مرقوس 15
15
پئلاطین محکمه‌سئنده
1سحر تزدن، باش کاهئنلر، آغساقّاللار، دئن عالئملری و بوتون سنهدرئن مصلحتلشدئلر. اونلار عئسانی باغلاییب آپاردیلار و پئلاطا تسلئم اتدئلر. 2پئلاط اوندان سوروشدو: «آیا یهودئلرئن پادشاهی سَنسن؟»
عئسا جاواب ورئب اونا ددی: «ددئیئن کئمی‌دئر.»
3باش کاهئنلر اونا چوخ شیلرده ائتّئهام ووردولار. 4لاکئن پئلاط گئنه اوندان سوروشدو: «سن هچ جاواب ورمئرسن؟ باخ گؤر نه قدر سنئن ضئدّئنه شهادت ورئرلر.»
5آمّا عئسا حله ده جاواب ورمئردی، اله کی، پئلاط تعجّوب اتدی. 6پئلاط هر بایرامدا اوندان خاهئش اتدئکلری محبوسو اونلارا عفو ادردی. 7باراَبّا آدلی بئری وار ائدی کی، عوصیان واختی آدام اؤلدورن عوصیانچیلارلا بئرلئکده زنجئره وورولموشدو. 8خالق گلئب پئلاطدان ائسته‌دئلر کی، اونلارلا هر زامانکی کئمی اتسئن. 9پئلاط اونلارا جاواب ورئب ددی: «ائسته‌یئرسئنئز سئزئن اوچون یهودئلرئن پادشاهینی آزاد ادئم؟»
10پئلاط بئلئردی کی، باش کاهئنلر پاخیلّیقدان عئسانی اونون الئنه ورئبلر. 11لاکئن باش کاهئنلر خالقی قیزیشدیردیلار کی، اونون عوضئنه باراَبّانی آزاد اتسئن. 12او واخت پئلاط گئنه اونلاردان سوروشدو: «بس یهودئلرئن پادشاهی چاغیردیغینیز آداما نه ادئم؟»
13اونلار تکرار چیغیردیلار: «چارمیخا چک.»
14پئلاط اونلارا ددی: «آخی او، نه پئس ائش گؤروب؟»
اونلار داها چوخ باغیردیلار: «اونو چارمیخا چک!»
15پئلاط خالقی راضی اتمک اوچون باراَبّانی آزاد اتدی و عئسایا شالّاق ووردوراندان سونرا اونو چارمیخا چکئلمه‌یه وردی.
16عسگرلر عئسانی سارایین ائچئنه، «پرِتورئیوم» دیئلن یره آپاردیلار و فوجون هامیسینی بئر یره ییغدیلار. 17اونا قیرمیزی شئنل گیدئردئلر و تئکاندان تاج هؤروب اونون باشینا قویدولار. 18و اونا سالام ورمه‌یه باشلاییب دیئردئلر: «سالام، ای یهودئلرئن پادشاهی!» 19قامیشلا عئسانین باشینا ووروردولار، اوستونه توپوروردولر، و دئز چؤکوب اونا سجده ادئردئلر. 20عسگرلر عئسانی ائستهزا ادندن سونرا قیرمیزی شئنلی اونون اَینئندن چیخاردیب اؤز پالتارینی گیدئردئلر. و اونو چارمیخا چکئلمک اوچون اشئیه چیخارتدیلار.
21شمعون آدیندا کرِنِیلی بئر آدام شهرئن اشئیئندن گلئب اورادان کچئردی. شمعون ائسکندر و روفوسون آتاسی‌دیر. عسگرلر اونو مجبور اتدئلر کی، عئسانین چارمیخینی داشیسین. 22عئسانی جولجوتا دیئلن یره گتئردئلر (ترجومه اولونسا، او یرئن آدی «کلّه یری» دمکدئر.) 23او واخت اونا مورله#15:23 «مور» خوش قوخولو آجی بئر مادّه‌دئر کی، همئن آدی اولان آغاجین شئره‌سئندن آلینیر. قاریشمیش شراب وردئلر. لاکئن عئسا ائچمه‌دی. 24اونو چارمیخا چکدئلر و پالتارینی آرالاریندا پایلاشیب، کئمه نه چاتماسی اوچون پوشک آتدیلار. 25گونون اوچونجو ساعاتیندا#15:25 مقصد صاباحین دوقّوز ساعاتی‌دیر. عئسانی چارمیخا چکدئلر. 26اونون تقصئری باشینین اوستونده یازیلمیش ائدی: «یهودئلرئن پادشاهی.» 27اونونلا ائکی اوغرونو#15:27 و یا «عوصیانچی» دا چارمیخا چکدئلر، بئرئنی صاغ طرفئنده، او بئرئنی ده سول طرفئنده. 28و بله‌جه موقدّس کئتابدا یازیلدیغی سؤز یرئنه یتئشدی کی، دیئر: «موجرئملرله ساییلدی.»#15:28 اِشَعیا ۵۳:۱۲ 29اورادان کچنلر عئسانی سؤیوردولر و باشلارینی ترپه‌دئب دیئردئلر: «هِی! معبدی ییخیب اوچ گونده تئکن، 30اؤزونو خئلاص ات. چارمیخدان آشاغی اِن.» 31باش کاهئنلر و دئن عالئملری ده آرالاریندا اونو رئشخند ادئب دیئردئلر: «اؤزگه‌لری قورتاردی، لاکئن اؤزونو قورتارا بئلمئر. 32ائسرایئلئن پادشاهی مسئح، قوی ائندی چارمیخدان دوشسون و بئز گؤروب اونا ائمان گتئرک.» عئسانین یانیندا چارمیخا چکئلنلر ده اونو سؤیوردولر.
