لوقا 1
1
1عالئجناب تِعوفئلوس،
چوخ آداملار چالیشیبلار کی، آرامیزدا باش ورمئش حادئثه‌لرئن حکایتئنی یازسینلار. 2نجه کی، او باشلانیشدان گؤزلری ائله گؤرَ‌نلر و کلامین خادئملری اونلاری بئزه یتئرئبلر. 3منه ده مصلحت اِله گؤروندو کی، او باشلانیشدان دقئق تفتئش اتدئیئم هامی واقئعه‌لری ترتئبله سئزه یازیم 4اِله کی، اؤیر‌ندئیئنئز مطلبلرئن دوغرو اولماسینا یقئن تاپاسینیز.
5یهودئیه پادشاهی هئرود زامانیندا، ابئیّا دسته‌سئندن زکریا آدلی بئر کاهئن وار ائدی. اونون آروادی الئزابت هارون نسلئندن ائدی. 6اونلارین ائکئسی ده تارینین نظرئنده صالح ائنسانلار ائدئلر و ربّئن هامی امر و احکاملارینا کامئل عمل ادئردئلر. 7لاکئن اونلارین اوشاغی یوخ ائدی، چونکی الئزابت سونسوز ائدی و ائکئسی ده قوجا ائدئلر.
8بئر گون زکریا، اؤز دسته‌سئنئن کاهئنلئک نؤوبتی اولاندا، تارینین حوضوروندا کاهئنلئک وظئفه‌سئنه مشغول ائدی. 9زکریا ربّئن معبدئنه گئردی. چونکی بوخور یاندیرماق پوشکو نجه کی، کاهئنلئکده عادت اولموشدو، اونون آدینا دوشموشدو. 10بوخور یاندیرماق ساعاتی یتئشنده، جاماعاتین هامیسی اشئکده دوعا ادئردئلر. 11او زامان ربّئن بئر مله‌یی، بوخور قوربانگاهینین صاغ طرفئنده دوروب زکریایا ظاهئر اولدو. 12زکریا مله‌یی گؤرَ‌نده دئسکئندی و قورخو اونو بورودو. 13آمّا ملک اونا ددی:
«زکریا، قورخما. دوعان موستجاب اولوب. آروادین الئزابت سنئن اوچون بئر اوغلان دوغاجاق. اونون آدینی یحیا قویاجاقسان. 14او، سنه شادلیق و صفا سببی اولاجاق و اونون آنادان اولماسینا گؤره چوخ آداملار سوئنه‌جکلر. 15چونکی او، ربّئن نظرئنده بؤیوک اولاجاق. هچ واخت شراب و کفلندئرن بئر زاد ائچمه‌یه‌جک و آناسینین قارنیندان موقدّس روحلا دولو اولاجاق. 16او، ائسرایئل مئلّتئنئن چوخلارینی، اونلارین اؤز رب تاریسینا دؤندَ‌ره‌جک. 17او، ربّئن قاباغیندا، ائلیانین روحو و قووّتی ائله گده‌جک. اله کی، آتالارین اورَکلرئنی اوشاقلارا و عاصئلری، صالحلرئن حئکمتئنه دؤندَ‌رسئن، اله کی، رب اوچون بئر خالق حاضیرلاسین.»
18زکریا ملکدن سوروشدو:
«من بونو نه‌دن بئلئم؟ چونکی من قوجا آدامین بئری‌یَم، آروادیم دا یاشلی‌دیر.»
19ملک جاواب وردی:
«من تارینین حوضوروندا دوران جبرایئلم. گؤندَ‌رئلمئشم کی، سنئنله دانیشیب، سنه بو خوش خبری یتئرئم. 20باخ، ائندی دئلئن توتولاجاق و خبر وردئیئم شیلر واقع اولانا کئمی دانیشماغا قادئر اولمایاجاقسان. چونکی واختیندا دوغرو چیخاجاق سؤزلرئمه ائنانمادین.»
21بو آرادا جاماعات زکریانی گؤزله‌یئردئلر و اونون بو قدر معبدده یوبانماسیندان تعجّوب ادئردئلر. 22معبددن چیخاندا زکریا آرتیق لال اولموشدو. خالق بئلدی کی، او، معبدده بئر رؤیا گؤروب، چونکی ائشاره ائله اونلارا آنلادیردی، لاکئن دانیشماغا قادئر دیئلدی. 23خئدمت گونلری تامام اولاندان سونرا، زکریا اِوئنه قاییتدی.
