یوحنا 3
3
عیسی بیلِن نیقودیموس
1فَریسی‌لِرینگ آراسیندا نیقودیموس آدلی بیر آدام باردی، اُل یَهودیلِرینگ مِجلِسینینگ بیریدی. 2اُل بیر گیجَه‌نینگ ایچینده عیسانینگ یانینا گِلیپ: «یا اُستاد، بیز سِنینگ خودایدان گِلِن مُعلِّمدیگینگی بیلیَریس. چونکی خودایینگ اُزی سِنینگ بیلِن بُلماسا، گُرکِزِن عالاماتلارینگی گُرکِزیپ بیلمِزدینگ» دییدی. 3عیسی اُنگا: «سانگا دُغروسینی آیدیارین، تَزه‌دِن دُغمادیق آدام خودایینگ پادیشاهلیغینی گُروپ بیلمِز» دییّپ جُغاپ بِردی. 4نیقودیموس اُنگا: «قارّان آدام نَدیپ تَزه‌دِن دُغلوپ بیلِر؟ اُل یِنه-ده اِنه‌سینینگ گُوره‌سینه گیریپ، قایتادان دُغلوپ بیلمِز آخیری!» دییدی.
5عیسی شِیله جُغاپ بِردی: «سانگا دُغروسینی آیدیارین، سودان و مُقادِّس روحدان دُغمادیق آدام خودایینگ پادیشاهلیغینا گیریپ بیلمِز. 6بِدِندِن دُغان بِدِندیر، روحدان دُغان روحدیر. 7سانگا تَزه‌دِن دُغمالیسینگ دییَّنیمه گِنگ قالما. 8یِل ایسلَن طارافینا اُسیَر، سِن اُنونگ سِسلِرینی اِشیدیَرسینگ-ده، نیرِدِن گِلیپ، نیرَه باریانینی بیلمِیَرسینگ. روحدان دُغانلار هِم شِیلِدیر.»
9نیقودیموس اُندان: «بو نَهیلی بِیله بُلوپ بیلیَر؟» دییّپ سُرادی. 10عیسی اُنگا شِیله جُغاپ بِردی: «سِن اسرائیل‌ینگ مُعلِّمی بُلوپ-دا، بولاری بیلِنگُقمی؟ 11سانگا دُغروسینی آیدیارین، بیز بیلِنیمیزی آیدیاریس، گُرِنیمیزه شاهاتلیق اِدیَریس، اِمّا سیز بیزینگ شاهاتلیغیمیزی قابول اِتمِیَرسینگیز. 12مِنینگ یِردَکی زاتلار بارادا آیدیانلاریما اینانماسانگیز، اُندا آسمانداقی زاتلار بارادا آیتسام، نَدیپ اینانارقانگیز؟ 13هیچ کیم آسمانا چیقان دَلدیر، اُنگا دینگه آسماندان اینِن، یَعنی اینسان اُغلی، چیقاندیر. 14موسانینگ بیاباندا ییلانی یُقاری گُتِریشی یالی، اینسان اُغلی-دا یُقاری گُتِریلمِلیدیر.#سانامالار ۲۱:۹ 15شُنگا گُرَه اُنگا ایمان گِتیرِن هِر بیر آدام اِبِدی یاشایشا قاوشار.
16«خودای دونیَه‌دَکیلِری قاتی کَن سُیِندیگی اوچین اُزونینگ یِکِجه اُغلونی بِردی. اُل مونی اُغلونا ایمان گِتیرِنلِرینگ هیچ بیری هِلَک بُلمان، اِبِدی یاشایشا قاووشماغی اوچین اِتدی. 17خودای اُغلونی دونیَه‌دَکیلِری مَحکوم اِتمِک اوچین دَل-ده، اُندان باشغا اُنونگ اوستو بیلِن نِجات تاپسین دییّپ دونیَه ایبِردی. 18اُنگا ایمان گِتیرِن مَحکوم بُلماز. اِمّا ایمان گِتیرمِدیگه شو واقت مَحکوم اِدیلِندیر، سِبَبی اُل خودایینگ یِکِجه اُغلونا ایمان گِتیرمِدی. 19مَحکوملیک، اینه، بودیر: دونیَه نور گِلدی، اِمّا آداملار قارانگقیلیغی نوردان خاص قاوی گُردولِر، سِبَبی اُلارینگ ایشلِری یامانلیقدی. 20تِلِکه‌لیک اِدیَن آدام نوردان ییگرِنیَندیر، اُز اِدیَن تِلِکه‌لیکلِرینینگ اَشکَر بُلماغیندان قُرقوپ، نورا یاقینلاشیان دَلدیر. 21اِمّا یاخشیلیق اِدیَن آدام نورا یاقینلاشیار. شِیدیپ، اُنونگ ایشلِرینینگ خودایینگ حاقی اوچین اِدیلیَندیگی اَشکَر بُلیار.»