عئسانین اؤلومو
(متّا 27:45-56، لوقا 23:44-49، یوحنّا 19:28-30)
33گونون آلتینجی ساعاتی#15:33 ساعات گون‌اورتا ۱۲ بوتون اؤلکه‌یه#15:33 و یا «بوتون یر اوزونه» قارانلیق دوشدو و ساعات دوقّوزا#15:33 ناهاردان سورا ساعات اوچ قدر داوام اتدی. 34دوقّوزونجو ساعاتدا عئسا اوجا سَسله باغیردی: «ائلویی، ائلویی، لاما سَبَقته‌نی؟» ترجومه‌سی: «تاریم، تاریم! نه اوچون منی ترک اتدئن؟»#15:34 مزمور ۲۲:۱ 35اورادا دورانلاردان بعضئسی بونو اشئدنده ددئلر: «باخین، ائلیانی چاغیریر.» 36آرالاریندان بئری قاچیب، بئر سونگری سئرکه‌یه باتیردی و اونو بئر قامیشین اوجونا تاخیب عئسایا ائچئرتدی و ددی: «قویون گؤرک آیا ائلیا اونو اندئرمه‌یه گلئر؟» 37آمّا عئسا اوجا سَسله باغیریب، جان وردی. 38او آندا معبدئن پرده‌سی یوخاریدان آشاغی‌یا قدر ییرتیلیب ائکی بؤلوندو. 39عئسانین قاباغیندا دوران یوز باشی، اونون بله قیشقیریب جان وردئیئنی گؤرنده ددی: «دوغرودان دا بو آدام، تارینین اوغلو ائدی.» 40اورادا باش ورنلره تاماشا ادن بعضی آروادلار دا وار ائدی. اونلارین آراسیندا مجدللی مریم، یوسایین و کئچئک یعقوبون آناسی مریم و سالومه ده دایانمیشدی. 41عئسا جلئلده ائکن بو آروادلار اونون دالینجا گدئب، اونا خئدمت ادئردئلر. عئسا ائله اورشلئمه گلمئش بئر چوخ آرواد دا اولوب-کچنلره تاماشا ادئردئلر.
عئسانین تدفئنی
(متّا 27:57-61، لوقا 23:50-56، یوحنّا 19:38-42)
42آرتیق آخشام اولموشدو. حاضیرلیق گونو، یعنی سبّتدن بئر گون قاباق، 43آرئماتایلی یوسئف گلدی و جسارتئنی بئر یره ییغیب پئلاطین یانینا گتدی و عئسانین جسدئنی ائسته‌دی. یوسئف یهود مجلئسئنئن حؤرمتلی عوضولرئندن بئری ائدی و تارینین پادشاهلیغینی گؤزله‌یئردی. 44پئلاط عئسانین بله تز اؤلدویوندن تعجّوب اتدی و یوزباشینی یانینا چاغیریب اوندان سوروشدو: «چوخدان اؤلوب؟» 45و یوزباشیدان احوالاتی بئلندن سونرا عئسانین جسدئنی یوسئفه باغیشلادی. 46یوسئف ده کتان ساتین آلدی و عئسانین بدنئنی چارمیخدان آشاغی اندئرئب، کتانا بوکدو. اونو قایادا قازیلمیش بئر قبئره قویدو و قبئرئن آغزینا بئر داش دئیئرلتدئلر. 47مجدللی مریم و یوسایین آناسی مریم اونون هارایا قویولدوغونو گؤروردولر.
Currently Selected:
مرقوس 15: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.