24او گونلردن سونرا آروادی الئزابت بویلو اولوب، بش آی اؤزونو گئزلتدی. 25و دیئردی: «رب منه مرحمت نظرئنی سالیب و بو ائشی او منه ادئب کی، ذلئل‌لئیئمی ائنسانلارین آراسیندان گؤتورسون.»
عئسانین آنادان اولماسی خبر ورئلئر
26آلتینجی آیدا جبرایئل ملک، تاری طرفئندن، جلئل دئیاریندا ناصئره شهرئنه گؤندَ‌رئلدی. 27مریم آدلی بئر باکئره قیزین یانینا کی، یوسئف آدلی بئر کئشئنئن آداخلیسی ائدی. یوسئف داوودون نسلئندن ائدی. 28ملک اونون یانینا گدئب ددی:
«سالام، ای مرحمت تاپمیش! رب سَنئنله‌دئر.»
29مریم مله‌یئن ددئیی سؤزلردن نئگاران اولوب، گئجَلمئشدی کی، بو نجه سالاملاشماقدیر. 30آمّا ملک اونا ددی:
«ای مریم، قورخما. تاری یانیندا توفئق تاپیبسان. 31باخ، بویلو اولوب بئر اوغول دوغاجاقسان، و اونون آدینی عئسا قویاجاقسان. 32او، بؤیوک اولاجاق و حاق-تاعالانین اوغلو چاغیریلاجاق. رب تاری اونا، آتاسی داوودون تختئنی وره‌جکدئر. 33و او، یعقوبون اِوی اوستونه#1:33 مقصد ائسرایئل خالقی‌دیر. ابده کئمی سلطنت اده‌جک و اونون پادشاهلیغینین آخیری اولمایاجاق.»
34مریم ملکدن سوروشدو:
«بو نجه اولا بئلر، منئم کی، حله اَرئم یوخدور؟»
35ملک جاواب ورئب ددی:
«موقدّس روح سنئن اوستونه نازئل اولاجاق و حاق-تاعالانین قودرتی سنه کؤلگه سالاجاق. اونون اوچون ده او موقدّس مؤولودا تارینین اوغلو دیئله‌جک. 36باخ، سنئن قوحومون الئزابت ده بو قوجا زامانیندا بئر اوشاغا بویلودور. او کی، اونون حاقّیندا سونسوز دیئردئلر، ائندی آلتینجی آیینی کچئردئر. 37چونکی تارینین یانیندا قیری‌مومکون بئر شی یوخدور.»
38مریم ددی:
«من ربّئن کنئزی‌یَم. قوی منه ددئیئن کئمی اولسون.»
و ملک اونون یانیندان گتدی.
مریم الئزابتئن گؤروشویونه گدئر
39او گونلرده مریم دوروب، تله‌سئک داغلیق بؤلگه‌سئنده اولان یهودئیه‌نئن بئر شهرئنه گتدی. 40و زکریانین اِوئنه گئرئب، الئزابته سالام وردی.
41الئزابت مریمئن سالامینی اشئدن زامان، اوشاغی قارنیندا ترپَشدی و موقدّس روحلا دولدو، 42اوجا سَسله سَسله‌نئب ددی: «سن آروادلار آراسیندا موبارکسن، قارنیندا اولان اوشاق دا موبارکدئر! 43منه هارادان بله بئر عئزّت گلئب کی، ربّئمئن آناسی گؤروشویومه گلسئن! 44چونکی سنئن سالامینین سسی قولاغیما یتئشن واخت، اوشاق قارنیمدا شادلیقدان ترپَشدی. 45خوش او آدامین حالینا کی، ائنانیب ربّئن طرفئندن دیئلمئش سؤز یرئنه یتئشه‌جک!»
مریمئن نغمه‌سی
46و مریم ددی:
«جانیم ربّی اوجالدیر.
47و روحوم قورتاریجیم تاریدا شادلیق ادئر.
48چونکی او، کنئزئنئن حقئر حالینا مرحمت نظری سالیب.
بوندان سونرا هامی نسئللر منه بختور دئیه‌جکلر.
49چونکی او قادئر اولان،
منئم اوچون بؤیوک ائشلر اتدی.
اونون آدی موقدّسدئر!
50او، اؤز رحمتئنی،
نسئل به نسئل، اوندان قورخانلارین اوستونه سالیر،
51قولو ائله قودرتلی ائشلر گؤرسه‌دئب.
اوره‌یئنده مغرور اولانلاری داغیدیبدیر
52پادشاهلاری تختلرئندن اِندئرئب،
لاکئن باشی‌آشاغی اولان آداملاری اوجالدیب.
