ܓܠܝܢܐ 4
4
ܣܓ݂ܕܬܐ ܫܡܝܢܝܬܐ
1ܡ̣ܢ ܒܵܬܪ ܐܲܢܹܐ، ܓܘܼܫܸܩ ܠܝܼ ܘܚܙܹܐ ܠܝܼ ܬܲܪܥܵܐ ܦܬܝܼܚܵܐ ܓܵܘ ܫܡܲܝܵܐ، ܘܩܵܠܵܐ ܩܲܕܡܵܝܵܐ ܕܫܡܝܼܥ ܠܝܼ ܗܲܡܙܘܼܡܹܐ ܥܲܡܝܼ ܐܲܝܟ݂ ܫܝܼܦܘܿܪܵܐ ܝܗܘܵܐ ܕܐܡܝܼܪܹܗ ܐܸܠܝܼ: ”ܐܣܘܿܩ ܠܲܐܟ݂ܵܐ ܘܒܸܬ ܡܲܚܙܸܢܘܼܟ݂ ܡܸܢܕܝܼܵܢܹ̈ܐ ܕܘܵܠܹܐ ܝܠܵܗ̇ ܕܗܵܘܝܼ ܡ̣ܢ ܒܵܬܪ ܐܲܢܹܐ.“2ܗܲܪ ܒܗ̇ܝ ܥܕܵܢܵܐ ܗܘܹܐ ܠܝܼ ܒܪܘܼܚܵܐ، ܘܗܵܐ، ܚܙܹܐ ܠܝܼ ܬܪܘܿܢܘܿܣ ܡܘܼܬܒ݂ܵܐ ܒܫܡܲܝܵܐ، ܘܥܲܠ ܬܪܘܿܢܘܿܣ ܝܬܝܼܒ݂ܵܐ ܚܲܕ.3ܘܗ̇ܘ ܕܝܬܝܼܒ݂ܵܐ ܝܗܘܵܐ ܒܸܕܡܵܝܵܐ ܝܗܘܵܐ ܠܟܹܐܦܵܐ ܕܐܝܼܵܣܦܘܿܢ ܘܕܣܲܪܕܝܼܘܿܢ، ܘܩܸܫܬܵܐ ܕܥܢܵܢܵܐ ܠܚܵܕܸܪ̈ܘܵܢܹܐ ܕܬܪܘܿܢܘܿܣ ܒܕܡܘܼܬܵܐ ܕܙܸܡܪܘܼܕ.4ܘܠܚܵܕܸܪ̈ܘܵܢܹܐ ܕܬܪܘܿܢܘܿܣ ܐܝܼܬ ܗܘܵܘ ܥܸܣܪܝܼ ܘܐܲܪܒܥܵܐ ܬܪ̈ܘܿܢܘܿܣܹܐ ܐܚܹܪ̈ܢܹܐ، ܘܥܲܠ ܐܲܢܹܐ ܬܪ̈ܘܿܢܘܿܣܹܐ ܝܬܝܼܒܹܐ ܝܗܘܵܘ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ، ܠܒ݂ܝܼܫܹܐ ܓ̰ܘܼܠܹ̈ܐ ܚܘܵܪܹ̈ܐ، ܘܥܲܠ ܪܹ̈ܝܫܵܝܗܝ ܟܠܝܼܠܹ̈ܐ ܕܕܲܗܒ݂ܵܐ.5ܘܡ̣ܢ ܬܪܘܿܢܘܿܣ ܒܸܦܠܵܛܵܐ ܝܗܘܵܘ ܒܸܪ̈ܩܹܐ ܘܩܵܠܹ̈ܐ ܘܪ̈ܲܥܡܹܐ، ܘܫܒܲܥ ܡܢܵܪ̈ܵܬܹܐ ܕܢܘܼܪܵܐ ܒܸܠܗܵܝܵܐ ܩܲܕܡ ܬܪܘܿܢܘܿܣ. ܐܲܢܹܐ ܝܢܵܐ ܫܒܲܥ ܪ̈ܘܼܚܹܐ ܕܐܲܠܵܗܵܐ.6ܘܩܲܕܡ ܬܪܘܿܢܘܿܣ ܐܝܼܬ ܗܘܵܐ ܐܲܝܟ݂ ܝܵܡܵܐ ܕܫܘܼܫܵܐ، ܨܦܝܼܬܵܐ ܐܲܝܟ݂ ܟܪܝܼܣܬܲܠ. ܘܒܹܝܦܲܠܓܵܐ ܕܬܪܘܿܢܘܿܣ ܘܠܚܵܕܸܪ̈ܘܵܢܘܼܗܝ ܐܝܼܬ ܗܘܵܘ ܐܲܪܒܲܥ ܚܲܝܘܵܬܹ̈ܐ، ܡܸܠܝܹܐ ܥܲܝ̈ܢܹܐ ܡ̣ܢ ܠܩܲܕܡܵܐ ܘܡ̣ܢ ܠܒܵܬܪܵܐ.7ܗ̇ܝ ܚܲܝܘܬܵܐ ܩܲܕܡܵܝܬܵܐ ܒܸܕܡܵܝܵܐ ܝܗܘܵܐ ܠܐܲܪܝܵܐ، ܘܗ̇ܝ ܬܪܲܝܵܢܝܼܬܵܐ ܠܡܘܼܓ̰ܵܐ، ܘܗ̇ܝ ܬܠܝܼܬܵܝܬܵܐ ܐܝܼܬ ܗܘܵܐ ܠܵܗ̇ ܦܵܬܵܐ ܐܲܝܟ݂ ܦܵܬܵܐ ܕܒܲܪܢܵܫܵܐ، ܘܗ̇ܝ ܪܒ݂ܝܼܥܵܝܬܵܐ ܒܸܕܡܵܝܵܐ ܝܗܘܵܐ ܠܢܸܫܪܵܐ ܦܵܪܘܿܚܵܐ.8ܟܠ ܚܲܕ ܡ̣ܢ ܐܲܢܹܐ ܐܲܪܒܲܥ ܚܲܝܘܵܬܹ̈ܐ ܐܝܼܬ ܗܘܵܐ ܠܵܗ̇ ܫܬܵܐ ܓܘܼܠܦܵܢܹ̈ܐ، ܘܡܸܠܝܹܐ ܝܗܘܵܘ ܥܲܝ̈ܢܹܐ ܡ̣ܢ ܠܚܵܕܸܪ̈ܘܵܢܹܐ ܘܡ̣ܢ ܠܓܵܘܵܐ. ܘܠܹܐ ܫܵܠܝܼ ܒܐܝܼܡܵܡܵܐ ܘܒܠܲܝܠܹܐ ܡ̣ܢ ܠܹܐܡܵܪܵܐ:
ܩܲܕܝܼܫ، ܩܲܕܝܼܫ، ܩܲܕܝܼܫ، ܡܵܪܝܵܐ ܐܲܠܵܗܵܐ، ܗ̇ܘ ܐܲܚܝܼܕ ܟܠ، ܗ̇ܘ ܕܝܼܗܘܵܐ، ܘܗ̇ܘ ܕܝܼܠܹܗ، ܘܗ̇ܘ ܕܒܸܬ ܐܵܬܹܐ.
9ܘܐܝܼܡܲܢ ܕܐܲܢܹܐ ܚܲܝܘܵܬܹ̈ܐ ܟܹܐ ܝܵܗܒ݂ܝܼ ܫܘܼܒ݂ܚܵܐ ܘܐܝܼܩܵܪܵܐ ܘܫܲܟܲܪܬܵܐ ܠܗ̇ܘ ܕܝܼܠܹܗ ܝܬܝܼܒ݂ܵܐ ܥܲܠ ܬܪܘܿܢܘܿܣ، ܠܗ̇ܘ ܕܚܵܝܵܐ ܝܠܹܗ ܠܥܵܠܲܡ ܥܵܠܡܝܼܢ،10ܟܹܐ ܢܵܦܠܝܼ ܐܵܢܝܼ ܥܸܣܪܝܼ ܘܐܲܪܒܲܥ ܚܘܵܪ̈ܕܸܩܢܹܐ ܩܲܕܡ ܗ̇ܘ ܕܝܼܠܹܗ ܝܬܝܼܒ݂ܵܐ ܥܲܠ ܬܪܘܿܢܘܿܣ، ܘܟܹܐ ܣܵܓ݂ܕܝܼ ܐܸܠܹܗ ܕܚܵܝܵܐ ܝܠܹܗ ܠܥܵܠܲܡ ܥܵܠܡܝܼܢ، ܘܟܹܐ ܕܵܪܝܼ ܟܠܝܼܠܵܝ̈ܗܝ ܩܲܕܡ ܬܪܘܿܢܘܿܣ ܒܹܐܡܵܪܵܐ:
11ܚܫܝܼܚܵܐ ܝܘܸܬ، ܡܵܪܲܢ ܘܐܲܠܵܗܲܢ، ܕܩܲܒܠܸܬ ܫܘܼܒ݂ܚܵܐ ܘܐܝܼܩܵܪܵܐ ܘܚܲܝܠܵܐ، ܣܵܒܵܒ ܐܲܢ݇ܬ ܒܪܹܐ ܠܘܼܟ݂ ܟܠܵܝܗܝ ܡܸܢܕܝܼܵܢܹ̈ܐ، ܘܒܨܸܒ݂ܝܵܢܘܼܟ݂ ܗܘܹܐ ܠܗܘܿܢ، ܘܦܝܼܫ ܠܗܘܿܢ ܒܸܪܝܹܐ.
Currently Selected:
ܓܠܝܢܐ 4: aii
Highlight
Share
Copy
Want to have your highlights saved across all your devices? Sign up or sign in
© 2014, Aramaic Bible Translation, Inc. All rights reserved.