kufuma ku utandiko wa kutumikila kwakwe, Yesu wamanyile yao atalamutaila nga na wiyo alamukoopa) 65Nupya Yesu ayanena ati, “Uu, uli mulandu kwene uno nali namunena vino kusi umwi angiza kunondi, suka sile Tata ndi waleka kuti alonde kwiza kunondi.”
66Kufuma lilyo kwene, alondezi yakwe Yesu aingi yamusya yata kumulondela. 67Alino Yesu auzya alondezi ikumi na yaili ati, “Uzye namwe kwene mukulonda kunsya?”
68 #
Mat 16:16; Mk 8:29; Luk 9:20 Simoni Petulo amwaasuka ati, “Mwene, uzye aweni namuze wino tungayako? Mazwi yako yakapela umi wape. 69Naswe twataila nu kumanya vino wewe Wamuzilo nupya wafuma kuli Leza.”
70Yesu nawe avwanga ati, “Uzye ntamusolwile mwemwe ikumi na yaili? Lelo wenga uwa munomuli wene u Musomvi.” 71Yesu pa kulanda vii, wasenulanga Yuda mwana wakwe Simoni Iskalyoti. Pano nanti angala Yuda wali a wenga uwamu alondezi ikumi na yaili, wene uwali nu kumukoopela ku anisi.
Currently Selected:
Yoane 6: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013