53آجلاری یاخشی شیلرله دویوروب،
آمّا وارلی آداملاری الی-بوش قایتاریب.
54او، اؤز قولو ائسرایئله ائمداد ادئب،
یادیندادیر کی،
55ائبراهئم و اونون نسلئنه ابده کئمی رحمت گؤرسدسئن.
نجه کی، آتالاریمیزا دا دمئشدی.»
56و مریم اوچ آیا قدر الئزابتئن یانیندا قالدی و سونرا اِوئنه قاییتدی.
57الئزابتئن دوغوم واختی یتئشدی و او، بئر اوغلان دوغدو. 58اونون قونشولار و قوحوملاری اشئتدئلر کی، رب اونا بؤیوک بئر مرحمت گؤرسه‌دئب و اونونلا شادلیق اتدئلر. 59سکّئزئنجی گون گلدئلر کی، اوشاغی ختنه اتسئنلر و ائسته‌یئردئلر اونون آدینی، آتاسینین آدینا گؤره، زکریا قویسونلار. 60لاکئن آناسی جاواب ورئب ددی: «یوخ! اونون آدی یحیا اولاجاق!»
61اونا ددئلر:
«قوحوملارینین آراسیندا بو آدلا آدلانمیش هچ کس یوخدور.»
62سونراسی آتاسیندان ائشاره ائله سوروشدولار کی، اوغولون آدینی نه قویماق ائسته‌یئر. 63زکریا بئر یازی تخته‌سی ائسته‌دی و تخته‌نئن اوستونده یازدی: «اونون آدی یحیادیر.» هامی مات قالدی.
64او آندا زکریانین دئلی آچیلدی و تارییا حمد ادئب دانیشماغا باشلادی. 65اونلارین اطرافیندا یاشایان هامی قونشولاری قورخو باسدی و یهودئیه‌نئن هامی داغلیق بؤلگه‌سئنده، هر کس بو واقئعه‌دن دانیشیردی. 66و بونو اشئدنلر، اشئتدئکلرئنئن هامیسینی یادلاریندا ساخلاییب، حیران قالمیشدیلار و دیئردئلر: «بو اوشاق نه اولاجاق!»
چونکی ربّئن الی اونونلا ائدی.
زکریانین شوکران نغمه‌سی
67اوشاغین آتاسی زکریا، موقدّس روحلا دولدو و نبئلئک ادئب ددی:
68«ائسرایئلئن تاریسی رب، موبارک اولسون.
چونکی گلئب و اؤز خالقینی خئلاص ادئب،
69و داوودون اِوئندن بئزئم اوچون قودرتلی بئر قورتاریجی میدانا گؤندَ‌رئب.
70نجه کی، چوخ زامانلاردان قاباق
اؤز موقدّس پیغمبرلرئنئن آغیزی ائله دمئشدئر کی،
71دوشمنلرئمئزئن و بئزدن نئفرت‌ادنلرئن هامیسینین الئندن بئزی قورتاراجاق.
72اونون اوچون کی، آتالاریمیزا رحمت گؤرسدسئن
و اؤز موقدّس عهدئنی خاطیرلاسین.
73آتامیز ائبراهئمه ائچدئیی او آند کی،
74بئزی دوشمنلرئمئزئن الئندن نئجات ورسئن
و قادئر اتسئن کی، قورخوسوز خئدمت ادک؛
75بوتون عؤمروموزو اونون حوضوروندا
قودسئیّت و صالحلئکله!
76و سن ای اوشاق،
حاق-تاعالانین پیغمبری چاغیریلاجاقسان.
چونکی ربّئن قاباغیندا گدئب،
اونون یولونو حاضیرلایاجاقسان.
77اِله کی، اونون خالقینا نئجات معرئفتئنی وره‌سن کی، اونلارین گوناهلارینین باغیشلانماسیندادیر.
78تاریمیزین مرحمتئنه گؤره،
طولوع ادن گونش گؤیدن بئزه گله‌جک.#1:78 ملاکی ۴:۲
79اله کی، قارانلیقدا
و اؤلوم کؤلگه سئنده اوتورانلارا ائشیق ورسئن
و بئزئم قدملرئمئزی صولح یولونا هئدایت اتسئن.»
80و اوشاق بؤیویوب، روحدا قووّتله‌نئردی و ائسرایئل خالقینین آراسیندا ظوهور اده‌نه قدر چؤللرده یاشاییردی.
Currently Selected:
لوقا 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.