یحیانینگ عیسی باراداقی شاهاتلیغی
22شوندان سُنگ عیسی شَگیرتلِری بیلِن یهودیه اِطرافینا گیتدی. عیسی اُلار بیلِن بیرنَچه واقتلاپ شُل یِرده قالدی و اُل یِرده آداملاری تَعمید بِریَردی. 23شُل واقت سالیمینگ قُلایینداقی عِینوندا بُلسا خالق یحیی طارافیندان تَعمید بِریلیَردی. اُل یِرده سو کَندی و آداملار گِلیپ، اُل یِرده تَعمید آلیاردیلار. 24بو واقالار یحیی زیندانا سالینمازدان اُنگ بُلوپ گِچیپدی.
25شُل واقت یحیانینگ شَگیرتلِری بیلِن بیر یَهودینینگ آراسیندا یوونوپ-پَکیزلِنمه سونِّتی بارادا جِدِل توردی. 26اُلار یحیانینگ یانینا گِلیپ: «اِی اُستاد، اُردُنینگ بِیلِکی طارافیندا سِنینگ شاهاتلیق اِدِن آدامینگ، اینه، آداملاری تَعمید بِریَر. هِمّه‌لِر اُنونگ یانینا باریارلار» دییدیلِر. 27یحیی اُلارا شِیله جُغاپ بِردی: «آسماندان بِریلمِسه، اینسان هیچ زات اِدیپ بیلمِز. 28”مِن مسیح دَل، مِن دینگه اُنونگ اُووندِن ایبِریلدیم“ دییِنیمه سیزینگ اُزونگیز شاهاتسینگیز. 29گِلین دامادا دِگیشلیدیر. دامادینگ دُستی بُلسا، گِلمِسینه قاراشیپ، اُنونگ سِسینی اِشیدِنینده خاص شاتلانیاندیر. اِدیل شُنونگ یالی مِنینگ شاتلیغیم-دا ایندی کَمیل بُلدی. 30اُل بِییک بُلمالیدیر و مِن پِسِلمِلیدیرین.
31«یُقاردان گِلِن هِمّه‌دِن یُقاریدیر. یِردِن بُلان یِرینگکیدیر و یِردَکی زاتلار بارادا کِپلِیَندیر. آسماندان گِلِن هِمّه‌دِن یُقاریدیر. 32اُل گُرِنینه، اِشیدِنینه شاهاتلیق اِدیَر، یُنه اُنونگ شاهاتلیغینی هیچ کیم قابول اِتمِیَر. 33اِمّا اُنونگ شاهاتلیغینی قابول اِدِن کیشی خودایینگ حاقدیغینی تاصدیقلایاندیر. 34خودایینگ ایبِرِنی خودایینگ سُزلِرینی آیدیاندیر، سِبَبی خودای اُنگا مُقادِّس روحی اُلچِگسیز بِریَر. 35آتا اُغلی سُییَر و اُل هِمّه زادی اُنونگ اِلینه تابشیراندیر. 36اُغلا ایمان گِتیرِن آدام اِبِدی یاشایشا اِیه بُلیار، اِمّا ایمان گِتیرمِیَن اِبِدی یاشایشا قاووشماز، اُندان باشغا اُل خودایینگ غاضابینا دوچار بُلیار.»
Currently Selected:
یوحنا 3: TUKIR
Highlight
Share
Copy
Want to have your highlights saved across all your devices? Sign up or sign in
© Turkmen Truth